Yoonaasi 4
4
Asheenaꞌoyich Doono Yeeri Ariqqetoyich Yoonaasi Ippo
1Yoonaasi ebi mooyona oogeton ayiniꞌi ippehe. 2Doono Yeer waan ishichiꞌi corootiye: “Doono Yeero, ta showooch beechaa, ta getteto ebin toone? Kaataꞌa Tarishesh maxxiya ta tiyeto, ebichiye. Ne, ariqqechonaa deꞌe Nuggishoona, kaaroyich nibbecho, wodde shoodechonaa maarechona, naxoon kindiyoochee qajjaa wottaabeetoo ne tunoon ariito taane.#Key. 34:6 3Andoo Doono Yeero, beemoyee qitoo taach gaaweto bi tunetoyich, ta kasheen ne daammemmoyich neen qollehoye” iye.#1 Taat. 19:4
4Doono Yeeriyoo “Ebich kaar beddenne?” iye.
5Aroochee Yoonaasi are katemoochaa aabi-keyo waan hammiꞌi kotehe. Arooch biich bashoon bashiꞌi, are katemee toommooch tunemmi mooyon bi beeggimmi wottoon, are bashee yiirooch kotehe.
6Arooba Nuggishoo Doono Yeeriyoo boto colle dici yiiroo tuneree, bi xuuxoochee biin bi kashiyemmoyich tuniihe. Yoonaasiyoo ebi botoyich oogeton emiriye. 7Tunebaani bi dechara maaddoona Yeeri hippereen deejjaa, botoon maahan; botoo shoolliye. 8Aabe kechemmona, Yeeri aabi-keyo waanee gaame yongoon deejjiye. Aabeyoo Yoonaasichi shimboon michaa kashooch qeechehe. Ebich qitiya qaatiꞌi, “Beemoyee qitoo taach gaawiye” iye.
9Tunebaani Yeeri Yoonaasich, “Ebi botoyich kaar beddenne?” iye.
Biyoo “Iberoon qitooch beddaahaa kaar beddoye” iye.
10Doono Yeeri biich ishichiye: “Ikke xumoon colleꞌi ikke xumoon aalleti, bi collemmoyich woyee bi diccemmoyich ne aayaani botoyich ebi shaahoon ayinito neene. 11Ishigaata, qannoonaa yoochoonon barbariiꞌi ariyaani, balli hiye humoyee beshiti asheenaꞌonaa meeti gijjeenaꞌona beeti, ebi ooge katemoo Nanawich ariqqi bedaachote?” iye.
Currently Selected:
Yoonaasi 4: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
