Halloo 37

Yooseefinaa Bi Maneenaꞌonochi Mooyo

1Yaaqobi ebiyee aaf bi nihoo beebee echeti Kanaanee showooch kotehe.

2Yaaqobi kechi asheenaꞌo mooyo ebine.

Yooseefi aaraa shabaatte nati bushoo bi beehooba, bi nihoochi naamacheenaꞌo Biilinaa Zilifina waanee shiijjeti bi maneenaꞌona tookkii bi nihoochi bageenaꞌonaa emmisheenaꞌonon quyee beehe. Biyoo bi maneenaꞌo tuniiti gonde mooyon bi nihoyich gettiye.

3Israꞌeeliyoo geenoochaa bi shiyiti bushoo bi tunetoyich, Yooseefin bare bi bushiishoo bulliyee beshiiꞌi shunniye. Mallet gaawe, kisha genje kittoon biich kochii tajjiye. 4Boonoshi nihoo Yooseefin boonoshiyee beshoon bi shunon bi maneenaꞌo beeggiꞌi, Yooseefin shixxiyeete. Gaawe noonoona biinna tookkii yibbaato qajjiyeete.

5Ikke areddoon Yooseefi gumon gummiye. Bi maneenaꞌoyich bi maacaa, aafichoyee beshoon biin shixxiyeete. 6Biyoo ishichiye: “Ta gummeti gumon ta maacaa waayebote. 7No bulli budoochaa teepphoon qiraa beehone. Ta qiriti qiroo gellimmii neexehe; ittoshi qiriti qireenaꞌo taachochi guudoona neexeechii, biich goyinneheete” iye.

8Bi maneenaꞌoo “Iberoon no toommooch taateree noon hajjiyane ne gabaabeeto?” iyeete. Bi gumichonaa bi gettiti mooyochonoyich aafichoyee beshoon biin shixxiyeete.

9Wochinnoon bare gumon gummiye. Bi maneenaꞌoyich ishichii maacciye: “Wotta bare gumon gummoye. Aabe, ageneenaa aaraa ikke xojjeneenaꞌona taach goyinnee beetaa beeggoye” iye.

10Ebi bi gumon wotta bi nihoyich bi maacee, bi nihoo “Ebi ama geti gumone? Iberoon taannaa ne indeena, ne maneenaꞌoo ne aafooch yitiree neech goyinnehone?” ii kaarehe. 11Bi maneenaꞌo biin qanaateheete; tunebaani bi nihoo ebi mooyon bi maacoona yechiye.

Bi Maneenaꞌo Yooseefin Kemo

12Ebiyee gubb, Yooseefichi maneenaꞌo boonoshi nihoochi bageenaꞌonaa emmisheenaꞌonon quyoyich Shekeemi gaꞌooch hammiyeete. 13Israꞌeeliyoo Yooseefich ishichiye: “Ne maneenaꞌo bageenaꞌonaa emmisheenaꞌonon Shekeemi gaꞌooch quyee beetinaꞌone. Ebich ne waataa boonoshi waan neen wochebona” iye.

Yooseefiyoo deꞌa iye.

14Yaaqobiyoo Yooseefin “Hamiree ne maneenaꞌonaa boonoshi quyeebeeti gijjeenaꞌonochi diggoon beegiree wobe” ii Kebirooni bamboochee wochee daachiihe.

Yooseefiyoo Shekeem hammii shaggiye. 15Gaddooch okk hach wottee guuddii bi beetaa, ikke uro biin beeggiꞌi, “Amooniye ne qaawaabeeto?” ii echehe.

16Biyoo “Ta maneenaꞌoniye ta qaawaabeeto; boonoshi bageenaꞌonaa emmisheenaꞌonon aabiich boonoshi quyeebeeto gaata doogena taach gete” iye.

17Uroo “Hiniichee hammitinaꞌone. ‘Dotaan hambone’ boonoshi ii beetaa waayeto taane” iye.

Ebich Yooseefi bi maneenaꞌon dabbiꞌi arooch hammiye. Dotaani katinooch beetinaꞌon danehe. 18Bi maneenaꞌo Yooseefi boonoshi waan waa bi beetaa wohoochaa beeggiyeete. Boonoshi waan bi shagoyee shiichiꞌi, biin wuxoyich koceebee, 19boonoshinaa boonoshina ishichiyeete: “Are gumi gummecho and waa beetone. 20Ittoshi waataa wuxiree ikke oppooch dufone. Aroochee ‘Gonde cooxo kuxxii maatone’ gettemmo noone. Eke bi gummiti gumo tunetaa beeggemmo noone” iyeete.

21Tunebaani Roobeeli ebi kocoon waayeꞌi, boonoshi kishoochee Yooseefin wodiiya gabiye. Ishichiinoo iye: “Bi kasho no kishoona kechaaye. 22Ashi damoon ukkiyaahote. Hini baraheexi oppooch dufotani, bi toommooch bare mooyon tuniyaahote” iye. Roobeeli bi ishichito, Yooseefin boonoshi kishoochee wodiiree, bi nihoo waan wochiya bi qaawitoyichiye.

23Yooseefi bi maneenaꞌo waan bi shaggimmona, bi taheti, mallet gaawe, kisha genje kittoon shoottiyeete. 24Biinoo yechii daammii oppooch duppiyeete. Oppoo aachaalli shuuꞌone.

25Maayoon maaya koteechii, wokkii ciinniꞌi, Gilaadee showoochee waabeeti, giixechi Ishmaꞌeeleenaꞌon beeggiyeete. Ebi are giixechinaꞌo shitto, huuteebeeti attoonaa hareboonon boonoshi gaaleenaꞌooch xaaniꞌi, Gibitsee showooch dugilla hammii beeheete.

26Yihudi bi maneenaꞌoyich ishichiye: “No manoon wuxaa bi qitoon no oppo, nooch amooniye bi gaaccesho? 27Ebiyee hini waabeeti giixechi Ishmaꞌeeleenaꞌoyich kembone; bi toommooch gondoon shuunaayone. Amoommon bi tunetaanoona, no manoone; no hajjee meenone” iye. Ebina bi maneenaꞌo ebi bi gaboon tunebe iyeete.

28Ebich Miidiyamee giixechinaꞌo#37:28 Ebi giixechinaꞌo haddee 25-27 beetoochaa Ishmaꞌeeleenaꞌo, wotta 28 beetonaa 36 beetonoochaa Miidiyameenaꞌo boonoshi getteetaanona asheenaꞌo baribareenaꞌo tooneenaꞌone. waaꞌi boonoshi beetooch shaggimmona, bi maneenaꞌo Yooseefin oppoochee geechii kichiꞌi, Ishmaꞌeeleenaꞌoyich hiye birewoona kemmiyeete. Boonoshiyoo Yooseefin Gibitsee showooch daammiyeete.

29Roobeeli oppo beetooch wottee hammii ciinniꞌi, Yooseefin muccehe. Ebich bi tahoon keexxiye. 30Bi maneenaꞌo waan wottee waaꞌi, “Bushoo oppooch aalloone. Aabichishiye ta gettemmo?” iye.

31Aroochee ikke emmishoon guuriꞌi, Yooseefichi kittoon damooch hacciyeete. 32Mallet gaawe, kisha genje bi kittoon daammii, boonoshi nihoyich “Ebi no daneti kittoo ne bushoocho bi tunoonaa tunee qayonon xiishibe” iyeete.

33Yaaqobiyoo ebi kittoon ariiꞌi, “Hini ta bushoo kittoone. Gonde cooxone biin maato; iberoon Yooseefin cooxone yangixxii maato” iye.

34Arooba Yaaqobi bi tahoon getoochaa keexxiye; dookoon taheꞌi, meeti areddoon eeppii muushenehe. 35Bulli bi anaami bushiishoonaa maache bushiishoona biin goggiiya bi waan waaheete. Tunebaani goggemmon mawiihe. “Muushenebee ta bushoo waan, maash hammemmo taane” iye. Bi bushoyichoo eeppiye.

36Ebiyooba Miidiyamee showeexi giixechinaꞌo Yooseefin Gibits daammiꞌi, Faroonichi iraasheenaꞌo daggoochee ikkoo tuneti, taatoo quyee naayinaꞌochi iraashoo Phoxifaarich kemmiyeete.

Currently Selected:

Halloo 37: KBRC

Highlight

Copy