Shoosho 3
3
Gondoochee Wottoona Daanee Beeti Gibeno
1Bi kaaree gumboona
xuuxoon beeggeti asho taane.
2Bekkaalli manderooch
taan gashee daammiye.
3Bi kishoon ta toommooch tiijjiꞌi,
heeyo bullin wochii wochii taan yexxiye.
4Ta meeno, ta achoo niremmoyich tuniihe;
ta shaawushoonoo tiichiye.
5Taan giichiye;
kashee caammeyoonaa xuuxoona taan giichemmoyich tuniihe.
6Qitii batteetinaꞌochoommon
manderooch ta beeyemmoyich tuniihe.
7Ta muricaachemmoyich uxeroon uxerehe;
magge sansalatoona taan cuchiye.
8Gaachoon danoyich,
ta abeetaa, ta cookaa
ta corootoon waayemmon qajjiye.
9Ta gommon xareeti xaqqoona hicciye;
ta boochoonoo xummiihe.
10Ottiibeeti diiboommon,
nappii quyeebeeti daaheroommonoo, taach tunehe.
11Ta gommoochee taan shottee kichiye;
taan yangixxiye;
shokkoon taan echiihe.
12Bi maꞌoon geechiye;
bi shangoyich malletoon taan tuniihe.
13Shangeenaꞌon gonenoochee kichiꞌi,
ta mullooch kochiye.
14Asho bullich diigee ashoon tunehoye;
heeyo bullin shoddoona taan cooneheete.
15Caame mooyon ta kashooch woniihe;
ereetoon taach uchii michiihe.
16Xaqqooch taan guuppiꞌi ta gashoon tiichiye;
tullooch taan gederikkiye.
17Ta kasho diggoon muccehe;
emiroo amo gaata battehoye.
18Ebich “Ta giidoo qajjitone;
Doono Yeerin, ta gibenaabeeti gibeno echetone” iyo.
19Ta xuuxoonaa ta yallyallimoonon
ta kashee caammeyoonaa cattettimoonon, gabiyoye.
20Ta kashe ebin gaboochee tiyitona,
maacaa dookkahane.
21Tunebaani ebi ikke mooyon ta gabimmona,
ta gibeno andirehe.
22Ebiyoo bi ariqqo ciireyaano bi tunetoyich,
aalleyaanoon ebiich no beddeto
Doono Yeerichi shoodoona bi tunooniye.
23Bi ariqqo bi shoodoo maaddi maaddoona andiree beetone;
Doono Yeeri oogichii gibeneetone.
24Ta kashee, “Doono Yeeri ta qoodee iristo bi tunetoyich,
biin gibenemmi taane” iyan.
25Doono Yeeri,
biin gibenoona quyee beetinaꞌoyich,
bi waan wottee beetinaꞌoyichoo gaawetone.
26Asho cikkiꞌi Doono Yeerichi wodiyoon,
bi gibenegaata gaawiye.
27Busheebee iritee waanjoon shaago
ashich gaawetone.
28Doono Yeeri iritoon bi toommooch bi deebiyooba,
cikkimiree bi ikkeeto kotebe.
29Diqqich gibeno biich beeyemmo bi tunetoyich,
bi qelloon yittii hajjeebe.
30Bi gaakkoonoo tappemmoyich bekkiibe;
naaggoonoo miye.
31Doono bulli yemeenoon
dufaano bi tunetoyich,
32bi ayinikkiteenona
beshaa beshe bi shoodoona ariqqemmone.
33Mulloochee tiijjiꞌi,
ashi bushiishoon xuuxii ayinikkaanoone.
34Showoochaa qoppeenaꞌo bulli
baatee dechiich neexxee gaata,
35Beshoo Yeeri aafoochaa
ashi aalloo (gooroo) bokkegaata,
36ashi nalloo xummegaata,
Doono ebiyoommi mooyon beegaachehe?
37Doono daaggaanoon,
bi geto ceeno hakkemmo konine?
38Deꞌo tuneba gondo bi tunemmo
Beshoo Yeeri getigaata baach toone?
39Ishigaata kashoona beeti asho,
bi axaaxee naboona bi sheerehooba,
bi guruuxiibeeto amoyichiye?
40No gommon huushi boshebone;
Doono Yeer waan wottebone.
41No mulloon no kishoona tookki,
shimaayooch beeti Nuggishoo Yeer waan tiijjibone;
ishichishoo getone:
42“Xuqqeto noone;
hukkoon shuuneto noone;
newoo noon maaraano neene.
43“Kaaroona gufihine;
noon yookkaa dabbihine;
ariqqaalloonoo noon wuxihine.
44Corooto beshee gimon hakkaani quboona,
neen qerihine.
45 Aageteenaꞌo daggooch noon
guudoonaa hippaafoonon tuniihine.
46“No etteenaꞌo bulli no toommooch
noonoo keexeheete.
47Keqqoonaa dihoona, happeyoonaa aalloona
no toommooch shaggitone” getone.
48Ta asheenaꞌo aalloochee tiyitona,
ta aafo aacochoommon acimoon ukkiye.
49-50Doono Yeeri shimaayoochaa dugilla ciinnii,
bi beeggimmi wottoon,
ta acimo tooꞌaanoon ufemmone.
51Ta katemeexi maacheenaꞌochi toommooch
shaggiti mooyon ta ciinnemmona,
ta kasho caammehe.
52Naboo aalloon taach etto tunetinaꞌo,
kafoochoommon taan kambeheete.
53Kashoona ta beetaa taan oppooch duppiichii,
oppee noonooch xaqqoon keddeheete.
54Aaco taan qooxxiye;
tawoo “Aalleto taane!” iyoye.
55Oppee duchoochaa,
Doono Yeero, ne shigoon ceeggehoye.
56Ta qolloon waayehine;
gaachee danoyich ta cookaa
ne waamon badd wochaano neene.
57Neen ta ceegiyooba katinnehine;
taanoo “Shattaahine” iyine.
58Ta Doonocho! Ta qoodooch taggaꞌa
ta kashoon shiwehine.
59Ta Doono Yeero!
Ta toommooch shuuneeti gondoon beegiree,
ta taggoon nallibe!
60Boonoshi kichiibeeti nichoo bullin,
ta toommooch boonoshi koceeto bullin, beeggehine.
61Doono Yeero, boonoshi naagoon,
ta toommooch boonoshi koceyoo bullin, waayehine.
62Ta etteenaꞌo heeyo bullin,
ta toommooch shaashikkeebee boyeeheete.
63Koteechinoo tuneba neexeechi,
shoddoona taan boonoshi coonoon beege!
64Doono Yeero, boonoshi shuunoommon
boonoshich qoce!
65Boonoshi mulloon muumiibe;
ne ufo boonoshi toommooch shage.
66Doono Yeero, kaaroona boonoshin yoohi dabbibe;
shimaayoyee deshee boonoshin aalliibe.
Currently Selected:
Shoosho 3: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
