Yaaqobi 2
2
“Heppiyaahote” Immi Shalligichoo
1Ta maneenaꞌote! Oogee yiirecho tuneti no Doono Yesuus Kiristoosi toommooch mulloon tooꞌiito ittoshine; ebich ashoon barbariiree heppiyaahote. 2Ikke asho aachee axxaamittoon bi kishooch geddii, aaxxe tahoon taheꞌi ittoshi kiceeti xaaꞌooch bi giyigaata, wotta ikke girecho keexe tahoon taheꞌi bi giyigaata, 3aaxxe tahoon taheton ciinniꞌi, “Ne hach waaree oogee xaaꞌooch kotebe” ittoshi getigaata, wotta ohe girechon “Ne okk ebiich neexebe” woyee “Desh ta baata kotebe” ittoshi getigaata, 4ittoshi daggooch barbarittinoon halliin toone ittoshi beeto? Gonde gaboona ashi toommooch nalliiniye ittoshi beeto.
5Ta shunnaabeeti ta maneenaꞌote! Ellebote! Kiristoosi toommooch mullee tooꞌiyoona gaannechinaꞌo boonoshi tunemmonaa biin shunnii beetinaꞌoyich bi gibenikkiti taatittinoon boonoshi woraashemmonoyich, Yeeri hini alemeexi girechinaꞌon kaacaanoone? 6Tunebaani ittoshi girechinaꞌon coonehote. Ittoshin xuqqii beetinaꞌo gaannechinaꞌo tooneenaꞌone? Nallee gabberee aafooch ittoshin geechii beetinaꞌo boonoshi tooneenaꞌone? 7Ittoshi ceekketi gaawe Kiristoosichi shigoon naaggii beetinaꞌo boonoshi tooneenaꞌone?
8 Yaafe Macaafoochaa “Neenoommi ne manoon neenna tachiree shune”#Lew. 19:18 ii beeti Taatoo Yeerichi sheeroon ittoshi ceechigaata, gaaweton shuuneebeeto ittoshine. 9Tunebaani ashi aafoon ciinniꞌi ittoshi heppi gaata, axaaxoon shuuneebeeto ittoshine; “Sheeroon shaaddeto ittoshine” getaa sheeroona ittibateyemmo ittoshine. 10Sheeroo bullin ceechiibee, tunebaani ikkeena muricciibeeto koniyoona bi tunegaata, sheeroo bullin shaaddetone getone. 11“Shunoon maayaahine”#Key. 20:14; Yibba. 5:18 iti Yeeri, wotta “Ashoon wuxiyaahine”#Key. 20:13; Yibba. 5:17 itone. Ebich shunee mamo qajjaachaa, ashoon ne wuxigaata, sheeroon shaaddeto neene.
12Axaaxoyich hajjeyoochee kichiibeeti sheeroona Yeeri nallemmi asheenaꞌochoommon getote; ebiyoommon shuunebote. 13Yeeri bi nallemmi aabooba ashoon maaraani ashi toommooch maaraalli nalloon nallemmone; maaroo nallee toommooch giidemmone.
Yeeri Toommooch Mullee Tooꞌiyoon Shuunoona Bekkiyoo
14Ta maneenaꞌote! “Ta mulloon Kiristoosi toommooch tooꞌiito taane” ii beeti asho, deꞌe shuunoona bekkiyaano bi tunegaata, amoon biich gaaccehe? Ebiyoommi mullee tooꞌiyoo biin wodiyehe? 15Kittinnoo tuneti bi manoo woyee bi manee boonoshi tahemmi tahoonaa boonoshi maayemmi maayoonon boonoshi muccegaata, 16ittoshi daggoochee ikkoo boonoshich qaawii beeton imon qajjiichii, “Diggoona hambote; ittoshi tahetaa qeece; maaree miyote” bi getigaata, amoon gaaccehe? 17Ebiyoommon shuunoyee bariti mullee tooꞌiyoo qititone.
18Tunebaani ikke asho “Neech mullee tooꞌiyoo beetone; taachoo shuunoo beetone” ii beeti asho bi beegaata, tawoo biich, “Eke ne mullee tooꞌiyoon shuunoyee bariiree bekkiibe; tawoo ta mullee tooꞌiyoon shuunoona bekkiyemmo taane” gettemmo taane. 19Yeeri ikkoo bi tunoon iberiibeeto neene; gaawiye! Yinneenaꞌolla wotta ebiyoommon iberii beetinaꞌone; qeweenoo beetinaꞌone.
20Hini mullaalloocho! Mullee tooꞌiyoo shuunaalloon duubo bi tunoon ariyoon qaawaa beetine? 21No qaabbechi Abrahami bi bushoo Yisaaqin deejjiya deejjee gudee toommooch bi giddiihooba, shuunoona cadiqito toone?#Hal. 22:1-14 22Bi mullee tooꞌiyoon shuunee toommooch heechiito bi tunoon beegaachine? Ebich bi shuuneti shuunoona bi mullee tooꞌiyoo shappaalli ceeno tunetone. 23Yaafe Macaafo “Abrahami mulloon Yeeri toommooch tooꞌiihe; ebi mullee tooꞌiyoo Yeeri aafoochaa biin cadiqiihe” bi ito ceennitone; biyoo Yeerichi shunecho getteetone.#Hal. 15:6; 2 Kiin. 20:7; Isi. 41:8 24Illa asho mullee tooꞌiyoona baach tuneyaanoon, are mullee tooꞌiyoon shuunee toommooch heechiyoona cadiqiibeeto bi tunoon beeggiibeeto ittoshine.
25Ebiyoommon wotta yahechi Rahaabi Yaasi wocheti asheenaꞌon bi kexooch giijjaa aachaꞌa, bare gommona boonoshi muriccemmoyich bi gaachehooba, bi shuuneti shuunoona cadiqitine.#Yaas. 2:1-21 26Kashoyee bariti meeno qitito bi tunoommon, ebiyoommon wotta shuunee toommooch heeyaani mullee tooꞌiyoo qititone.
SIM International, 2020.