Leweenaꞌo 2
2
Maayi Buuroon Giddiyoo
1“ ‘Asho koniyoona maayi buuroon Doono Yeeri taach bi giddiigaata, qacini buddinoon giddiibe. Ebi arooch zayitoon ukkibe; ixaanoonoo gede. 2Qeesheenaꞌo tuneti Harooni anaami bushiisheenaꞌo waan deebe. Qeeshoo qacini buddinoonaa zayitoonoochee, ixaano bullina tookki ikke ushon tiijjibe. Ebinoo qaaqqooch michaa giddeebeeti, Doono Yeeri taach gaawe cinnoon cinneebeeti maayi buuroon tuniiree shalligichoyich#2:2 Ebi uro giddiito bulli, Doono Yeerich giddeto bi tuno shalligeyemmoyich woyee giddiiti uro Doono Yeeri aafoochaa bi shalligeyemmoyichiye. deejjee gudee toommoochaa giddiibe. 3Maayi buuroochee echeto Harooninaa bi anaami bushiishoonoyich tunebe. Doono Yeeri taach giddeti maayoochee tiijjeeto bi tunetoyich, oogeti yaafoone.
4“ ‘Gudoochaa kachiti maayi buuroon ne giddiigaata, shittoo giyaanoon kachito tunebe. Zayitoona xirikketi qacini buddinoochee kachiti tagge kosho woyee zayito huutteꞌi shishiitaa kachiti kosho tunebe.
5“ ‘Midaadoochaa kachiti maayi buuroon ne giddiigaata, shittoo giyaano, zayitoona xirikketi qacini buddinoochee kachiti kosho tunebe. 6Koshon buriciree zayitoon bi toommooch ukkibe. Ebiyoo maayi buuroone.
7“ ‘Shexxooch#2:7 Hini xaaꞌoochaa getteeti qiico xuuroochee shuuneeti, bi noonoo gamini qiicoone. Ebi arooch wodde zayito gedaa maayo kachii beetone. kachiti maayi buuroon ne giddiigaata, zayito giyiti qacini buddinoochee kachiti kosho tunebe. 8Ebiyoommi gommona qanniti maayi deejjoon Doono Yeeri taach deebiree, qeeshoyich imbe. Biyoo ebin deꞌiree deejjee gudooch daammemmone. 9Qeeshoo ebi maayi deejjoochee shalligichoyich tunemmi qoodoon deꞌiree qaaqqooch michaa giddeebeeti, Doono Yeeri taach gaawe cinnoon cinneebeeti deejjoon tuniiree deejjee gudoochaa michibe. 10Maayi buuroochee echeto Harooninaa bi anaami bushiishoonoyich tunebe. Doono Yeeri taach deejjeeti maayoochee tiijjeeto bi tunetoyich oogeti yaafoone.
11“ ‘Doono Yeeri taach ittoshi giddiibeeti maayi buuro shittoo giyaano tunebe. Qaaqqooch michiꞌi taach ittoshi giddiibeeti deejjooch shittoon woyee eeyon ciroona geddaahote. 12Eboshin maayi cilloon tuniiꞌi taach giddiyoon hakkiyote. Tunebaani gaawe cinnoon cinneebeeti deejjoon tuniitaa deejjee gudooch deejjeyaayeete. 13Ne giddiibeeti maayi buuro bulliich kiihon geddemmo neene. Kiiho Doono Yeeri taanna tookkii ne giyeti wogoon shalligichiibeeto bi tunetoyich, taach ne giddiibeeti buuro kiikkaallo tunaaye. Ne giddiibeeti buuro bulliich kiihon gede’ iye.
14“ ‘Qaabbe maayoochee cilloon taach ne giddiigaata, gaawee yiikkeeti maayoon giddiibe. 15Aree toommooch zayitoon gede. Ixaanoonoo gede. Ebiyoo maayi buuroone. 16Qeeshoo shalligichoyich tuniiree, yiikkeeti maayoonaa zayitoonoochee tiijjiree, ixaano bullina tookki michibe. Ebiyoo qaaqqooch michaa Doono Yeeri taach giddeebeeti deejjoon tunemmone.
Currently Selected:
Leweenaꞌo 2: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
