Isiyaasi 3
3
Yerusaaleminaa Yihudee Showoonooch Kindemmi Nalloo
1Ebiyoche, Doono, Beshe Mawe Doono Yeeri, asheenaꞌochi degoonaa gaachoonon, maayi dego bullinaa aachi dego bullinon Yerusaaleminaa Yihudinoochee aalliyemmone. 2Boonoshi ginee anaaminaꞌonaa ginee naayinaꞌonon, nallechinaꞌonaa keemechinaꞌonon, qaaxechinaꞌonaa geeneenaꞌonon, 3aache ginee iraasheenaꞌonaa moogeetinaꞌonon, mikkirechinaꞌonaa kishee shuunee ariyechinaꞌonon, iicechinaꞌonoo aalliyemmone. 4Bushiisheenaꞌon boonoshi toommooch ukkiriyemmone; nallefeenaꞌo boonoshin hajjemminaꞌone. 5Asho biinnaa biinna ikkoo baroon neexi hajjemmone; asho bulli bi nuuchoo toommooch, asho bulli biinoommi bi manoo toommooch tiyemmone; bushoo oogoon hoxemmone; gaacaalli asho moogeeti ashi toommooch tiyemmone.
6Asho bi nihoo kexoochee, ikke bi manoon yeshiree, “Neech taho beetone; noon, hini happeeti xaqqee gutoonoo qeejjibe” gettemmone.
7Tunebaani arooba aroo bi qaaroon oogichiree, “Ta, guuccii wodiyechon tunoon hakkaache; ta kexooch maayoonaa tahoona aalloone; taan ashi toommooch ukkiriyaahote” gettemmone.
8Yerusaalemi tattellaa beetine; Yihudee showoo tiishee beetone; ebiyoo asheenaꞌochi yibbaatoo tuneba boonoshi shuunoo Doono Yeerin ippiibeeto bi tunetoyichiye; bi oogoonoo qallayitinaꞌone. 9Boonoshi aafoochee bekkeebeeti mooyo boonoshi toommooch miixee beetone; boonoshi axaaxoon aachaanoon, Sodoomee asheenaꞌochoommon axaaxoon xalla shuunee beetinaꞌone; boonoshi toommooch gonde mooyon boonoshi deebii beetoyich boonoshich woowo!
10Cadiqeenaꞌoyich, “Mooyo ittoshich kaamemmo bi tunetoyich, ittoshi shuunee aafoon maayemmo ittoshine” gete. 11Boonoshi shuunetoommo boonoshich shuuneyemmo bi tunetoyich xuꞌechinaꞌoyich woowo! Aallo boonoshich woyemmone.
12Ta asheenaꞌon, bushiisheenaꞌo neexxii hajjiyeete; maacheenaꞌoo boonoshi toommooch ukkireheete. Ta asheenaꞌote, ittoshi ukkireenaꞌo ittoshin muriciitinaꞌone; gommoochee ittoshin badd wochitinaꞌone.
13Doono Yeeri bi nallee gabberooch kotetone; bi asheenaꞌo toommoochoo nalliya tiyitone. 14Doono Yeeri ogoogeenaꞌonaa asheenaꞌochi iraasheenaꞌona tookki ishichi taggemmone; “Woyinee goyoon aalliito ittoshine; girechinaꞌo waanee ittoshi boggito ittoshi kexooch ceennitone. 15Ta asheenaꞌon ittoshi yiikkeebeeto, girechinaꞌo aafoon ittoshi tulliibeeto amoyichiye?” iye Beshe Mawe Nuggishoo Doono Yeeri.
16Doono Yeeri ishichiye: “Tsiyooni maache bushiisheenaꞌo#3:16 Yerusaalem beeti maacheenaꞌoniye bi bekkiibeeto. geecitinaꞌone; boonoshi qettimixon ciixxiibee, boonoshi aafoona xayishiibee shaꞌee beetinaꞌone; xeeqqeshee shaꞌeebee, boonoshi baateexi allubboon qaadii beetinaꞌone. 17Ebich Doono Yeeri Tsiyooni maache bushiisheenaꞌochi qello xoremmoyich tuniyemmone; Doono Yeeri boonoshi maache achoon shokko echiyemmone” iye.
18Arooba Doono Yeeri boonoshi baatooch geddeebeeti shashoon, qelli kaafoon, batti keyi ageneen shaahiibeeti boonoshi qetteexi shashoon, 19waajji gudichoon, kishee shagaamoon, aafee oppoon, 20qelli shashoon, zaaboon, buroon, shittee firqaadoon, xifetoon, 21kishee axxaammitoonaa muddee axxaammitoonon, 22nati baarooba taheebeeti tahoon, maac taheebeeti tahoon, toommooch taheebeeti tahoon, kishooch yecheebeeti boorsoon, 23heeraawoon, muttee tuppoochee shippeti tahoon, qelli caacoon, aafee qeroonoo tiijji daammemmone.
24Shittee qoodoon shaaꞌo, buree qoodoon woderoo, gaawichaa shippeti qelli qoodoon xoroo, macecikkiti tahee qoodoon dooko, malletee qoodoon bano tunemmone.
25Ittoshi asheenaꞌo goraadoona, ittoshi ginee anaaminaꞌoo koyoochaa dihemminaꞌone. 26Yerusaalemi kelleenaꞌo muushenemminaꞌone; eeppemminaꞌone; katemeyoo shokko echaꞌa showooch koteti ureen shaahemmine.
Currently Selected:
Isiyaasi 3: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.