Yoꞌeeli 1
1
1Fetuꞌeelichi bushoo Yoꞌeelich waati Doono Yeerichi qaaro:
Gechoo Showoon Yexo
2Geeneenaꞌote, ebin waayebote!
Yihudee showooch beeti bulli asheenaꞌote, ebin ellebote!
Ittoshi yemeenooch tuneba ittoshi qaabbechinaꞌochi yemeenooch,
ebiyoommi mooyo tunee ariihe?
3Ebin ittoshi bushiisheenaꞌoyich getote!
Ittoshi bushiisheenaꞌoo boonoshi bushiisheenaꞌoyich geteete;
boonoshi bushiisheenaꞌoo gubbi shiijjeroyich geteete.
4Temicho#1:4 Temicho, shaattechi shaahe hipperoone. maataa echeti maayoon
shiwureebeeti gechoo maahe;
shiwureebeeti gechoo maataa echeton,
huggii aalliibeeti gechoo maahe;
huggii aalliibeeti gechoo maataa echeton,
gurimaashe gechoo maahe.
5Mashechinaꞌote, tiyi eefebote!
Woyinee uyoon uchii beetinaꞌote, kewi eefote!
Ebiyee gubb, ittoshi noonooch,
andire woyinee uyo shagaachemmone.
6Mattiqutte gechoo, no showoon tuqqitone;
ginee naayo womoommon giidoona waatone;
boonoshi gasho, daaheree gashoommone;
boonoshi gammo, maache daaherechoommone.#Yaaꞌo. 9:7-8
7No woyinee qomboon shokko echiiheete;
no balaasee mixinaꞌonoo kuxxii aalliiheete;
boonoshi ateenaꞌo naccemmi wottoon,
gorii kichiyeete.
8Biin shaagga maakkiiti bi keno qitaa,
dookoon tahaꞌa eeppaabeeti gidiidechoommon eefote!
9Maayi buuroonaa uyee deejjoona,
Doono Yeerichi yaafee kexoochee kuxetone;
Doono Yeeri aafooch maddeebeeti qeesheenaꞌo eefeheete.
10Maayo aalletoyich,
woyinee qomboo shuuqqitoyich,
zayitee mixoo shuuqqitoyich,
goyee budo shokko echetoyich,
showoo eefehe.
11Gochechinaꞌote, sheqoon, teepphoon,
maayo bullin qeco echetoyich, ayinibote!
Woyinee bechechinonaꞌote, ittoshiyoo eefote!
12Woyinee qomboonaa balaasee mixona shuuqqitone;
romaanoo, yeebbee mixo, appilo,
aafeebeeti mixo bulliyoo shuuqqii qititone;
ebich emiroo ashi waanee wokkitone.
13Maayi buuroonaa woyinee uyee deejjoona,
ittoshi Nuggishoochi yaafee kexoochee bi kuxetoyich,
qeesheenaꞌote, dookoon taheree eefote!
Deejjee gudee aafooch maddee beetinaꞌote, cooki eefote!
Ta Nuggishoochi maddechinaꞌote, dookoon tahe waaree qebote!
14Asho coomemmoyich awaajjibote!
Yaafeeti kiceyoon kicibote!
Geeneenaꞌonoo kicibote!
Yihudee asheenaꞌo bullin,
ittoshi Nuggishoo Doono Yeerichi yaafee kexooch kicibote!
Doono Yeer waanoo cookibote!
15Beshe Hakkechi Yeeri aalliyoon deebemmi,
Doono Yeerichi aabo shaggitone.
Ebi aaboyich woowo!#Isi. 13:6
16Maayo aafoona beegoyichona aalletone;
emiroonaa ililoona no Nuggishoochi yaafee kexoocheenoo ciroona aalletone.
17Maayi yaroo showoochaa qititone;
maayo aalletoyich,
maayi kicee kexinaꞌo shokkoon echetinaꞌone;
goteenaꞌoo tiishetinaꞌone.
18Boonoshi maayemmi mocoo aalletoyich
miiminaꞌo giiqqiyeete;
bageenaꞌoo shaaceꞌi shaawshaawimmiyeete.
19Qaaqqoo gaddeexi mocoon bi maatoyich,
shaareexi mixinaꞌonoo bi michitoyich,
Doono Yeero, ne waan cookiyoye.
20Aaco tahitoyich,
kubbi daggeexi mocoonoo qaaqqoo maatoyich,
kubbi cooxinaꞌona ne waan cookiyeete.
Currently Selected:
Yoꞌeeli 1: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
