Hiziqeeli 5
5
1Doono Yeeri ishichiye: “Ashi bushoocho, aci goraadoon daamiree appoona cagoommon ne qelloonaa ne ishaanoonon cage; ebi qelloonoo machoona qociree keejj beera qoodibe. 2Giicheyoo ciiretoyee gubb ikke beeroon ne shichiti katemee daggoochaa qaaqqoona michemmo neene; ikke beeroon katemee guudoochaa goraadoona qeccemmo neene; wotta echeti ikke beeroon yongooch shaccemmo neene; tawoo goraadoona boonoshin yookkemmo taane. 3Aroochee giishechoon daamiree ne qoreddee caappooch qullemmo neene. 4Andoo aroochee giishechoon daami qaaqqooch ne gedaa mice; aroochee qaaqqoo Israꞌeelee macceenaꞌo bulli waan woyemmone” iye.
5Nuggishoo Doono Yeeri ishichiye: “Ebi Yerusaalemine; showeenaꞌon bi guudoona tuniyaa, aageteenaꞌo daggooch biin kotiito taane. 6Yerusaalemi aageteenaꞌoyee beshoon ta geteenaꞌo toommooch hukkoon tiijjiyan; bi guudoona beetinaꞌoyee beshoon ta qociyoon shaaddahane. Ebiyoo ta geteenaꞌon waayeyaache getonaa ta qociyoona hammi qayonane” iye.
7Ebich Nuggishoo Doono Yeeri ishichiye: “Ittoshi guudoona beeti aageteenaꞌoyee beshe hukkecho tuneto ittoshine; ta qociyoon dabbaano ittoshine; ta getoyichoo deꞌa getaano ittoshine; ittoshi guudoona beeti aageteenaꞌochoommonolla quyeyaano ittoshine” iye.
8Ebich Nuggishoo Doono Yeeri ishichiye: “Ta, ta qelloona ne toommooch tiyeto taane; aageteenaꞌo aafoochaa ne toommooch nallemmo taane. 9Ciigiiti ne mooyo bullichi naboona, ebiyee aaf ciroona ta tuniyaani, ebiyee bekkoo ciroona ta tuniyaachemmi mooyon ne toommooch tuniyemmo taane. 10Ebich ittoshi daggoochaa niheenaꞌo boonoshi bushiisheenaꞌon, bushiisheenaꞌo boonoshi niheenaꞌon maayemminaꞌone; eechiree ittoshi toommooch nallemmo taane; ebiichee muriccii echemmon yongee toommooch shaccemmo taane.#Shoosh. 4:10
11“Ebich beeyecho ta tunoona wogaꞌa Nuggishoo Doono Yeeri ta ishichiyoye: Ciigiiti ne mooyona, ne eeꞌoonoo ta yaafee kexon ne eeꞌitoyich, neen giishiyemmo taane; neech ayini ariqqeyaachemmo taane. 12Ittoshiichee keejj beereexi ikkoo ittoshi daggoochaa biiyoona, shaacoonoo ciiremmone; wotta keejj beereexi ikkoo katemoyee maachaa goraadoona dihemmone; bare keejj beereexi ikkoon yongo bulliich shaccemmo taane; goraadoonoo yookkemmo taane.
13“Ta kaaroon, ta neboonoo boonoshi toommooch kindiichi tooꞌi digaayemmo taane; ta kaaroon boonoshi toommooch ta kindiihooba Doono Yeeri ta, ta qanaatoona getteto ta tunoon ariyemminaꞌone.
14“Ebiyeenoo wotta, ittoshin shokko echiyemmo taane; ittoshi guudoona beeti aageteenaꞌonaa aroona beshee beetinaꞌona ittoshi cooneyemmoyich tuniyemmo taane. 15Kaaroona, neboona, ooge noggoona ittoshi toommooch ta nalliyooba, ittoshi guudoona beeti aageteenaꞌoyich naago, tochoo, meeqqeqqiyoonaa wuche getteyoonon tunemmo ittoshine; Doono Yeeri ta, ebin getteto taane. 16Wuxii aalliyechi shaacee shangoon ittoshi toommooch deejjiree, ittoshin aalliyemmo taane; shaacoon ittoshi toommooch wochi wochi deebemmo taane; ittoshi maayi woretoon kuxxemmo taane. 17Shaacoonaa gonde cooxinaꞌonon ittoshi toommooch deejjemmo taane; ittoshi bushiisheenaꞌon aalliyemminaꞌone; biiyo, ashi damee ukkoo ittoshi showoon yexxemmone; ittoshi toommooch ginoon deebemmo taane; Doono Yeeri ta, ebin getteto taane” iye.#Yaaꞌo. 6:8
Currently Selected:
Hiziqeeli 5: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
