Isiyaasi 7
7
Taatoo Akaazich Waati Wocho
1Uziyaahi bushoochi bushoo, Yotaamichi bushoo Akaazi Yihudee taatoo tuneꞌi beehooba, Sooriyee taatoo Resininaa Israꞌeelee taatoo Remaliyichi bushoo Feqaahina Yerusaalemin kocha kechiyeete; tunebaani kochii yeshon hakkaaneenaꞌone.#2 Taat. 16:5; 2 Kiin. 28:5-6
2Daawitichi yareenaꞌoyich, “Sooriyeenaꞌonaa Efreemichi yareenaꞌona guuphitinaꞌone” getaa getteehe. Ebich Akaazinaa bi asheenaꞌonochi mullo keqqoona, yongo shuurikkiibeeti kubbi mixon shaahiye. 3Doono Yeeriyoo Isiyaasich ishichiye: “Neennaa ne bushoo Sheꞌaar Yashuubina Akaazina danoyich qoredda machechochi budo waan daammiibeeti gommooch, damba qachi kote aachi bobbee gocooch keyote. 4Taatoo Akaazichoo ishichiree gete: ‘Neen ariibe; cikkibe; shattaahine. Ebi micciꞌi cufiibeeti gutte michi xugoomminaꞌo tuneti Sooriyee taatoo Resininaa Remaliyichi bushoonoyich ne mullo keqqaaye. 5Sooriyeenaꞌo, Efreeminaa Remaliyichi bushoona tookkii neen koyoyich ishichiꞌi koceetinaꞌone. 6“Damba keyiree, Yihudin koyi xuuxiiree yeshone. Xabeelichi bushoonoo arooch taatiibone” itinaꞌone. 7Ebich Nuggishoo Doono Yeeri ishichiye: Ebi boonoshi koceeti mooyo ciroona tuneyaachemmone. 8Sooriyeenaꞌochi shimbo Damaasiqine; Damaasiqi shimbo Resinine; Efreemiyoo shichaa uuche nati daggooch tiishemmone; ebiyee bekk aagetee showoo tuneyaachemmone. 9Efreemi shimbo Shamaarine; Shamaarichi shimbo Remaliyichi bushoone. Illa taan gibenoona kuppho ittoshi qayigaata, ciroona manjiree neexeyaachemmo ittoshine’ gete” iye.
10Wochinnoon Doono Yeeri Akaazich ishichiye: 11“Desh oppee hoonoochee woyee damba shimaayoochee malletoon ne Nuggishoo Doono Yeeri taan echebe” iye.
12Tunebaani Akaazi “Ta echeyaache; Doono Yeerinoo phireyaache” iye.
13Isiyaasiyoo ishichiye: “Daawitichi yareenaꞌote, waayebote. Ashoon ittoshi taahiito giishetaa wotta ta Nuggishoon taahiiya iyote? 14Ebich Doono Yeeri bi qelloona malletoon ittoshich immemmone. Ebiyoche gidiidee yeqqefemmine; anaami bushoonoo shiyemmine; bi shigoonoo Amanuꞌeeli#7:14 Amanuꞌeeli geto, “Yeeri noonna tookkiiniye” getone. getiree shigiyemmine.#Maat. 1:23 15Gondoon shixo, deꞌoon shuno bi hakkiyooba ejjoonaa eeyonon maayemmone. 16Tunebaani nallefoo gondoon shixo, deꞌoon shuno bi hakkoyee shiichiree ne shatteti gutte taateenaꞌo showoo ashaallo tunemmone. 17Efreemi Yihudiyee bi bariti aaboochee tiijjiꞌi ebiyee aaf tunee ariyaani gonde yemeenoon, Doono Yeeri neennaa ne asheenaꞌonochi toommooch, ne nihoochi yareenaꞌo toommoochoo deebemmone; ebiyoo Asooree taatoo womone” iye.
18Aroobee yemeenooch Doono Yeeri Abbaayi aachi gashoochee Gibitseenaꞌon yaammochoommon, Asooreenaꞌonoo boonoshi showoochee maxochoommon shennoona ceeggemmone. 19Boonoshiyoo waaree baraheexi bambooch, xaqqee gogginooch, angichi tushoo bulliich, miinji gaddo bulliichoo buundemminaꞌone.
20Aroobee yemeenooch Doono Yeeri aacoyee beqachee bi kiraayiti appoona, ebiyoo Asooree taatoona, ittoshi qelli eexonaa ittoshi baateexi eexonon, ittoshi ishaanoonoo caggemmone.
21Aroobee yemeenooch ikke ashich ikke gidereenaa gutte bagoona baach echemmone. 22Eboshi wodde ejjoon boonoshi immii beetoyich, asho ejjoon maayemmone; are showooch echeto bulliyoo ejjoonaa eeyonon maayemmone.
23Aroobee yemeenooch hume sheqeelee birewa bede, hume woyinee qomboo beeti budon guccinonaa angixona bullemmone. 24Showoo bullin guccinonaa angixona bulletoyich, asho cooxon wuxoyich, maꞌoonaa shangoonon yeshiree arooch hammemmone. 25Guccinonaa angixonon shatiree, kootteroona gocheebee echeti geppeenaꞌo bulliich koniyoona hamaachemmone; miimonaa bageenaꞌonochi kuppee budon tunemmone.
SIM International, 2020.