Woraaferasheenaꞌo 10
10
Tooli Woraaferashoo Tuno
1Abimeleeki qititoyee gubb, Yisakoori yoodee asho tuneti, Doodi bushoochi bushoo, Fuꞌaahi bushoo Tooli Israꞌeeleenaꞌon wodiiya tiyiye. Biyoo geppechi Efreemee showooch beeti Shamiiri katemooch beehe. 2Tooli Israꞌeeleenaꞌon hiyaa keejje naton qeejjiichii qitiye; Shamiiri katemoochoo duukkehe.
Yaꞌiiri Woraaferashoo Tuno
3Tooliyee gubb, Gilaadee asho Yaꞌiiri tiyiye. Biyoo Israꞌeeleenaꞌon hiyaa gutte naton qeejjiye. 4Yaꞌiirich shaashe kureenaꞌon yebbeebeeti shaashe bushiisheenaꞌo beetinaꞌone. Boonoshichoo Gilaadee showooch shaashe katemeenaꞌo beetinaꞌone. Ebi katemeenaꞌo hanaach beddaahaa Yaꞌiirichi katemeenaꞌo getteeheete. 5Yaꞌiiriyoo qitiꞌi Qamooni katemooch duukkehe.
Yofitaahi Woraaferashoo Tuno
6Israꞌeeleenaꞌo wochinnoon Doono Yeeri aafooch axaaxoon shuuneheete. Baꞌaaleenaꞌonaa Ashitarooteenaꞌonoyich, wotta Sooriyee showee nuggisheenaꞌoyich, Sidoonee showee nuggisheenaꞌoyich, Moꞌabee showee nuggisheenaꞌoyich, Amoonee showee nuggisheenaꞌonaa Filsixeemee showee nuggisheenaꞌonoyich goyinnee maddeheete. Doono Yeerin qajjiꞌi biich goyinnee maddoon neechiyeete. 7Ebina Doono Yeeri kaaro boonoshi toommooch cufiye; biyoo boonoshin Filsixeemeenaꞌonaa Amooneenaꞌonochi kishooch beshiiꞌi immiye. 8Boonoshiyoo aroobee naton Israꞌeeleenaꞌon yiikkee neexxii hajjiyeete. Yoordaanoosi aachee beqach, Amooreenaꞌo showooch, ebiyoo Gilaadee showooch beeti Israꞌeeleenaꞌo bullin aaraa shimitte nati wottoon neexxii hajjiyeete. 9Amooneenaꞌo wotta Yihudee yoodoon, Biiniyaamee yoodoonaa Efreemee yoodoonon kocha Yoordaanoosin kimmiyeete. Ebina Israꞌeeleenaꞌo oogichii duꞌeheete.
10Aroochee Israꞌeeleenaꞌo “No Nuggishoo neen qajjaꞌa, Baꞌaaleenaꞌoyich goyinnaa maddaꞌa, axaaxoon shuunoona neen xuqqeto noone” iꞌi Doono Yeer waan cookiyeete.
11Doono Yeeriyoo Israꞌeeleenaꞌoyich ishichiye: “Gibitseenaꞌo, Amooreenaꞌo, Amooneenaꞌo, Filsixeemeenaꞌo, 12Sidooneenaꞌo, Amaleeqeenaꞌonaa Maꞌooneenaꞌona ittoshin duꞌiitaa, ta waan cookito ittoshine. Ittoshin boonoshi kishoochee wodiyaano taane? 13Tunebaani ittoshi taan qajjiichii, bare nuggisheenaꞌoyich goyinnee maddehote; ebich ta ebiyee damba ittoshin wodiyaachemmo taane. 14Ittoshich ittoshi kaacciti nuggisheenaꞌo waan hamiree, boonoshi waan cookibote. Eke ittoshi duꞌehooba, boonoshi ittoshin shiwe wodiibeete” iye.
15Tunebaani Israꞌeeleenaꞌo Doono Yeerin “No, axaaxoon shuuneto noone; no toommooch ne shunnemmon shuunebe; hiniichee baach noon wodiibe” iyeete. 16Aroochee dallaawe nuggisheenaꞌon boonoshi daggoochee wokkiichii, Doono Yeerich goyinnee maddeheete. Doono Yeeriyoo Israꞌeeleenaꞌochi duꞌoyich oogeton ayiniye.
17Aroochee Amooneenaꞌo koyoyich qanniꞌi, Gilaadee showooch kaamboon geddiꞌi koteheete. Israꞌeeleenaꞌo wotta ikkooch kiceeꞌi Mitsiphi katemooch kaamboon geddiꞌi koteheete. 18Gilaadee showee asheenaꞌochi iraasheenaꞌo boonoshinaa boonoshina “Aaf shiichiree Amooneenaꞌona tookki nooch koyiyemmo, konine? Aroo Gilaadee showee asheenaꞌo bulli toommooch iraashoo tunemmone” iyeete.
Currently Selected:
Woraaferasheenaꞌo 10: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
