Hiziqeeli 10
10
Yeerichi Oogee Yiiroo Yaafee Kexoochee Woho
1Ciinnaa ta iyaa, ebiyoche kiruubeenaꞌochi qelloyee tookk beeti gumoyee tookk, sapiiroochee shuuneeti taatee qeenoommi mooyo beete.#Hiz. 1:26 2Doono Yeeri, muttee tuppoochee shippeti tahoon taheti ashoyich ishichiye: “Kiruubeenaꞌochi dechiich beeti gengeenaꞌochi daggooch hamiree, boonoshi gutte daggooch beeti qaaqqee bunoochee ne kishee ceenon ushe; katemee toommoochoo shace” iye. Uroo ta ciinnaa beetaa hammiye.
3Uro bi giyaahaa kiruubeenaꞌo yaafee kechi deshi-waan neexeꞌi beeteete; maaci addibaaboochoo qubo ceenniye. 4Aroochee Doono Yeerichi oogee yiiroo kiruubeenaꞌochi toommoochee yaafee kechi kellooch hammiye; qubo kexooch ceenniye; addibaaboo Doono Yeerichi oogee yiiree phaqqoona ceenniye. 5Kiruubeenaꞌochi qosheenaꞌoochee kechiibeeti qaaro maachi addibaabooch beddaahaa waayeehe. Ebi qaaro Beshe Hakkechi Yeerichi yibbaatee qaaroommone.
6Muttee tuppoochee shippeti tahoon taheti uroon “Kiruubeenaꞌochi dechiich beeti gengeenaꞌo daggoochee qaaqqoon daambe” bi getaa hammiꞌi gengee gaꞌooch neexehe. 7Ikke kiruubo bi kishoon kiruubeenaꞌo daggooch beeti qaaqqoo waan daachiiꞌi giisheche qaaqqoon tiijjii muttee tuppoochee shippeti tahoon taheti uroochi kishooch geddiye; uroo yechiꞌi kechiye.
8Kiruubeenaꞌo boonoshi ikkikkoona ashi kishoommi kishoo boonoshi qoshee dechiich beetone.
9Tawoo ciinnaꞌa arooch ikkikke kiruubee gaꞌooch ikkiikkoo tuneꞌi beeti awudde gengoon beeggeho; gengeenaꞌochi malleto wacciibeeti kirisilooboommone. 10Awuddeenaꞌochi malletolla shaahoone; gengoo bi ikkikkoona bare gengee daggooch kocee kotetoniye bi shaahiibeeto. 11Boonoshi qaxirii beegaata guuddii wotteyaanoon awudde kaattoonolla qaxiriyeete; gengoo hammimmooch bareenaꞌoo hammiyeete. 12Boonoshi gubbooch, kishooch, qoshooch, ebi awuddeenaꞌochi gengooch beddaahaa boonoshi achooch aafo ceennitone.#Yaaꞌo. 4:8 13Geengeenaꞌo ta waayaa beetaa, “Geengeebeeti gengeenaꞌo” getaa ceekkeheete.#Hiz. 1:15-21 14Ebi kiruubeenaꞌo boonoshi ikkikkoyich awudd awudde shaahoo beetone; batti batticho bi shaahiibeeto kiruuboon, guttinnoo ashoon, keejjinnoo daaheroon, awuddinnoo booyon shaahoone.#Hiz. 1:10; Yaaꞌo. 4:7
15Kiruubeenaꞌoo kaama tiyiyeete; eboshiyoo Kebaari aachi gashoochaa ta beeggeti kashechi halleenaꞌone. 16Kiruubeenaꞌo hammimmona, gengeenaꞌoo boonoshi gaꞌoona hammiyeete; kiruubeenaꞌo showoochee kaama tiya boonoshi qoshoon boonoshi yaggimmona, gengeenaꞌoo boonoshi gaꞌoochee badd wotteyaaneenaꞌone. 17Kashechi halleenaꞌochi ayaano gengeenaꞌooch bi beetoyich, kiruubeenaꞌo neexemmona boonoshiyoo neexee beeheete; kiruubeenaꞌo tiyimmona boonoshiyoo tookkii tiyii beeheete.
18Doono Yeerichi oogee yiiroo yaafee kechi kelloochee tiyiꞌi, kiruubeenaꞌo tookk neexehe. 19Ebin ta ciinnaa beetaa, kiruubeenaꞌo boonoshi qoshoon yaggiꞌi, showoochee tiyii hammiyeete; gengeenaꞌoo tookkii tiyii hammiyeete; Doono Yeerichi yaafee kechi uxeree aabi-keyo waani kellooch neexeheete; Israꞌeelee Nuggishoochi oogee yiiroo boonoshi tookk beetone. 20Eboshi Kebaari aachi gashoochaa Israꞌeelee Nuggishoyee deshi qach ta beeggeti kashechi halleenaꞌone; tawoo kiruubeenaꞌo boonoshi tunoon ariiho.
21Boonoshi ikkikkoyich awudde shaahoonaa awudde qoshoona beetone; boonoshi qoshee dechiich ashi kishoommi kishoo beetone. 22Boonoshi shaahoo Kebaari aacoochaa ta beeggeti kashechi halleenaꞌochi shaahoommone; boonoshi ikkikkoona kaamooch aaf qaxirii beeheete.
Currently Selected:
Hiziqeeli 10: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
