Isiyaasi 63
63
Yeerichi Wudoonaa Wodiyoonochi Aabo
1Edoomee showooch beeti Botsiri katemoochee ceelle tahoon taheꞌi ebi waabeeto konine? Oogoon taheto, bi giidoona shaaddeebee waabeeto ebi konine? “Cadiqo, giidechi Wodiyecho tuneti, taane.”
2Oppoochaa woyinoon hiiccii beetochoommon ne taho amoyich ceellehe?
3“Ta ikkeeto baach oppoochaa woyinoon neexxoye; ashoochee koniyoona taanna tookkii aalloone; ta kaaroona boonoshin neexxoye; ta naxoona boonoshin yiikkehoye; boonoshi damoo ta tahooch wuceehe; ta taho bullinoo wooriihoye.#Yaaꞌo. 14:20; 19:13,15 4Nichoo kichee aaboon maacceto taane; ta biishemmi aabo shaggitone. 5Ciinnehoye; tunebaani gaachemmo koniyoona aallehe; deggemmo aalletoyich taan worganikkiye; ebich ta hajjee mochoo taach wodoon daniihe; ta kaaroo taan deggiye.#Isi. 59:16 6Ta kaaroona asheenaꞌon neexxoye; ta naxoonoo mashiihoye; boonoshi damoonoo showooch ukkiyoye” iye.
Yeeri Israꞌeeleenaꞌoyich Ariqqo
7Doono Yeerichi shoodoon,
Doono Yeerichi galletoon,
Doono Yeeri nooch tuniito bullin,
bi ariqqoon, oogeti bi shoodoonoo,
Israꞌeeleenaꞌoyich bi deeti deꞌoon, gettemmo taane.
8Doono Yeeri ishichiye “Iberoochaa boonoshi ta asheenaꞌo, taach kootaachemmi ta bushiisheenaꞌone” iye; boonoshichoo Wodiyechon tunehe. 9Boonoshi xuuxoona xuuxehe; bi aafeexi maraakoo boonoshin wodiihe; bi shunoona, bi ariqqoonoo boonoshin biishehe; wonnee yemeeno bullin boonoshin tiijjii shaaggiye. 10Tunebaani boonoshi bi toommooch hukkoon shuuneꞌi bi Yaafe Ayaanoon ayinikkiyeete; ebich wotteꞌi boonoshich ettoon tunehe; bi qelloona bi, boonoshin kochiye.
11Aroochee asheenaꞌo Muusichi wonnee yemeenoon, gabiyeete; boonoshiyoo “Bi bageenaꞌochi qiddeenaꞌona tookkii boonoshin baharoochee kichito aaye? Bi Yaafe Ayaanoon boonoshi daggooch kotiito aaye? 12Ooge bi mochoon Muusichi qanne kishee toommooch tuniito, bi shigo bulli yemeenoon bi arichemmoyich baharoon boonoshi aafooch qoodito,#Key. 14:21 13aachi dechi duchoona boonoshin yaabito aaye?” iyeete. Boonoshiyoo barahooch beeti hareshoochoommon tepheyaanoon besheheete. 14Mocoo maaya bambooch kindiibeeti miimo tooꞌoommon Doono Yeerichi Ayaano boonoshin tooꞌiihe; bi shigoon oogiyoyicha iꞌi bi asheenaꞌon yaabiye.
Ariqqoonaa Gaachoonon Danoyich Corooteeti Corooto
15Doono Yeero, yaafoonaa oogee yiirechona tuneti ne beeyi xaaꞌoo, shimaayoochaa dugilla ciine; ne qanaatoonaa ne giidoona aaye? Noon ne sharaatoonaa ne ariqqoona noyee wokkitone. 16Abrahami noon ariyoo bi qajjitaa, Yaaqobi noon shalligoo bi qajjitaa, ne nooch Nihoo neene; Doono Yeero, ne nooch Nihoo neene; wonna beddaahaa noon Biishecho ne shigoone. 17Doono Yeero, ne gommoochee no kechemmoyich amoyich tuniinne? Neen no shataachemmoyich no mulloon amoyich muumiinne? Ne guuninaꞌoyicha getiree, ne hajjoo tuneti yoodeenaꞌoyicha getiree, no waan wottebe.
18Giisheche aaboyich yaafeeti ne asheenaꞌo yaafeeti ne xaaꞌoon hajjitinaꞌone; tunebaani and no etteenaꞌo aroon koteheete. 19Nowoo, neech hajjeyaani, ne shigoonoo ceekkeyaani ashoommon tuneto noone.
SIM International, 2020.