Hiziqeeli 30
30
Gibitsich Shoosheeti Shoosho
1Doono Yeeri taach ishichiye: 2“Ashi bushoocho, ishichi keemoon keembe: ‘Nuggishoo Doono Yeeri ishichii beetone:
“Ebi aaboyich woowo!” getibee eefe.
3Ebi aabo katinnitone;
Doono Yeerichi aabo katinnitone;
ebiyoo qubee aaboone;
aageteenaꞌoyichoo aallee aaboone.
4Goraado Gibitsi toommooch woyemmone;
xuuxo Topphiyee toommooch tunemmone.
Guuraa qititinaꞌo Gibitsi daggooch dihiyooba,
bi gaanno qacaa hamiyooba,
bi showee heco shekiremmone.
5“ ‘Topphiyee, Fuuxi, Luudi, Arabee showoo bulli, Liibiyi, wogee showee asheenaꞌooch beddaahaa Gibitsina tookki goraadoona dihemminaꞌone.
6“ ‘Doono Yeeri ishichiye:
Gibitseenaꞌon gaachee beetinaꞌo dihemminaꞌone;
bi geeciibeeti bi giidoo niremmone;
Migidoolee tiijji Aswaan beddaahaa beetinaꞌo
biinna tookki goraadoona dihemminaꞌone;
Nuggishoo Doono Yeeri ta ebin getteto taane.
7Shokkoon echeti showeenaꞌoyee beshoon,
ebi showoo shokkoon echemmone;
tiishee aalleti katemeenaꞌoyee beshoon,
bi katemeenaꞌoo tiishemminaꞌone.
8Qaaqqoon Gibits ta gediyooba,
bi gaacheenaꞌo bulliyoo tiishehooba,
Doono Yeeri ta tunoon ariyemminaꞌone.
9“ ‘Ebiyooba amoonolla keqqaanoon koteꞌi beeti Topphiyeenaꞌon keqqichoyich wocheyechinaꞌo markaboona ta waanee hammemminaꞌone; Gibitsi aalloona xuuxo boonoshi toommooch tunemmone; illa ebiyoche, ebi tunemmone.
10“ ‘Nuggishoo Doono Yeeri ishichiye:
Baabloonee taatoo Nabukadinatsori kishoona,
dofee Gibitsee asheenaꞌon aalliyemmo taane.
11Biinnaa oogeti maacmanje bi ginee naayinaꞌona,
showoon aalliyoyich woyemminaꞌone;
boonoshi goraadoon Gibitsi toommooch kaaccemminaꞌone;
dubenoonoo showee ikko tuniyemminaꞌone.
12Abbaayi aacon takkemmo taane;
showoonoo gonde asheenaꞌoyich hajjiyemmo taane;
ashi showee asheenaꞌochi kishoona
showoonaa bi daggooch beeto bullinon aalliyemmo taane;
Doono Yeeri ta, ebin getteto taane.
13“ ‘Nuggishoo Doono Yeeri ishichiye:
Shahalleenaꞌon aalliyemmo taane;
Memifisi beeti misileenaꞌon aalliyemmo taane;
ebiyee bekk Gibitsee showooch iraashoo beetaachemmone;
Gibitsee showoochoo shaton deejjemmo taane.
14Phaxiroosin tiishaa aalleti katemeen tuniyemmo taane;
Tsoꞌaan qaaqqoon geddemmo taane;
Tebeesi toommooch nallemmo taane.
15Gibitsi manje katemoo tuneti
Felusiyeemi toommooch ta kaaroon kindiyemmo taane;
dofee Tebeesee asheenaꞌon aalliyemmo taane.
16Gibits qaaqqoon geddemmo taane;
Felusiyeemi oogichi xuuxemmine;
Tebeesi uxeree duuho tiishemmone;
Memifisiyoo ooge xuuxoona beeyemmine.
17Heliyootinaa Fibisetinooch beeti gurimaasheenaꞌo, goraadoona dihemminaꞌone;
maacheenaꞌoo kecceyemminaꞌone.
18Gibitsi giidoon ta tiishiyooba,
Xafinaasich areddee showoo xumemmone;
bi geeciibeeti bi giidoo niremmone;
qubo biin guuppemmone;
bi asheenaꞌoo kecceyemminaꞌone.
19Gibitseenaꞌochi toommooch nallemmo taane;
aroochee boonoshiyoo Doono Yeeri ta tunoon ariyemminaꞌone’ itone gete” iye.
20Kecee no hammeti aaraa ikkinnee natooba, ikkinnee agenee shabaattinnee qemooba Doono Yeeri taach ishichiye: 21“Ashi bushoocho, Gibitsee taatoo Faroonichi kishoon tiicheto taane; bi wodemmoyich, tahoona kaappeyaanoone; wodiree wochinnoon goraadoon bi yechemmoyich guuccii kaappiꞌi sheppheto aalloone. 22Ebich Nuggishoo Doono Yeeri ishichiye: ‘Ta, Gibitsee taatoo Farooni toommooch tiyeto taane; iiwe bi mochoonaa tiishe bi mochoonon tiichemmo taane; goraadoon bi kishoochee holliyemmo taane. 23Gibitsee asheenaꞌon aageteenaꞌo daggooch shaccemmo taane; showee toommoochoo bitinnemmo taane. 24Baabloonee taatoochi mochoon kupphiyemmo taane; ta goraadoonoo bi kishooch immemmo taane; tunebaani Faroonichi mochoon tiichemmo taane; biyoo oogichii mayeti ashichoommon bi aafoochaa maaceremmone. 25Baabloonee taatoochi mochoon kupphiyemmo taane; Faroonichi mochoo dihemmone; ta goraadoon Baabloonee taatoo kishooch ta imiyooba, biyoo Gibitsee showee toommooch bi yaggiyooba, boonoshiyoo Doono Yeeri ta tunoon ariyemminaꞌone. 26Gibitsee asheenaꞌon aageteenaꞌo daggooch shaccemmo taane; showee toommoochoo bitinnemmo taane; aroochee boonoshiyoo Doono Yeeri ta tunoon ariyemminaꞌone’ ” iye.
Currently Selected:
Hiziqeeli 30: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
