Leweenaꞌo 4
4
Diqqoona Shuuneeti Axaaxoyich Giddemmi Deejjoo
1Doono Yeeri Muusich ishichiye: 2“Israꞌeeleenaꞌoyich ishichi gete. ‘Asho koniyoona Doono Yeeri ta getteti getoochee aabinona shaaddeꞌi diqqoona axaaxoon bi shuunegaata, ebin tuniibe:
3“ ‘Qeeshee guudo axaaxoon shuuneꞌi, asheenaꞌo toommooch axaaxoo haddeyemmoyich bi tuniigaata, ebi bi shuuneti axaaxoyich bachaalli wuron axaaxee deejjoon tuniiree Doono Yeeri taach deejjibe. 4Wuron danee duukkaanee kellooch, Doono Yeeri ta aafooch deebe. Bi kishoon ebi wurochi qellooch kotiibe. Doono Yeeri ta aafoochaa guuribe. 5Biyoo ebi wurochi damoochee giishechoon danee duukkaanooch deebe. 6Bi kishee yapheroon damooch haciree, Doono Yeeri ta aafooch, Yaafe Xaaꞌeexi Yaafee maccillaatee maachi ciinooch shabaatte wottoon wucibe. 7Wotta are damoochee daamiree danee duukkaanee daggooch, Doono Yeeri ta aafooch beeti, gaawe cinnechi ixaano geddeebeeti deejjee gudee qareenaꞌon huute. Echeti damoon micciibeeti deejjoo giddeebeeti, danee duukkaanee kellooch beeti deejjee gudee xepphooch ukkibe. 8Axaaxee deejjoyich giddeti ebi wurochi awuyo bullin, ebiyoo maacee meechi toommooch beeti awuyo bullin, 9gutte yeyitoon bi toommooch beeti shimeteexi awuyona tookki, qamee deshi qati kuxon yeyitoona tookki maaci kichibe. 10Ebiyoo ikkittinee deejjoyich giddeti wurochee maacaa kechitoommoniye. Are qeeshee guudo ebi bullin micciibeeti deejjoo giddeebeeti deejjee gudee toommoochaa michibe. 11Tunebaani are wurochi gooqqoonaa bi meeno bullinon, bi qelloonaa bi baatoonon, bi maacee meenon haamboona tookki, 12wurochi meeno bullin kaamboochee bi kechemmoyich tuniiree, tulloo duppeebeeti baashooch beeti yaafe xaaꞌooch daami, mixon gedi qaaqqoona goge. Ebi tulloo duppeebeeti baashoochaa gokkebe.
13“ ‘Israꞌeeleenaꞌo bulli Doono Yeeri ta, boonoshi tuniyaachemmoyich ta getteti getoochee aabinona shaaddeꞌi diqqoona axaaxoon boonoshi shuunetaa, ebi boonoshi shuuneti axaaxoo boonoshich aricho bi qajjitaanona, ebina xuꞌechinaꞌo boonoshi tunegaata, 14boonoshi shuuneti axaaxoo xalla bi arichehooba, asheenaꞌo axaaxee deejjoyich tunemmi wuron danee duukkaanee aafooch deebeete. 15Asheenaꞌo daggoochee geeneenaꞌo Doono Yeeri ta aafoochaa ebi wurochi qellooch boonoshi kishoon kotiichaa, wuro Doono Yeeri ta aafoochaa guureebe. 16Aroochee qeeshee guudo ebi wurochi damoochee giishechoon danee duukkaanooch deebe. 17Bi kishee yapheroon damooch haciree, Doono Yeeri ta aafooch, Yaafe Xaaꞌeexi Yaafee maccillaatee maachi ciinooch shabaatte wottoon wucibe. 18Wotta are damoochee daamiree, danee duukkaanee daggooch, Doono Yeeri ta aafooch beeti, deejjee gudee qareenaꞌon huute. Echeti damoon micciibeeti deejjoo giddeebeeti, danee duukkaanee kellooch beeti deejjee gudee xepphooch ukkibe. 19Ebi wurochi awuyo bullin maaci kichiree deejjee gudee toommoochaa michibe. 20Axaaxoyich giddeti wuro toommooch bi tuniitoommon, hinichi toommoochoo tuniibe. Ebiyoommi gommona qeeshoo asheenaꞌochi axaaxoyich deejjoon bi giddiitaa, boonoshi axaaxoyich maaroon danemminaꞌone. 21Wurochi meeshoo kaamboochee bi kechemmoyich tuniiree, bi axaaxoyich bi michiti wuron bi gogoommon hininoo goge. Ebiyoo asheenaꞌo bullichi axaaxoyich tunemmi deejjoone.
22“ ‘Iraashoo, bi tuniyaachemmoyich bi Nuggishoo Doono Yeeri ta getteti getoochee aabinona shaaddee diqqoona axaaxoon shuuneꞌi, xuꞌecho bi tunegaata, 23bi shuuneti axaaxoo biich bi arichegaata, bachaalli emmishee baaddoon axaaxee deejjoyich deebe. 24Biyoo ebi emmishoochi qellooch bi kishoon kotiichi, micciibeeti deejjoyich giddeti gijjoo guureeti xaaꞌoochaa, Doono Yeeri ta aafoochaa guuribe. Ebiyoo axaaxee deejjoone; 25qeeshoo ebi axaaxee deejjoyich giddeti gijjoochi damooch bi kishee yapheroon haciree daami, micciibeeti deejjoo giddeebeeti deejjee gudee qareenaꞌooch huute. Echeti damoon ebi are deejjee gudee xepphooch ukkibe. 26Ebi emmishoochi awuyo bullin, ikkittinee deejjoyich giddeti gijjoochi awuyon bi michoommon, deejjee gudoochaa michibe. Ebiyoommi gommona qeeshoo uroochi axaaxoyich deejjoon bi giddiitaa, bi axaaxoyich maaroon danemmone.
27“ ‘Asheenaꞌo daggoochee ikkoo Doono Yeeri ta, bi tuniyaachemmoyich ta getteti getoochee aabinona shaaddee diqqoona axaaxoon shuuneꞌi, xuꞌecho bi tunegaata, 28bi shuuneti axaaxoo biich bi arichegaata, bachaalli emmisheen bi axaaxee deejjoyich deebe. 29Biyoo ebi emmisheechi qellooch bi kishoon kotiichi, micciibeeti deejjoyich giddeti gijjoo guureeti xaaꞌoochaa, ebi axaaxee deejjoon guuribe; 30qeeshoo ebi deejjoyich giddeti emmishee damooch bi kishee yapheroon haciree daami micciibeeti deejjoo giddeebeeti deejjee gudee qareenaꞌooch huute. Echeti damoon ebi are deejjee gudee xepphooch ukkibe. 31Uro bi awuyo bullin ikkittinee deejjoyich giddeti gijjoochi awuyo maacaa keyoommon maaci kichibe. Qeeshoo Doono Yeeri taach gaawe cinnechi deejjoon tuniiree deejjee gudoochaa deejjibe. Ebiyoommi gommona qeeshoo uroochi axaaxoyich deejjoon bi giddiitaa, uro bi axaaxoyich maaroon danemmone.#Had. 15:27-28
32“ ‘Ebi uro bagoon bi axaaxee deejjoyich bi giddiigaata, bachaalli bageen giddiibe. 33Biyoo ebi bagee qellooch bi kishoon kotiichi, micciibeeti deejjoyich giddeti gijjoo guureebeeti xaaꞌoochaa, ebi axaaxee deejjoon guuribe; 34qeeshoo ebi axaaxee deejjoyich giddeti bagee damooch bi kishee yapheroon haciree daami micciibeeti deejjoo giddeebeeti deejjee gudee qareenaꞌooch huute. Echeti damoon ebi are deejjee gudee xepphooch ukkibe; 35uro awuyo bullin ikkittinee deejjoyich giddeti bagee baaddoochi awuyo maacaa keyoommon, maaci kichibe. Qeeshoo, Doono Yeeri taach micciibeeti deejjee toommooch gediree, deejjee gudoochaa michibe. Ebiyoommi gommona qeeshoo uroochi axaaxoyich deejjoon bi giddiitaa, uro bi axaaxoyich maaroon danemmone.
Currently Selected:
Leweenaꞌo 4: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
