Keyo 36
36
1“Ebich Betsaleeli, Oholiyaabi, wotta yaafee duukkaanee shuunoo bullin aabichiree boonoshi shuunemmo gaata Doono Yeeri hakkoonaa ariyoonon boonoshich immiti, ariyechi asheenaꞌo bulli Doono Yeeri gettitoommi gommona shuunoon shuunemminaꞌone” iye.
Asheenaꞌo Wodde Wojjoon Imo
2Aroochee Muusi, Betsaleelinaa Oholiyaabinon, ebiyoommon wotta Doono Yeeri shuunoon boonoshi shuunemmoyich hakkoon immiti, boonoshi mullo tiyiti, shuunee ariyechi asho bullin ceeggiye. 3Boonoshiyoo yaafee duukkaanee shuunoyich Israꞌeeleenaꞌo deebiti, mullee daaggoona icheti wojjoo bullin Muus waanee deqqiyeete. Tunebaani asheenaꞌo boonoshi daaggoona maaddi maaddoona kuxaanoon, wojjoon Muus waan deebii beeheete. 4Ebich yaafee duukkaanee shuunoon shuuneebeeti, ariyechi shuunechinaꞌo bulli boonoshi shuunoon qajjiichii waaꞌi, 5Muusich “Asheenaꞌo Doono Yeeri gettiti shuunoyich qaaweetoyee beshaa beshe wojjoon deebii beetinaꞌone” iyeete.
6Aroochee Muusi Israꞌeeleenaꞌo kaambo bulliich ishichiibeeti getoon wochee daachiihe: “Anaamo tuneba maachee koniyoona yaafee duukkaanee shuunoyich tunemmi wojjoon ebiyee damba deebaaye” iye. Ebina boonoshiyoo asheenaꞌo deebaachemmoyich bajjiyeete. 7Ebin boonoshi tuniito, ebi waati mooyo shuunoo bullin shuunoyich beddii echeto bi tunetoyichiye.
Yaafee Duukkaanoo Shuuneyoo
(Keyo 26:1-37)
8Shuunechinaꞌo daggoochee shuunee hakkoo boonoshich beeti asheenaꞌo bulli yaafee duukkaanoyich aashire maccillaateenaꞌon shuuneheete. Eboshin muttee tuppoochee ciciitaa yokkeeti, shimaayito, dameroonaa ceelloona tuneti woshiqoona shippeti qoreddoochee shuuneheete; aree toommoochoo kiruubeenaꞌon malletiiꞌi shippiyeete. 9Maccillaatoo bulli tatoone; bi ikkikkoochi neexo hiyaa shimitte hiroo, bi maaco awudde hiroone. 10Uuche maccillaatoon xaaqqii gawiiꞌi kochiyeete; echeti uuche maccillaatoon ebiyoommon xaaqqii gawiiꞌi kochiyeete. 11Ebi ikkooch xaaqqeeti ikke maccillaatee gocooch, shimaayite qoreddoochee shuuneeti kenneenaꞌon geddiyeete; ohe ikke maccillaatee gocoochoo ebiyoommon wotta geddiyeete. 12Aache kennoon ikke baddi maccillaatee gocooch, wotta aache kennoon ohe ikke maccillaatee gocooch ciiniiꞌi geddiyeete. 13Aroochee yaafee duukkaanoo ikkochee yesheto bi tunemmoyich, aache qamaaxiroon aachoochee shuuneꞌi, ebi aroona maccillaateenaꞌon ikkochii yeshiiheete.
14Yaafee duukkaanoon tookkaa qeremmi, emmishee eexoochee shippeti qoreddeenaꞌon shuuneheete. Ebi qoreddoo aaraa ikkoone. 15Ebi aaraa ikke qoreddoo tatoone; bi ikkikkoochi neexo shaashe hiroo, bi maaco awudde hiroone. 16Uuche qoreddoon ikkooch xaaqqii, ebiyoommon wotta shiritte qoreddoon ikkooch xaaqqii gawiiꞌi kochiyeete. 17Ikke badd beeti uuche qoreddoo ikkooch xaaqqeeti, ciireexi gocooch aache kennoon, ebiyoommon wotta bare badd beeti shiritte qoreddoo ikkooch xaaqqeeti, ciireexi gocooch aache kennoon geddiyeete. 18Aroochee duukkaanoon ikkochiꞌi yeshiyoyich, aache qamaaxiroon gooshoochee shuuneheete. 19Duukkaanoyich qucaa shuuneeti, bagee baaddoochi gooqqoochee qeroon shuuneheete; wotta bi toommooch xappeyemmi, bare qeroon gaawichaa qucheti bare gijjee gooqqoochee shuuneheete.
20-22Yaafee duukkaanoyich kaamoo tuneti tureenaꞌon geellee mixoochee shuuneheete. Gutti gutte mixon buroona ikkochii xaaqqiꞌi, ikke turoon tuniiheete. Ikkikke turee neexo aashire hiroo, bi maacoo ikke hiraa qatone. Turee deshi ciiroochaa gutte kallaachoon kichiyeete. Yaafee duukkaanee turoo bullin ebiyoommi gommona shuuneheete. 23Yaafee duukkaanee deshi-waanich hiye turoon shuuneheete. 24Ebi hiye tureenaꞌoyich boonoshi neexemmi aabbe baatoon birewoochee shuuneheete; ikke turee gutte kallaachoyich gutte baatoon, wotta bare turee gutte kallaachoyich gutte baatoon tuniiheete. 25Ebiyoommon yaafee duukkaanee dambi-waanich hiye tureenaꞌon shuuneheete. 26Boonoshi kallaachoyich tunemmi aabbe baatoon birewoochee shuuneheete; ikke turee xepphooch gutte baatoon, wotta bare turee xepphooch gutte baatoon tuniiheete. 27Yaafee duukkaanee gubbich, ebiyoo aabi-gimo waanich, shiritte turoon shuuneheete. 28Gubbi duꞌeenaꞌoyich gutte turoon shuuneheete. 29Ebi tureenaꞌo deshee tiijjiꞌi damba ikkinnee qalibetooch beddaahaa, ikkottee yeshetinaꞌone. Gutte duꞌoyich tunemmi gutte turoon ebiyoommi gommona shuuneheete. 30Birewoochee shuuneeti gutti gutte baatoo ikkikke turoyich beetone; ebina shimitte turoonaa aaraa shiritte baatoona tunehe.
31Wotta aaraa uuche yaroon geellee mixoochee shuuneheete. Ikke badd beeti yaafee duukkaanee tureenaꞌoyich uuche yaroon, 32bare badd beeti, yaafee duukkaanee tureenaꞌoyich uuche yaroonaa yaafee duukkaanee gubb aabi-gimo waan beeti tureenaꞌoyich uuche yaroonon shuuneheete. 33Daggeexi yaroon tureenaꞌo daggoona tuniiꞌi, cilloochee cillooch beddaahaa beshiiheete. 34Tureenaꞌon aachoona dikkeheete. Yareenaꞌon yeshiyoyich qalibeteenaꞌon aachoochee shuuneheete; yareenaꞌonoo aachoona dikkeheete.
35Yaafee duukkaanee maaci maccillaatoon shimaayito, dameroonaa ceelloona tuneti woshiqoona, wotta muttee tuppoochee ciciitaa yokkeeti woshiqoona shippeti qoreddoochee shuuneheete; aree toommooch kiruubeenaꞌon malletiiꞌi shippiyeete. 36Geellee mixoochee maccillaateenaꞌo kaqqeyemmi awudde giimboon shuuneheete; eboshin aachoona dikkeheete; aachoochee shuuneeti kaꞌeenaꞌon boonoshi toommooch geddiyeete; boonoshichoo awudde baateenaꞌon birewoochee shuuneheete.
37Duukkaanee kellee maccillaatoon shimaayito, dameroonaa ceelloona tuneti woshiqoona, wotta muttee tuppoochee ciciitaa yokkeeti woshiqoona shippeti qoreddoochee shuuneheete; aree toommoochoo shashii shippiyeete. 38Ebi maccillaateenaꞌoyich uuche giimbeenaꞌonaa boonoshi kaꞌeenaꞌonon shuuneheete. Ebi giimbeenaꞌon boonoshi toommona tookkii aachoona dikkeheete. Boonoshi yaabeenaꞌon aachoochee shuuneheete. Ebi giimbeenaꞌo neexemmi uuche baatoon gooshoochee shuuneheete.
Currently Selected:
Keyo 36: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
