Hiziqeeli 7
7
Aallee Aabo Shago
1Doono Yeeri taach ishichiye: 2“Hini ashi bushoocho, Nuggishoo Doono Yeeri Israꞌeelee showeechon ishichii beetone: Ciireexi aallo showee toommooch awudde tuggoona shaggitone. 3Israꞌeele, and ne ciiro shaggitone; ta kaaroon ne toommooch deejjemmo taane; ne gommoommona ne toommooch nallemmo taane; ciigiiti ne qocoo bullich neen naxemmo taane. 4Neech ayini ariqqeyaachemmo taane; tunebaani ne shaaddoonaa ne daggooch beeti ciigiiti mooyonoyich neen naxemmo taane; aroochee Doono Yeeri ta tunoon ariyemmi neene.
5“Nuggishoo Doono Yeeri ishichiye: Xuuxee toommooch xuuxo woyemmone. 6Ciiro waatone! Ciiro shaggitone! Ittoshi toommooch tiyitone; ebiyoche waatone! 7Hini showooch beetinaꞌote, ittoshi aallee aabo shaggitone; aabo shaggitone; deco katinnitone; ebiyoo dullee aaboani guudi toommoochaa ilileecho toonoone. 8And kaateree ta neboon ne toommooch woniyemmo taane; ta kaaroon ne toommooch kindiyemmo taane; ne gommoommona ne toommooch nallemmo taane; ciigiiti ne mooyo bullich neen naxemmo taane. 9Neech ayini ariqqeyaachemmo taane; tunebaani ne shaaddoonaa ne daggooch beeti ciigiiti mooyonoyich neen naxemmo taane; aroochee neen naxaabeeto Doono Yeeri ta tunoon ariyemmi neene.
10“Ebiyoche deco! Israꞌeeli aallee aabo shaggitone; xuꞌoonaa hukkoona woddetone; geecoo diccii oogetone. 11Hukkoo dicciꞌi gondeechi gumbo tunetone; asheenaꞌo beshaa beshe boonoshi hajjoonaa gaannoona muricaachemminaꞌone.
12“Aabo waatone; deco katinnitone; nebo meetinaꞌochi toommooch bi waatoyich kemeebeeto emiraaye; kemmiibeetoo ayinaaye. 13Bullin ciinnii beetona getteeti yaaꞌoo gubb kishoo hakkaachemmo bi tunetoyich, kemmitoonaa kemetona kashoona beeree kemmito bi kemmiton wochiyoon hakkaachemmone; xuꞌechi asho bi kashoon wodiyoo hakkaache. 14Shameto huggiꞌi bulli mooyon boonoshi qanniitaa, ta kaaro bulli toommooch bi tunetoyich koniyoona ginooch hamaachemmone.
15“Maach gino, maac biiyoonaa shaacoona beetone; katemoyee maach beeto ginoona qitemmone; katemooch beeto biiyoona, shaacoonoo qitemmone. 16Muriccii woditinaꞌo guudi toommooch beechi bambeexi daabbichoommon boonoshi axaaxoyich shooshemminaꞌone. 17Mochoo bulli niremmone; tingo bulliyoo qewemmone. 18Dookoon tahemminaꞌone; keqqoo boonoshin yechemmone; bulliyona yeellemmone; boonoshi qelloon cakkemminaꞌone. 19Boonoshi birewoon gommooch duppemminaꞌone; boonoshi aachoo eeꞌe mooyooch haddeyemmone; boonoshi birewoonaa aachoona Doono Yeerichi kaaree aabooba boonoshin wodiyaachemmone. Ebi boonoshich xugo bi tunetoyich boonoshi shaacoon wochaachemmone; woyee boonoshi maacoon michiyaachemmone. 20Gaawe boonoshi aachoonaa birewoona geecitinaꞌone; ebi aroona shixxii ciigiiti shahalloon shuuneheete; ebich ebi shashoon boonoshich eeꞌo tuniito taane. 21Ashi showee asheenaꞌonaa showee toommeexi axaaxechinaꞌona boggemmoyich tuniyemmo taane; boonoshiyoo eeꞌiyemminaꞌone. 22Ta aafoon badd ta wochiichaa boonoshiyoo aaxxe ta xaaꞌoon eeꞌiyemminaꞌone; boggechinaꞌo giyiree eeꞌiyemminaꞌone.
23“Showoo damoon ukkoona, katemoo hukkoona bi ceennitoyich, sansalatoon qanniibe! 24Aageteenaꞌo daggoochee oogeti gondeenaꞌon deebiree boonoshi kexon bogi boonoshi deqqemmoyich tuniyemmo taane. Giidechinaꞌochi geecoon shoottemmo taane; boonoshi yaafe xaaꞌeenaꞌoo eeꞌemminaꞌone. 25Xuuxo shagiyooba diggoon qaawemminaꞌone; tunebaani daneyaachemmone. 26Naxee toommooch naxo woyemmone; woree hilloochoo woroo woyemmone; keemechinaꞌo waanee yaaꞌoon qaawemminaꞌone; tunebaani sheeroo qeesheenaꞌo waanee, ciico geeneenaꞌo waanee aallemmone. 27Taatoo eeppemmone; woraaferashoo gibenoon kuxxemmone; showee asheenaꞌochi kishoo keqqoona qewemmone; boonoshi gommi gommoommona boonoshi toommooch tuniyemmo taane; boonoshi nallitoommon boonoshi toommooch nallemmo taane; Doono Yeeri ta tunoon ariyemminaꞌone” iye.
Currently Selected:
Hiziqeeli 7: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
