Isiyaasi 2
2
Bulli Yemeenoon Beeyemmi Diggoo
(Mikiyaasi 4:1-3)
1Amootsi bushoo Isiyaasi Yihudee showeechonaa Yerusaalemichonon bi beeggito ebine:
2Ciiree yemeenooba,
Doono Yeerichi yaafee kexo beeti guudo,
guudinaꞌo bulliyee beshiree bekkemmone;
geppeenaꞌo toommooch qaalli bekkemmone;
aageteenaꞌo bulli arooch orihe woyemminaꞌone.
3Meeti asheenaꞌo waaree ishichemminaꞌone:
“Sheeroo Tsiyoonee,
Doono Yeerichi qaaroo Yerusaalemee bi kechii beetoyich,
ittoshi waataa damba Doono Yeerichi guudooch,
Yaaqobichi Nuggishoo yaafee kexooch hambone.
Biyoo, bi gommon nooch dojjemmone;
nowoo, bi bekkiiti boochoona hammemmo noone” gettemminaꞌone.
4Biyoo aageteenaꞌo daggooch nalliree,
meeti asheenaꞌo daggooch beeti kaaroon aalliyemmone;
boonoshiyoo, boonoshi goraadoon maaneshooch,
boonoshi ginoonoo magaadooch wochiree qiccemminaꞌone.
Ikke aagetoo bi goraadoon tiijjiree bare aagetoona koyeyaachemmone;#Yoꞌeel. 3:10
aroyee gubb, ginee koyoon doyaachemminaꞌone.
5Yaaqobichi yareenaꞌote,
ittoshi waataa,
Doono Yeerichi bekkoona shaꞌebone.
Getaa Giyaaneenaꞌochi Aallo
6Yaaqobi yareenaꞌo tuneti ne asheenaꞌon qajjeto neene; ebiyoo showoo aabi-keyo waani asheenaꞌochi qaaxoona, Filsixeemeenaꞌochi iicoonoo bi ceennitoyichiye; asheenaꞌoo dallaaweenaꞌona tookkii guuphitinaꞌone. 7Boonoshi showoo birewoonaa aachoona ceennitone; boonoshi gaanno haddoyee beshitone; boonoshi showooch hareshoo ceennitone; boonoshi gaariyoo haddoyee damboone. 8Boonoshi showooch shahalleenaꞌo ceennitinaꞌone; boonoshi hajjee kishoona boonoshi shuuneti mooyinaꞌoyich goyinneheete.
9Ebina asho bulli giisheree cooneyemmone. Boonoshin maariyaahine.
10Doono Yeerichi shattiyoonaa bi oogee yiiroonoochee tiyitona xaqqee gofooch, showee daggooch aashebote.#Yaaꞌo. 6:15 11Cooddiibeeti asho giishemmone; geecechi asheenaꞌoo yittemminaꞌone; arooba Doono Yeeri baach oogemmone. 12Beshe Mawe Doono Yeeri, geecechinaꞌo bullinaa cooddii beetinaꞌo bullinon, ciixee beetinaꞌo bullinoo bi cooniyemmi aabo beetone. 13Genjoonaa beshii bekkee beetona tuneti Libanoosee yigee mixinaꞌo bullin, Bashaanee showeexi meelleenaꞌo bullin, 14ogooge guudinaꞌo bullin, qaallii bekkeebeeti geppeenaꞌo bullin, 15genje dilaaleenaꞌo bullin, manje xaqqee uxereenaꞌo bullin, 16Tarisheshi markabeenaꞌo bullinaa mallet gaawe aachi gooneenaꞌo bullinon bi aalliyemmi aabo beetone. 17Ashi coodo kindemmone; asheenaꞌochi geecoo giishemmone. Arooba Doono Yeeri baach oogemmone. 18Shahalleenaꞌo ciroona aallemminaꞌone.
19Doono Yeeri showoon shuurikkiya bi tiyiyooba, bi shattiyoonaa bi oogee yiiroonoochee tiyitona asheenaꞌo xaqqee gogginonaa showee oppoonooch giyemminaꞌone. 20Arooba asheenaꞌo, goyinneya boonoshi shuuneti birewoonaa aachoonoochee shuuneeti shahalleenaꞌon, ecceenaꞌonaa shakishakeenaꞌonoyich duppemminaꞌone. 21Doono Yeeri showoon shuurikkiya bi tiyiyooba, bi shattiyoonaa bi oogee yiiroonoochee tiyitona asheenaꞌo xaqqee gofoonaa gogginonooch giyemminaꞌone.
22Bi hiinno muddooch beeti ashoon gibeneyaahote; aroo amoyichona gaacaachemmone.
Currently Selected:
Isiyaasi 2: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.