Halloo 46
46
Yaaqobinaa Bi Kechi Asheenaꞌona Gibits Hamo
1Israꞌeeliyoo biich beeto bullin kicii yechiꞌi, tiyii hammiye. Beershaab shaggiꞌi, deejjoon bi nihoo Yisaaqichi Nuggishoyich deejjiye.
2Yeeri yaaꞌoona Israꞌeelich xum bekkeꞌi, “Yaaqobo, Yaaqobo” iye.
Biyoo eekkehe.
3Yeeriyoo biich ishichiye: “Ta ne nihoo Nuggishoo taane. Desh Gibits kindoyich shattaahine. Aroochaa meeti ashechi aagetoon neen tuniyemmo taane. 4Neenna tookki Gibits kindemmo taane; aroochee wochiree ne shiijjereenaꞌon kichemmo taane. Halla bi alla neen guuccemmo Yooseefine” iye.
5Ebin Yeeri biich gettitoyee gubb, Yaaqobi Beershaabee tiyiye. Israꞌeelichi anaami bushiisheenaꞌo boonoshi nihoo Yaaqobin, boonoshi bushiishoonaa boonoshi mecheenaꞌonon Farooni deejjiti ogooge gaarinaꞌooch yebbiiheete. 6Boonoshi gijjeenaꞌonaa Kanaanee showoochee boonoshi daneto bullinon yechiꞌi, Yaaqobinaa bi kechi asheenaꞌo bullina Gibitsee showooch waaheete. 7Yaaqobi Gibits bi kindito, bi shiijjereenaꞌo bullin, eboshiyoo bi anaami bushiishoonaa bi maache bushiishoonon, bi anaami bushiishoochi anaami bushiishoonaa maache bushiishoonon yechiꞌiniye.
8Gibits hammiti Israꞌeelichi bushiisheenaꞌo, Yaaqobichi shiijjereenaꞌo: Yaaqobichi gutenee bushoo Roobeeli; 9Roobeelichi anaami bushiishoo: Hanooki, Faali, Hetsirooninaa Kariminane. 10Simooninaa bi anaami bushiishoo: Yemuꞌeeli, Yamiini, Ohaadi, Yakiini, Tsohaarinaa Kanaanee ashe waanee shiijjeti Shaawullinane. 11Lewinaa bi anaami bushiishoo: Gerishooni, Qohaatinaa Meraarinane. 12Yihudinaa bi anaami bushiishoo: Eeri, Onaani, Seeli, Feretsinaa Zaarinane; tunetaa Eerinaa Onaanina Kanaanee showooch beebee qititinaꞌone. Feretsi bushiishoo: Hetsirooninaa Hamuulinane. 13Yisakoorinaa bi anaami bushiishoo: Tooli, Fuꞌaahi, Yashuubinaa Shimirooninane. 14Zebulooninaa bi anaami bushiishoo: Sereedi, Elooninaa Yahileelinane. 15Ebi anaami bushiisheenaꞌo Yaaqobi Mesopotaamee showooch bi beetaa, bi mechee Liy waanee shiijjetinaꞌone. Maache boonoshi bushee Diinin daakkiꞌi anaami bushiishoonaa maache bushiishoonochi haddoo bulli shaashaa keemone.
16Gaadinaa bi anaami bushiishoo: Tsefooni, Haggi, Shuuni, Ezibooni, Eriyi, Aroddinaa Areelinane. 17Aseerinaa bi anaami bushiishoo: Yimini, Yishiwaahi, Yishiwinaa Beeriyinane. Boonoshi manee Seerine. Beeriyichi anaami bushiishoo: Hebeerinaa Malikelinane. 18Ebi aaraa shiritte bushiisheenaꞌo bulli, Labaani bi bushee Liyich bi immiti Zilif waanee Yaaqobi shiyitinaꞌone.
19Yaaqobi mechee Raaheelichi anaami bushiishoo: Yooseefinaa Biiniyaaminane. 20Yooseefi Gibitsee showoochaa, Heliyooti katemeexi qeeshoo Phoxifeeri bushee Asenaat waanee Minaasinaa Efreeminon shiyihe. 21Biiniyaamichi anaami bushiishoo: Belaahi, Bekeeri, Ashibeeli, Geeri, Naꞌimaani, Eehi, Rooshi, Mufiimi, Hufiiminaa Ariddinane. 22Eboshi aaraa awudde anaami bushiishoo bulli Raaheeli Yaaqobich bi shiyeti anaami bushiishoonaa boonoshi bushiishoonane.
23Daaninaa bi anaami bushoo: Hushiiminane. 24Nifitaalinaa bi anaami bushiishoo: Yahitseeli, Guuni, Yetseerinaa Shileeminane. 25Eboshi shabaatte anaami bushiisheenaꞌo bulli, Labaani bi bushee Raaheelich bi immiti Biil waanee Yaaqobi shiyitinaꞌone.
26Yaaqobina tookkii Gibits hammiti, bi shiijjereenaꞌochi haddoo shichaa shirittoo tunemmona, ebi haddoo bi bushiishoochi mecheenaꞌon daakkaanooniye. 27Yooseefi Gibitsaa bi shiyiti gutte bushiishoon daakkiꞌi, Gibits giyiti, Yaaqobi kechi asheenaꞌo haddoo shaboone.
Yaaqobinaa Bi Kechi Asheenaꞌona Gibits Shago
28Gooshenaa boonoshina bi danemmoyich, Yaaqobi Yihudin shiichii Yooseef waan wochee daachiihe. Gooshen boonoshi shaggimmona, 29Yooseefi bi nihoona danoyich bi gaarina arooch hammiye. Yooseefiyoo bi nihoo waan shaggiꞌi, qettoona tiqqee genje saatoon eeppiye. 30Israꞌeeliyoo Yooseefich “Kashoona ne beetaa ta beeggetoyich, illa and ta qititaanona aaxxiyaache” iye.
31Ebiyee gubb, Yooseefi bi maneenaꞌonaa bi nihoo kechi asheenaꞌonoyich ishichiye: “Ta and hamiree Faroonich ishichi gettemmo taane: ‘Kanaanee showooch beeti ta maneenaꞌonaa ta nihoo kechi asheenaꞌo bullina ta waan waatinaꞌone. 32Boonoshiyoo gijjee shiijjechinaꞌo boonoshi tunetoyich, qiddeenaꞌone. Boonoshi bageenaꞌonaa emmisheenaꞌonon, boonoshi miiminaꞌonoo, ebiyoommon wotta boonoshich beeto bullin yechiꞌiniye boonoshi waato’ gettemmo taane. 33Farooni ittoshin ceekkiiꞌi, ‘Ittoshi shuunoo amoone?’ ii bi echegaata, 34ittoshiyoo ‘Ne guuno no shuunoo bushittinoochee tiijjiꞌi, no qaabbechinaꞌochoommon gijjee shiijjoone’ getiree wochibote. Ebina Gibitsee asheenaꞌo gijjee shiijjechinaꞌon eeꞌeenaꞌo tunii boonoshi ciinnii beetoyich, Gooshen ittoshi beeyemmoyich daaggemmone” iye.
Currently Selected:
Halloo 46: KBRC
Highlight
Share
Compare
Copy
Want to have your highlights saved across all your devices? Sign up or sign in
SIM International, 2020.
