Shoosho 1
1
Yerusaalemi Toommooch Shaggiti Xuuxo
1Asho ceenniti katemee,
aabichaa shokko echahane!
Aagetee daggooch oogee,
aabichaa xuumee tunehane!
Woraafee daggooch taatee,
and aree gonnee tunehan.
2Xumoona oogichii eeppahan;
acimo bi gaakkoona gederehe;
bi shunechinaꞌo bulliichee,
biin goggiyemmo aallehe;
bi nuucheenaꞌo biin beshii immitinaꞌone;
biichoo ettoon tunetinaꞌone.
3Yihudee asheenaꞌo guuchittinoonaa xuuxoona beebee,
aroochee kecaa hammiyeete;
aageteenaꞌo daggooch koteheete;
aroochaa tooqqii kashoon mucceheete;
boonoshi etteetinaꞌo bulli,
xuuxeꞌi boonoshi beetaa daneheete.
4Baarooch woyemmo bi aalletoyich,
Tsiyooni gomminaꞌo muusheneheete;
kelleenaꞌo bulli qixeetinaꞌone;
qeesheenaꞌo gaashilliyeete;
maache bushiisheenaꞌo oogichii ayiniyeete;
Tsiyooni bi qelloona xuuxaa caammetine.
5Bi axaaxoo woddee naboona
Doono Yeeri biin xuuxiitoyich,
bi etteenaꞌo biin hajjiyeete;
bi etteenaꞌoyichoo kaamehe;
boonoshiyoo aaf gasheꞌi,
bi bushiisheenaꞌon keccii daammiyeete.
6Tsiyoonichi oogee yiiroo bulli biyee wokkitone;
bi iraasheenaꞌoo gaddoochee yookkeꞌi
shaaceti doolloon shaahitinaꞌone.
Boonoshin yookkii beetinaꞌo aafooch
giidoo qacheebee wocciyeete.
7Yerusaalemi bi xuuxee aabooba,
bi yallyallimee aabooboo,
wonnee bi oogoon gabiyan.
Yerusaalemi bi etteenaꞌo kishooch dihiyooba,
biin gaachemmo aallehooba,
bi etteenaꞌo bi dihoon beeggiꞌi diigii cooneheete.
8Yerusaalemi ooge axaaxoon shuunetine;
ebich eeꞌetine.
Shokkaachee bi tunoon boonoshi beeggitoyich,
biin oogii beetinaꞌo bulli hoxeheete;
biyoo gaashillahan;
qillifoon dichiyan.
9Bi eeꞌo bi qamisee toommooch bekkehe;
bi ciiro amo gaata ariyaaneene;
ebich gonde dihoon dihiyan;
biin goggiyemmonoo muccahan.
Biyoo “Doono Yeero, ta duꞌoon beege!
Etto taan kochii wochitone” iyan.
10Aaxxe bi qiico bullin,
etto hokkii daammiye;
ne iitee daggooch boonoshi giyaachemmoyich
ne bajjeti aageteenaꞌo,
bi yaafee duukkaanooch boonoshi giyaa, beeggahan.
11Bi asheenaꞌo bulli,
gaashilliibee koshon qaawiyeete;
boonoshi kashoon wochoyich,
aaxxe boonoshi gaannoon maayoona shaddiyeete.
“Coonee no itoyich Doono Yeero, noon gabibe;
noon ciine” iꞌi katemee asho cookiye.
12Yerusaalemiyoo ishichiyan: “Gommo besheebeeti asheenaꞌote,
Doono Yeerichi kupphe kaaree aabooba
duꞌoon ta toommooch deebiꞌi
taan bi xuuxiitoommi xuuxo bee ariihe?
Ebi ittoshi bullich kette mooyo shaahii beete?
Eke ebin manjii ciinote!
13“Dambee qaaqqoon ta toommooch bi kindiitaa,
ta shaawushooch beddaahaa michiye;
ta baatoyich shaachoon shaachiye;
taanoo gubb wochiye;
heeyo bullin ta aafoon shaawiiꞌi,
taan hulloo echiihe.
14“Ta axaaxoo, waanjoochoommon ta qettooch xandeetone;
bi kishoona ta qettooch haxxii xanditone.
Ta giidoo qajjemmoyich tuniihe;
ta etteenaꞌo kishooch Doono taan beshii immiꞌi,
boonoshi aafooch hakka guutoo taan tuniihe.
15“Doono, ta ginee anaaminaꞌo bullin duppiye;
ta gurimaasheenaꞌon buricoyich,
ta toommooch ginee naayinaꞌon kiciye;
oppoochaa woyinoon kotoommon
Doono Yihudee asheenaꞌon kotehe.
16“Ta eeppaabeeto,
ta aafoo acimoon qaphillii bi beeto,
taan goggiyemmo,
taan kupphiyemmoo, aalletoyichiye.
Ta etteenaꞌo sharitoyich,
ta bushiisheenaꞌo gitteheete” iyan.
17Tsiyooni bi kishoon yaggiyan;
tunebaani biin goggiyemmo aallehe;
Yaaqobichi yareenaꞌo toommooch,
bi giyeenaꞌo etto tunemmoyich, Doono Yeeri getoon beshiitone;
Yerusaalemi boonoshi daggooch eeꞌe mooyooch haddeetine.
18“Bi qaaroyich deꞌa getaane ta tunetoyich,
Doono Yeeri ebin tuniyoona cadiqoone.
Bulli asheenaꞌote, waayebote;
ta xuuxoonoo beegote;
ta gidiideenaꞌonaa ta gurimaasheenaꞌona
kecaa hammitinaꞌone.
19“Ta shunechinaꞌon ceeggehoye;
tunebaani boonoshi taan dawushiyeete;
ta qeesheenaꞌonaa showee geeneenaꞌona kashoona beemoyich,
maayoon qaawiibee katemoochaa qitiyeete.
20“Doono Yeero, ebi shaahoon ta xuuxoon ciine;
ta mullo tiishetone; ta maacoo qewetone;
ebiyoo oogichii hukkoon ta shuunetoyichiye;
gaddoochaa goraado guuriye;
kechi daggoochaanoo qitoo tunehe.
21“Asheenaꞌo ta gaashiron waayeheete;
tunebaani taan goggiito koniyoona aalloone;
ta etteenaꞌo ta xuuxoon waayeheete;
ne tuniiti mooyona emiriyeete.
Ne getteti aaboon boonoshi toommooch ne deebaa,
boonoshiyoo taan shaahibeete.
22“Boonoshi shuuneti gondo bulli ne waan bede;
ta axaaxee naboona
ta toommooch ne tuniitoommon
boonoshi toommoochoo tuniibe;
oogichaa gaashilleti taane;
ta mulloo doojjitone” iyan.
Currently Selected:
Shoosho 1: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
