Isiyaasi 26
26
Doono Yeerin Shoddoona Galleto
1Arooba ebi shoddo Yihudee showoochaa ishichaa shoddeyemmone:
“Mishigechi katemoo nooch beetone;
Yeerichi wodiyoo, xaqqee uxeroonaa mishigoonon nooch tunetone.
2Gibeneeti, cadiqe aageteenaꞌo giyemmoyich,
katemee kelleenaꞌon qechibote.
3Neen bi gibenetoyich,
neenna degeyaabeeti kasheen,
diggoona quyemmo neene.
4Bulli yemeenooch Doono Yeerin gibenebote.
Nuggishoo Doono Yeeri,
nooch bulli yemeenee deebe xaqqoone.
5Geecechinaꞌon giishiyemmone;
coonniti katemoon cooniyemmone;
happiree, buttoon tuniyemmone;
6girechinaꞌo baatoona neexxemminaꞌone;
gichechinaꞌoo kotemminaꞌone” getteyemmone.
7Cadiqeenaꞌochi gommo naqqoone.
Kaamoocho, cadiqeenaꞌochi boochoon tachihine.
8Doono Yeero, ne sheeroon quyoona neen gibenehone;
no mullee qaatoo, ne shigoon aricheto tuniyoone.
9Ta kashe xumo bullin neen sharaatehane;
ta ayaano neen qaawiye;
ne dayinneto showee toommooch bi tunehooba,
showee toommooch beetinaꞌo cadiqo tunoon doyemminaꞌone.
10Gonde asho gaawe aafoona bi ciichetaanona,
cadiqoon doyaache;
kaameenaꞌo showoochaanolla,
gonde mooyon tuniihe;
Doono Yeerichi oogoon shalligaache.
11Doono Yeero, ne mochoo kaama tiyitone;
tunebaani ne etteenaꞌo beegaaneenaꞌone.
Ne asheenaꞌoyich am shaahoon ne qanaataabeeto gaata,
ciiniree yeellebeete;
boonoshich ne qanniiti qaaqqoo, ne etteenaꞌon mame.#Hib. 10:27
12Doono Yeero, diggoon nooch immeto neene;
no shuunoo bullin nooch kaachito neene.
13No Nuggishoo Doono Yeero,
neyee bare dooninaꞌo noon hajjitinaꞌone;
tunebaani no, ne shigoon baach oogiihone.
14Areenaꞌo qititinaꞌone; wotteree kashoona beetaachemminaꞌone;
aalletinaꞌone; guttinnoon tiyaachemminaꞌone;
boonoshin naxaꞌa aalliito neene;
boonoshi shalligichoon hidaa aalliito neene.
15Doono Yeero, ne aagetee asho meettemmoyich tuniihine;
ne aagetee ashoon meechihine;
ebina newoo oogoon danehine;
showee daaroonoo gamichito neene.
16Doono Yeero, ne asheenaꞌo boonoshi xuuxehooba neen qaawiyeete;
boonoshin ne sheeriyooboo shaashikkoona ne waan corootiyeete.
17Doono Yeero, yeqqefechi shiy beddaꞌa,
maaxoo manjaa bi cookoommon,
nowoo ne aafooch ebiyoommon tuneto noone.
18Yeqqefechi maachechoommon maaxoo manjeto noone;
yongoon shiyeto noone;
showee toommooch wodoon deebaano noone;
showee toommooch shiijjaa shiijjereyaanoo noone.
19Qititi ne asheenaꞌo kashechinaꞌon tunemminaꞌone;
boonoshi dubeno qitoochee tiyemmone;
showee daggooch beetinaꞌote, tibote; emiroonoo shoddebote.
Wacciibeeti keetoo showoon bi shuxiyoommon,
qitii yagitinaꞌo tiyiree, kashoona beeyemmoyich
Doono Yeeri tuniyemmone.#Daan. 12:2
20Ta asheenaꞌote, wobote;
ittoshi kexi kexooch giyiichi ittoshi toommooch shaaqqoon hicote;
Yeeri kaaro beshemmi wottoon,
giisheche aaboon ittoshi qelloon aachibote.
21Showee toommooch beeti asheenaꞌon,
boonoshi axaaxoyich naxeya,
Doono Yeeri bi xaaꞌoochee woyemmone;
showoo bi toommooch ufeti damoon kichemmone;
bi toommoochaa wuxeetinaꞌon aachaachemmone.
SIM International, 2020.