Leweenaꞌo 16
16
Axaaxoo Maaree Aabo
1Doono Yeeri aafooch katinnii giddeti Haroonichi gutte bushiisheenaꞌo qititoyee gubb, Doono Yeeri Muusina tookkii yibbaatehe. 2Biichoo ishichiye: “Axaaxoon maariyee guufee toommooch quboona ta danaa beetoyich, ne manoo Harooni bi qitaachemmoyich, maccillaatee maac, Yaafe Xaaꞌeexi Yaafooch, taabootee toommooch beeti, axaaxoon maariyee guufo beetooch, gimoyich bi qaawimmi aabo bullin bi giyaachemmoyich gete.
3“Yaafe Xaaꞌeexi Yaafooch bi giyemmo, axaaxee deejjoyich ikke wuron, wotta micciibeeti deejjoyich ikke bagee baaddoon bi giddiitoyee gubbiye. 4Yaafe Xaaꞌeexi Yaafooch bi gimoyee shiichiree, muttee tuppoochee shippeti, yaafeeti taheenaꞌon tahebe. Biyoo yaafeeti qamisoon tahebe; shuroon eddebe; buroon cuyebe; bi qelloochoo caacoon caace. Bi qeddoon macheree ebi taheenaꞌo bullin tahebe. 5Israꞌeeleenaꞌo waanee axaaxee deejjoyich gutte emmishee baaddoon, wotta micciibeeti deejjoyich ikke bagee baaddoon deꞌe.
6“Biyoo wuron bi axaaxoonaa bi kechi asheenaꞌochi axaaxoonon maariyoyich, axaaxee deejjoon tuniiree deejjibe. 7Aroochee gutte emmishoon daamiree, Doono Yeeri ta aafooch, danee duukkaanee kellooch neechibe. 8Harooni ebi gutte emmisheenaꞌo toommooch ixoon dufiree ikkoon Doono Yeeri taach, wotta ohe ikkoon Azazelich#16:8 Azazeli geto, ama geto gaata xiishaa aricheyaanoone; tunebaani “Barahooch beeti yinnoochi shigoone” getaa gabee beetone. tuniibe. 9Ixoo dufaa, Doono Yeeri taach kechiti emmishoon deebiree axaaxee deejjoo tuniiree deejjibe. 10Azazelich ixoo yechiti emmisho asheenaꞌochi axaaxoon maariyoyich kashoona Doono Yeeri ta aafooch giddeechi, barahooch hambe.
11“Harooni wuron bi axaaxoonaa bi kechi asheenaꞌochi axaaxoonon maariyoyich, axaaxee deejjoon tunii guuriꞌi bi deejjii beegaata, 12Doono Yeeri ta aafooch beeti deejjee gudoochee qaaqqee buno gedaa ceenniti, ixaano shookkeebeeti qiicoonaa gutte kopp bede qacini gaawe cinnechi ixaanoonon yeshiree, maccillaatee maac gibe. 13Taabootee toommooch beeti, axaaxoon maariyee guufoon ciiniree bi qitaachemmoyich, ixaanee cufoo ebi aroon bi qeremmoyich, Doono Yeeri ta aafoochaa ixaanoon qaaqqooch gede. 14Wurochi damoochee giishechoon daamiree, axaaxoon maariyee guufee toommooch, aabi-keyo waanaa bi kishee yapheroona wucibe; damoon axaaxoon maariyee guufee aafooch shabaatte wottoon bi kishee yapheroona wucibe.
15“Aroochee wotta emmishoon asheenaꞌochi axaaxee deejjoyich guuriree, bi damoon maccillaatee maac yeshi gibe. Wurochi damoon bi wucoommon, ebi damoon axaaxoon maariyee guufee toommonaa bi aafoonooch wucibe. 16Ebin tuniyoona, Israꞌeeleenaꞌochi eeꞌo, boonoshi xuꞌoonaa axaaxoo bullinoochee Yaafe Xaaꞌeexi Yaafoon xalliyemmone. Eeꞌo tuneti boonoshi kaambee gutte daggooch bi beetoyich, ebiyoommon wotta danee duukkaanoyich tuniibe. 17Harooni xalliyee doyoon tuniyoyich Yaafe Xaaꞌeexi Yaafooch giyiꞌi bi qelli axaaxoyich, bi kechi asheenaꞌochi axaaxoonaa Israꞌeeleenaꞌo bullichi axaaxoonoyich xalliyee doyoon ceechiꞌi bi kechimmi wottoon, ikke asholla danee duukkaanee daggooch beeyaaye.
18“Aroochee keyiree, Doono Yeeri ta aafooch beeti deejjee gudoon xalliyemmone. Wurochi damoonaa emmishoochi damoonoochee giishechoon daamiree, deejjee gudee guuxxi guuxxooch beeti qareenaꞌooch huute. 19Ebi damoochee giishechoon bi kishee yapheroona shabaatte wottoon deejjee gudooch wucibe. Ebin tuniyoona Israꞌeeleenaꞌochi eeꞌoochee deejjee gudoon xalliyee yaafoon tuniibe.
Axaaxoon Shaagiree Barahooch Gasheyemmi Emmisho
20“Harooni Yaafe Xaaꞌeexi Yaafoon, danee duukkaanoonaa deejjee gudoonon xalliiꞌi bi ciichitoyee gubb, kashoona beeti emmishoon Doono Yeeri ta aafooch giddiibe. 21Ebi are emmishoochi qellooch bi gutte kishoon kotiichi, aree toommoochaa Israꞌeeleenaꞌochi gondo bullin, xuꞌo bullinaa axaaxoo bullinon aannibe; emmishoochi qelloochoo shaakkiibe. Aroochee emmishoon daamoyich qanniti uroochi kishoona barahooch daachiibe. 22Emmisho boonoshi xuꞌo bullin shaagiree asho gafoo hakkaani barahooch daamaa, ebi arooch gawukkeyemmone.
23“Aroochee Harooni danee duukkaanooch giyiree, Yaafe Xaaꞌeexi Yaafooch bi gimoyee shiichiꞌi bi taheti, muttee tuppoochee shippeti taheenaꞌon kichiree arooch kotiibe. 24Yaafoo tuneti xaaꞌoochaa bi qeddoon macheree bi hajjee tahoon tahebe. Aroochee keyiree, bi qelli axaaxoonaa asheenaꞌochi axaaxoonon maariyoyich micciibeeti deejjoon giddiibe. 25Axaaxoyich deejjeeti gijjoochi awuyon deejjee gudee toommoochaa michibe.
26“Emmishoon Azazelich barahooch daammii gawukkiti uro kaambooch bi wottoyee shiichiree, bi tahoon mayi, bi qeddoon machebe. 27Axaaxoon maariyoyich boonoshi damoo Yaafe Xaaꞌeexi Yaafooch giyiti, axaaxee deejjoyich guureeti wuronaa emmishoona kaamboyee maach kichaa, boonoshi gooqqo, meenonaa haamboona mice. 28Boonoshin michiti uro kaambooch bi wottoyee shiichiree, bi tahoon mayi, bi qeddoon machebe.
Axaaxoon Maariyee Baaroon Baaroo
29“Ebi ittoshich bulli yemeenee qociyoo tunebe. Shabaattinnee agenee aashirinnee qemooba coomibote. Showee bushoo tuneba ittoshi daggooch beeti shiqqoo shuunoo amoonolla shuunaaye. 30Ebiyoo qeeshee guudo ittoshi axaaxoon bi maariyemmo, arooba bi tunetoyichiye. Doono Yeeri ta aafooch ittoshi axaaxoo bulliichee xallemmo ittoshine. 31Ebi aabo ittoshich shambetoochoommon kashee aabo, coomiree ittoshi heechemmi aabo tunebe. Ebiyoo ittoshich bulli yemeenee qociyoo tunebe. 32Axaaxoon maariyemmo, bi nihoo keroon qeeshee guudo tunoyich huutaa ukkireti qeeshoone. Biyoo muttee tuppoochee shippeti, yaafeeti tahoon taheree, 33Yaafe Xaaꞌeexi Yaafoon, danee duukkaanoon, deejjee gudoon, qeesheenaꞌonaa Israꞌeeleenaꞌo bullinon xalliyoyich xalliyee doyoon tuniyemmone.
34“Ebi ittoshich bulli yemeenee qociyoo tunebe. Ebi xalliyee doyoo Israꞌeeleenaꞌoyich boonoshi axaaxoo bullin maariyoyich natooch ikke wottoon tunebe” iye.#Lew. 23:26-32; Had. 29:7-11
Ebiyoo Doono Yeeri Muusich gettitoommon tunehe.
Currently Selected:
Leweenaꞌo 16: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
