Leweenaꞌo 21
21
Qeesheenaꞌoyich Icheti Doyoo
1Doono Yeeri Muusich ishichiye: “Qeesheenaꞌo tuneti Harooni anaami bushiisheenaꞌoyich ishichi gete: ‘Ittoshi daggoochee koniyoona bi xiboo qitigaata, bi ashittinoon eeꞌiyaaye. 2Tunebaani bi katini xiboo, ebiyoo bi indee, bi nihoo, bi bushoo, bi bushee, bi manoonaa 3biinna tookkii beeti shaakkeyaani bi maneenoyich bi ashittinoon eeꞌiyoon hakkiye. 4Naacheꞌi bi xibetinaꞌoyich bi ashittinoon eeꞌiyaaye.
5“ ‘Qeesheenaꞌo eeppii muushenetinaꞌo boonoshi tunoon bekkiyoyich, boonoshi qelloon cakkaayeete; boonoshi ishaanee goconoo maachaayeete; boonoshi achoon gari shettaayeete.#Lew. 19:27-28; Yibba. 14:1 6Boonoshi Nuggishoo taach yaafeeton tunebeete. Boonoshi Nuggishoo ta shigoon naakkiyaayeete. Micciibeeti deejjoonaa maayi buuroonon taach giddii beetinaꞌo boonoshi tunetoyich, yaafeenaꞌo tunebeete.
7“ ‘Qeeshoo bi Nuggishoyich yaafeeto bi tunetoyich, yahechin tunaꞌa bi qeddoon eeꞌiitin woyee gawukkeeti maacheen shaaggaaye. 8Maayi buuroon ittoshi Nuggishoo taach giddiibeeto bi tunetoyich, yaafoo tuniiree biin ciinote. Ittoshin yaafiibeeti Doono Yeeri ta, yaafoo ta tunetoyich, biin yaafoo tuniiree ciinote.
9“ ‘Qeeshoo bushee yahechi tunaꞌa bi qelloon bi giishiigaata, bi nihoon giishiitine. Ebich qaaqqooch gokkebuye.
10“ ‘Bi maneenaꞌo toommooch ukkireti, bi shimbooch zayito ukkeeti, yaafee kexooch shuuneechi tahoon tahoyich huutteti, qeeshee guudo bi qelloon kaaccii shiimoon qajjaaye; bi tahoonoo keexxaaye. 11Dubeno beeti xaaꞌooch shaggaaye; bi nihoochi woyee bi indeechi dubenona bi tunetaa, dubenoon yeshona eeꞌaaye. 12Yaafeeti, bi Nuggishoo ta zayito bi toommooch bi beetoyich, yaafeeti ta duukkaanoon duppii hamona duukkaanoon eeꞌiyaaye. Ta, Doono Yeeri taane.
13“ ‘Bi shaaggemmi bushee gidiidee tunebuye. 14Xuumeen, gawukkeetin, yahechi tunaꞌa bi qeddoon eeꞌiitin, eboshin shaaggaaye. Lewi yoodoochee gidiidee tuneti busheen baach shaage. 15Ebin bi tuniyoo qayigaata, bi bushiisheenaꞌo bi asheenaꞌo daggooch eeꞌeenaꞌo tunemminaꞌone. Biin yaafiibeeti Doono Yeeri taane’ itone gete” iye.
16Doono Yeeri Muusich ishichiye: 17“Haroonich ishichibe: ‘Ne shiijjeroochee bache mooyo bi achooch beeti asho koniyoona bi Nuggishoo taach maayi buuroon giddiyoyich woyaaye. 18Bache mooyo bi achooch beeto, ebiyoo aaf doogo woyee baata sheqqo woyee halla gondo woyee shappe quumecho, 19woyee baata yesho woyee kisha tiisho, 20woyee kukko woyee deekko woyee aafee biiyecho woyee quciibeeti biiyo woyee xambiti mayo bi achooch beeto woyee guruusho maayi buuroon giddiyoyich woyaaye. 21Qeeshoo Haroonichi shiijjeroochee bache mooyo bi achooch beeti asho koniyoona Doono Yeeri taach qaaqqooch michaa giddeebeeti maayi buuroon giddiyoyich woyaaye; bache mooyo bi achooch bi beetoyich, bi Nuggishoo taach maayi buuroon giddiyoyich woyaaye. 22Ebiyoommi asho buuro tuniitaa taach giddeti, yaafoonaa oogeti yaafoona tuneti maayoochee mamon hakkiye. 23Tunebaani bache mooyo bi achooch bi beetoyich, yaafeeti mooyinaꞌon bi eeꞌiyaachemmoyich, maccillaatoo beetooch woyee deejjee gudo beetooch giddaaye. Boonoshin yaafiibeeti Doono Yeeri taane’ itone gete” iye.
24Muusiyoo ebin Haroonich, bi bushiisheenaꞌonaa Israꞌeeleenaꞌo bullinoyich gettiye.
Currently Selected:
Leweenaꞌo 21: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
