Hiziqeeli 19
19
Israꞌeelee Iraasheenaꞌoyich Hichoon Caago
1Doono Yeeri Israꞌeelee iraasheenaꞌoyich ishichi hichoon ta caaggemmoyich gettiye:
2“Ne indee daahereenaꞌochi daggooch
am shaahe daahereene!
More daahereenaꞌochi daggoochaa
teeqqaacha bi bushiishoon dichiyane.
3Bi bushiishoochee ikkoon dichiyane;
biyoo oogeꞌi more daaheroon tunehe;
dabbee yeshon doyiye;
asheenaꞌonoo maahe.
4 Aageteenaꞌo bi mooyon waayeheete;
boonoshi iijjiti oppooch giyiꞌi yechehe;
boonoshiyoo qamaaxiroona yechiꞌi Gibitsee showooch daammiyeete.
5“Bi indee bi gaboo ceeni qayonaa
bi gibenee kuxonon beeggaꞌa
bi bushiishoochee ikkoon more daaheroon tuniihan.
6Biyoo daahereenaꞌo daggooch shaꞌehe;
more daaheroo tunehe;
dabbee yeshon doyiye; asheenaꞌonoo maahe.
7Boonoshi mishigeenaꞌon happiye;
boonoshi katemeenaꞌon aalliihe;
bi gigee qaaroochee tiyitona showoonaa
arooch beeto bullina keqqiye.
8Bi guudoona beeti aageteenaꞌo bulla
bi toommooch tiyiyeete;
bi toommooch boono dabboon yagiyeete;
boonoshi iijjiti oppoochoo yechehe.
9Qamaaxiroona yechiꞌi guubee daggooch geddiyeete;
Baabloonee taatoo waan deebiyeete;
bi qaaro Israꞌeelee guudinaꞌooch,
aroyee hach bi waayeyaachemmoyich
cuyee kexooch giijjiyeete.
10“Ne indee aachi gashooch becheeti woyinoommine;
aachi woddoochee tiyitona aafeebeeti wottoo
wodde atechi woyinee qombeyoommine.
11Bi ato kuppho bi tunetoyich,
taatee gumbo aroochee danee beetone.
Woyinee qomboo dunjunje kubboyee beshoon dicciye;
bi neexo mixinaꞌochi daggooch genjee bekkehe;
bi genjittino wodde ateenaꞌona tookkii hubbimii bekkehe.
12Tunebaani ebi woyino kaaroona waachehe;
showoochoo duppehe.
Aabi-keyo waani yongoona shuuqqiye;
bi aafoo shekirehe;
kupphe bi ateenaꞌoo shuuqqiyeete;
qaaqqoo boonoshin maahe.
13Andoo barahooch,
shuuqqii baggiti showooch daamaa becheehe.
14Bi giindoochee qaaqqoo kechiye;
bi qaakkoonaa bi aafoonon maahe;
ebich arooch kupphe ato aallehe;
taatee gumbo aroochee dano qajjiye” iye.
Ebi eefooba wochi wochaa caaggeyemmi hichoone.
Currently Selected:
Hiziqeeli 19: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
