Woraaferasheenaꞌo 5
5
Diiboorinaa Baraaqina Shoddeti Shoddo
1Arooba Diiboorinaa Abinoꞌami bushoo Baraaqina ishichiibeeti shoddoon shoddeheete:
2“Iraasheenaꞌo, Israꞌeelee showee daggoochaa,
boonoshi yaabii qeejjitoyich,
asheenaꞌoo daaggiꞌi boonoshi kashoon beshii boonoshi immitoyich,
Doono Yeeri galleteebe.
3“Taateenaꞌote, ebin waayebote.
Iraasheenaꞌote, ebin ellebote.
Doono Yeerich shoddemmi taane;
Israꞌeelee Nuggishoo Doono Yeerich keeremmi taane.
4“Doono Yeero, Seyiri guudi toommoochee ne waammona,
Edoomee showoochee ne kechemmona,
showoo shuuriye; shimaayoochee amiyoo dihiye;
quboocheenoo aaco kindiye.
5Guudinaꞌo Siini guudi Nuggishoo Doono Yeeri aafooch qeweheete;
Israꞌeelee Nuggishoo Doono Yeeri aafooch shuuriyeete.#Key. 19:18
6“Anaati bushoo Shamigaarichi yemeenooba,
Yaꞌeelichi yemeenooba gommo kuxehe;
gommechinaꞌo bare kaattoona hammiyeete.
7Diiboore, ne tiyemmi wottoon,
Israꞌeeleenaꞌoyich indee tunaꞌa ne tiyemmi wottoon,
katemooch beemo ciroona echetone.
8Dallaawe nuggisheenaꞌon Israꞌeeleenaꞌo shunnitoyich,
gino boonoshi kellooch shaggiye;
aabbe hume Israꞌeeleenaꞌo daggoochee,
ginoon woyee gaachoon yechiti ikke asholla aalloone.
9Ta mullo Israꞌeelee ginee iraasheenaꞌona tookkiiniye;
boonoshi kashoon daaggiꞌi immiti asheenaꞌona tookkiiniye.
Doono Yeeri galleteebe.
10“Nacce kureenaꞌon yebbee beetinaꞌote,
mashaamiti gilaashee toommooch kotee beetinaꞌote,
baatoona shaꞌee beetinaꞌote, ebin getote.
11Eke ellebote; aachi gashoochaa shoddeebeeti asheenaꞌo,
Doono Yeerichi wudoon gettii beetinaꞌone,
Israꞌeeleenaꞌochi wudoon gettii beetinaꞌone.
“Aroochee Doono Yeerichi asheenaꞌo katemee kellooch dugilla yixiyeete.
12Diiboore, qaallibe; qaallibe!
Qaallibe; shoddoon shoddebe; qaallibe!
Abinoꞌami bushoo Baraaqo, tibe!
Keccetinaꞌon dabbiiree daambe!
13“Aroochee echeti asheenaꞌo iraasheenaꞌo waan dugilla waaheete;
Doono Yeerichi asheenaꞌo koyoyich qanniꞌi, dugilla bi waan yixiyeete.
14Asheenaꞌo Efreemee showoochee bambooch waaheete;
Biiniyaami yoodoonaa bi asheenaꞌonon dabbiꞌi waaheete.
Makiri yaroochee ginee iraasheenaꞌo waaheete;
Zebulooni yoodoochee ginee iraashee gumboon yechii beetinaꞌo waaheete.
15Yisakoori yoodee iraasheenaꞌo Diiboorina tookkii waaheete;
Yisakoori yoodo Baraaqich gibeneeton tunehe;
boonoshiyoo bi hillooch dabbiyeete;
Roobeeli yoodee yareenaꞌo daggooch,
mullee barbarittino beehe.
16Bageenaꞌona tookkii gubb aakka echehote?
Qiddeenaꞌo bagoon ceeggiibeeti qaaroon waayeyaniye?
Roobeeli yoodee yareenaꞌo daggooch,
mullee barbarittino beetone.
17Gilaadee asheenaꞌo Yoordaanoosi aachee beqach echeheete;
Daani yoodo markabee daggooch yagiye.
Aseeri yoodo baharee gashooch kotehe;
markabo neexeebeeti xaaꞌee gaꞌooch kotehe.
18Zebulooni yoodo bi kashoon qitoyich beshiiꞌi immiye;
Nifitaali yoodo geppe showoochaa ebiyoommon bi kashoon beshiiꞌi immiye.
19“Megidee aachi gaꞌooch beeti Tanaaki katemoochaa,
taateenaꞌo waaꞌi koyeheete;
Kanaanee taateenaꞌo waaꞌi koyeheete;
tunebaani boonoshi keccii daammiti birewoo aalloone.
20Xojjeneenaꞌo shimaayoochaa koyeheete;
shimaayoona guuddiibee Siseerinaa bi ginee naayinaꞌonon kochiyeete.
21Qishooni aachi aayo boonoshin hidii daammiye;
giidechi Qishooni aaco boonoshin daammiye.
Ta kasheene, kuppheree qaxiribe!
22Aroochee giidechi haresheenaꞌo galabiibee waaheete;
boonoshi gommoona showoon koteebee waaheete.
23Doono Yeerichi maraakoo ‘Meroozi katemoon ufote!
Arooch beeti asheenaꞌonoo xogi ufote!
Ebiyoo Doono Yeerin gaachoyich giidechinaꞌon kocha,
ginee naayo tuneree biich gaacheya womon boonoshi qajjitoyichiye’ iye.
24“Qeenee asho Hebeeri mechee Yaꞌeeli,
maacheenaꞌo bulliyee beshoon diireetin tunebuye;
duukkaanooch beeti maacheenaꞌo bulliyee beshoon diireetin tunebuye.
25Aacon bi echetaa ejjoon immahane;
oogee qiicoona biich gurimoon giddiihane.
26Bi kishoona xogoon,
bi qanne kishoonoo shuunecho yechiibeeti modooshoon yechahan;
Siseerin yexxaꞌa bi qelli koofon (uuxon) buriccahan;
bi mallaalloon tiichaꞌa hottahan.
27Guppimiꞌi dihiye;
bi baatooch dihiꞌi yaryallehe;
bi baatooch guppimiꞌi dihiye;
ebi bi dihiti xaaꞌooch aroochaa qitiye.
28“Siseerichi indee mallee kelloona ciinnahan;
kechi aahoona cookaꞌa ceeggahan.
‘Amoyich bi gaari womon nibbehe?
Amoyich bi gaari haresheenaꞌo wotteyaanoon yagiyeete?’ iyan.
29Shalligechi genneenaꞌo biich wochiyeete;
biyoo bi qellich wochaꞌa ishichiyan:
30‘Kecceyemmi mooyon daneꞌi qoodeen toone boonoshi beeto?
Ikke maachee woyee guttee ikkikke ashich shaggemmine;
kecoochee qalemoona muureeti tahoon Siseerich,
kecoochee qalemoona muureechii bi toommooch shashiitaa shippeti tahoon,
qalemoona muureechii bi toommooch shashiitaa shippeti gutte tahoon
ta qettooch ta karemmoyich yechiꞌi toone bi waabeeto?’ iyan.
31“Doono Yeero, neen shixxii beetinaꞌo bulli ebiyoommon aallebeete;
neen shunnii beetinaꞌo maaddee aabee aaxxoommon aaxxebeete” iyeete.
Ebina aabbe nati wottoon showoo kashehe.
Currently Selected:
Woraaferasheenaꞌo 5: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.