Leweenaꞌo 27
27
Mookkeeti Mooyon Gatiyoon Qocciꞌi Wochiyoo
1Doono Yeeri Muusich ishichiye: 2“Israꞌeeleenaꞌoyich ishichi gete: ‘Ikke asho ashoon Doono Yeeri taach imma bi mookkegaata, are uroochi qoodoon tate gatiyoon qoce. 3Hiye natoochee shiche natooch beddaahaa beeti anaamochi gatiyoo yaafee kechi machoona qocaa, aache sheqeelee xure birewoo tunebe. 4Maachee bi tunegaata, bi gatiyoo shaashe sheqeelee xure birewoo tunebe. 5Uuche natoochee hiye natooch beddaahaa beeti ashi qoodoon ichemmi gatiyoo, anaamoyich hiye sheqeelee xure birewoo, maacheyich aashire sheqeelee xure birewoo tunebe. 6Ikke agenoochee uuche natooch beddaahaa beeti bushiishoochi qoodoo ichemmi gatiyoo, anaamoyich uuche sheqeelee xure birewoo, maacheyich keejje sheqeelee xure birewoo tunebe. 7Shiche natonaa aroyee damboona tuneti ashi qoodoon ichemmi gatiyoo, anaamoyich aaraa uuche sheqeelee xure birewoo, maacheyich aashire sheqeelee xure birewoo tunebe.
8“ ‘Mookketi uro girecho tuneꞌi ebi gatiyoon qoccemmon bi mawiigaata, are bi mookketi ashoon qeeshoo waan deebe. Qeeshoo uro qocon bi hakkemmon tuniiree gatiyoon kindiibe.
9“ ‘Uro mookketo deejjoo tuniitaa, Doono Yeeri taach gidd bede gijjoon bi tunegaata, asho Doono Yeeri taach giddiibeeti ebiyoommi gijjoo yaafoo tunemmone. 10Ebi are uro gaawe gijjoon gondoona woyee gondoon gaawe gijjoona shaddaaye; woyee are gijjee qoodoon baroon keraaye. Ebin bi tuniigaata, boonoshi guttiyona Doono Yeeri taach baritinaꞌo tunemminaꞌone. 11Uro giddiiti gijjoo Doono Yeeri taach deejjoo gidd bedaani, xalloo tuneyaani gijjoo bi tunegaata, are gijjoon qeeshoo aafooch giddiibe. 12Are gijjoo gondo tuneba deꞌo, qeeshoo bi gatiyoon gete. Ebi bi gettii kuxxiti gatiyoona taccebe. 13Tunebaani uro wochii deꞌon bi qaawigaata, bi gatiyee toommooch uuche kishoochee ikkoon daakkibe.
14“ ‘Ikke asho bi kexon Doono Yeeri taach kechiton tuniiꞌi bi imigaata, kexo gondo tuneba deꞌo, qeeshoo bi gatiyoon gete. Ebi bi gettii kuxxiti gatiyoo ciiro tunebe. 15Are uro bi kexon wochii deꞌon bi qaawigaata, bi gatiyee toommooch uuche kishoochee ikkoon daakkiree qoce; kexo biicho tunemmone.
16“ ‘Ikke asho bi qaabbechinaꞌo waanee bi woraashiti showee qaton Doono Yeeri taach bi kichigaata, are showooch shookkeebeeti yaroon ciinaa, bi gatiyoo maaccebe. Ebiyoo ikke xaanee sheqoyich aache sheqeelee xure birewoo tunebe. 17Uro bi showoon bi kichito Yobeelee natooba bi tunegaata, ceeni gatiyoo tunebe. 18Tunebaani uro bi showoon bi kichito, Yobeelee nato beshetoyee gubb bi tunegaata, qeeshoo waabeeti Yobeelee natooch beddaahaa beeti naton haddoona gijjoon tachiree are gijjoochee kindiibe. 19Bi showoon kichiti uro wochii deꞌon bi qaawigaata, bi gatiyee toommooch uuche kishoochee ikkoon daakkiree qoce; showoo biicho tunemmone. 20Are showoon wochii deꞌon bi qayigaata woyee bare ashich bi kemigaata, aroyee gubb wochii deꞌon hakkaache. 21Tunebaani showoo Yobeelee natooba bi gawukkeehooba, Doono Yeeri taach yaafeebe; taachoo gawukkeebe; qeesheenaꞌo showoo tunebe.
22“ ‘Ikke asho bi woraashiti showoon tuneyaanoon bi kemeti showoon Doono Yeeri taach bi kichigaata, 23qeeshoo waabeeti Yobeelee natooch beddaahaa beeti naton gabiree bi gatiyoon tachibe. Uro ebi getteeti gatiyoon Doono Yeeri taach kechiti gijjoon tuniiree ebi arooba imbe. 24Yobeelee natooba showoo kemmiti uroyich wottebe. 25Gatiyoo bulli yaafee kechi machoona qocceeto tunebe; ikke sheqeelo aaraa gutte giraam bedoone.
26“ ‘Shiichii shiijjeti gijjoo Doono Yeeri taacho bi tunetoyich, koniyoona taach kichaaye. Gattoo tuneba bago woyee emmisho taachone. 27Xalloo tuneyaani gijjoo bi tunegaata, bi gatiyoona wochi deꞌe; aree toommooch uuche kishoochee ikkoon daakkibe. Wochii deꞌon bi qayigaata getteeti gatiyoona kechebe.
28“ ‘Tunebaani wottaaye, getaa mookkeeꞌi taach kechiti mooyo amolla, asho tuneba gijjoo woyee woraasheeti showoo tuneba kecheyaachemmone; wochenoo deqqeyaachemmone; Doono Yeeri taach kechiti mooyo bulli oogeti yaafoone.
29“ ‘Qitibe, getteeti asho koniyoona biisheyaachemmone; wuxaa aallebe.
30“ ‘Showooch shaggiibeeti maayoochee tuneba michi aafoochee asraato taachone; Doono Yeeri taach yaafeetone. 31Ikke asho asraato bi immiti mooyon wochii deꞌon bi qaawigaata, bi gatiyee toommooch gatiyee uuche kishoochee ikkoon daakkoo biich qaawiihe. 32Ittoshi miimon, bagoonaa emmishoonon ittoshi haddimmona aashiri aashireexi ikkoo Doono Yeeri taach kechito tunebe. 33Ebi gijjee doono deꞌoonaa gondoonon barbariyaaye; woyee shaddaaye. Ebin bi tuniigaata, are gijjoonaa shaddoyich giddetona boonoshi guttiyona Doono Yeeri taach kechitinaꞌo tunemminaꞌone. Ebich ebi gijjoo wochaa deqqeyaachemmone’ itone gete” iye.#Had. 18:21; 14:22-29
34Doono Yeeri Siini guudi toommoochaa Muusina Israꞌeeleenaꞌoyich bi gettiti geto ebine.
Currently Selected:
Leweenaꞌo 27: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
