Keyo 28
28
Qeesheenaꞌoyich Tunemmi Taheenaꞌo
(Keyo 39:1-7)
1“Qeesheenaꞌo tuneree taach boonoshi maddemmoyich, Israꞌeeleenaꞌo daggoochee ne manoo Haroonin, bi anaami bushiisheenaꞌo Nadaabin, Abiihin, Elazaarinaa Itamaarinon ne waan boonoshi giddemmoyich tuniibe. 2Ne manoo Haroonich oogee yiiroon immiibeeti, malletecho tuneti yaafeeti tahoon shuunebe. 3Bariti hakkoo boonoshich bi beeyemmoyich ta tuniiti, kishee shuunee ariyechi asho bullin ceegiree, Harooni qeeshoo tuneree taach maddeya bi yaafeyemmoyich, ebi tahoon boonoshi shuunemmoyich gete. 4Boonoshi shuunemmi taheenaꞌo eboshine: geteexi kiiso, efoodo, qamiso, shashiitaa shuuneeti kittoo, qelli caacoonaa buroonane. Ne manoo Harooninaa bi anaami bushiisheenaꞌona qeesheenaꞌo tuneree taach boonoshi maddemmoyich, yaafeeti taheenaꞌon boonoshich shuunebeete. 5Ebi kishee shuunee ariyechinaꞌo aachee woshiqoona, shimaayito, dameroonaa ceelloona tuneti woshiqoona, wotta muttee tuppoochee ciciitaa yokkeeti woshiqoona shifeete.
Efoodo
6“Efoodoon aachee woshiqoona, shimaayito, dameroonaa ceelloona tuneti woshiqoona, wotta muttee tuppoochee ciciitaa yokkeeti woshiqoona malletiitaa shippeti qoreddoochee shuunebeete. 7Aafinaa gubbinon yeshiyoyich, gutte gogee toommeexi kaꞌecho tunebe. 8Efoodee cuyoon aachee woshiqoona, shimaayito, dameroonaa ceelloona tuneti woshiqoona, wotta muttee tuppoochee ciciitaa yokkeeti woshiqoona malletii shifiree, efoodoona tookki ikke shaahoo tuniiree xaaqqibeete.
9“Gutta shohaamee aaxxe xaqqoon daamiree, Israꞌeelee yoodeenaꞌochi shigoon qiici kooribe. 10Boonoshi shiijjee yaaroommona shiritte shigoon ikkinnee xaqqooch, echeti shiritte shigoon guttinnee xaqqooch qiici kooribe. 11Qiicii shuunoon ariibeeti asho maatemoon bi qiicoommon, Israꞌeelee yoodeenaꞌochi shigoon ebi gutte xaqqee toommooch qiiciree kooribe. Aroochee ebi xaqqeenaꞌon aachee qebbooch gede. 12Israꞌeelee yoodeenaꞌochi shalligichee xaqqeenaꞌo boonoshi tunemmoyich, ebi gutte aaxxe xaqqeenaꞌon gutte gogee toommeexi, efoodee kaꞌeenaꞌona tookki yeshiibe. Doono Yeeri ta aafooch shalligichoo tunemmi, ebi shigeenaꞌon Harooni bi gogooch shaage. 13Aachoochee gutte qebboon shuunebe. 14Woderoochoommon yokkeeti, gutte tifoon xalle aachoochee shuuneree, qebboona tookki yeshiibe.
Geteexi Kiiso
(Keyo 39:8-21)
15“Yeerichi daaggoo echeebeeti, geteexi kiisoon efoodoochoommon, aachee woshiqoona, shimaayito, dameroonaa ceelloona tuneti, muttee tuppoochee ciciitaa yokkeeti woshiqoona malletiitaa shippeti qoreddoochee shuunebe. 16Xappaa qoddeto tuneechi, bi neexo ikke ciixo, bi maaco ikke ciixo, awudde bi naaboo tato tunebe. 17Aroochee bi toommooch awudde yaaroona aaxxe xaqqeenaꞌon gede. Ikkinnee yaarooch saridiyoonoon, topphaziyoonoonaa garineetoonon, 18guttinnee yaarooch maarigidoon, sapiiroonaa almaazoonon, 19keejjinnee yaarooch yaakintoon, ageetoonaa amexoosoonon, 20awuddinnee yaarooch beruulloon, shohaamoonaa yasphiidoonon gede. Eboshi bullin aachee qebbeenaꞌooch gede. 21Ebi aaraa gutte xaqqo boonoshi ikkikkoo toommooch, ikke Israꞌeelee yoodee shigo tuniitaa, aaraa gutte Israꞌeelee yoodeenaꞌochi shigo maatemoochoommon qiiceeto tunebe.
22“Geteexi kiisoyich woderoochoommon yokkeeti tifeenaꞌon xalle aachoochee shuunebe. 23Gutte qalibetoon aachoochee shuuneree, geteexi kiisee damba qachi gutte gocona tookki yeshiibe. 24Ebi aachoochee shuuneeti gutte tifoon geteexi kiisee damba qachi, gutte goceexi qalibeteenaꞌona tookki yeshiibe. 25Bare gutte tifee cilleenaꞌon aaf beeti efoodee gogee toommeexi kaꞌeenaꞌo toommooch beeti, aachee gutte qebbeenaꞌona tookki yeshiibe. 26Gutte aachee qalibetoon shuuneree, efoodee gaꞌooch beeti, geteexi kiisee deshi gutte gocona maacaa yeshiibe. 27Bare gutte aachee qalibetoon shuuneree, malletiitaa shippeti efoodee buroo beetoyee damba qach, efoodee aaf beeti, toommeexi gogee kaꞌeenaꞌochi deshi qachaa yeshiibe. 28Geteexi kiiso malletiitaa shippeti, efoodee buree toommooch bi tunemmoyich, wotta efoodoochee bi muricaachemmoyich, geteexi kiisee qalibeteenaꞌon efoodee qalibeteenaꞌona tookki xaaqqiree, shimaayite yokkoona cuye.
29“Harooni Yaafe Xaaꞌooch bi giyiyooba, Doono Yeeri ta daaggoo echeebeeti, geteexi kiisooch beeti, Israꞌeelee yoodeenaꞌochi shigoon bi mullee kaamooch tuniibe. Ebina Doono Yeeri ta, ta asheenaꞌon bulli aaboon shalligemmo taane. 30Doono Yeeri ta aafooch bi giddeebeeti aabo bulliich, Harooni mullee kaamooch boonoshi tunemmoyich, Uriimoonaa Tumiimoonon bi geteexi kiisooch gede. Ebina Harooni ta daaggoo echeebeeti, geteexi kiisoon Doono Yeeri ta aafooch bulli aaboon shaage.#Had. 27:21
Qamiso
(Keyo 39:22-31)
31“Wotta efoodee dechiich taheyemmi qamisoon shimaayite woshiqoochee baach shippeti qoreddoochee shuunebe. 32Qello giyemmi qettoon kichibe. Bi keexeyaachemmoyich, qettee guudoon shippeti qoreddoona xappiree koye. 33Qamisee baata ciiroochaa guude gawoon shimaayito, dameroonaa ceelloona tuneti woshiqoona romaanee michi aafoommi mooyinaꞌon shashiiree shife. Eboshi dagg daggooch beshii beshii, aachoochee shuuneeti qaaxilleenaꞌon shuye. 34Ebina qamisee baata ciireexi guude gawooch, aachoochee shuuneeti qaaxilleenaꞌonaa romaanee michi aafoommi mooyinaꞌona shaaddii shaaddiitaa tunemminaꞌone. 35Harooni maddoyich bi giyimmi aabo bullin, ebi qamisoon tahebe. Tahaꞌi, Yaafe Xaaꞌooch Doono Yeeri ta aafooch bi giyii beehoobinaa bi kechii beehoobina, qaaxillee qaaro waayeyemmone; biyoo qitaachemmone.
Qelli Caacoonaa Kittoona
36“Xalle aachoochee ikke shashoon shuunebe. Bi toommooch ‘Doono Yeerich Yaafeeto’ ii beeton maatemoochoommon qiici kooribe. 37Qelli caacoona tookki shimaayite yokkoona cuye. Ebi aroon qelli caacee aafaa tuniibe. 38Ebinoo Harooni bi barooch gede. Israꞌeeleenaꞌo bariiꞌi boonoshi immiibeeti wojjoon, ebiyoo yaafeeti deejjoon giddiibee boonoshi xuqqiti amee xuꞌoonona shaaggemmone. Doono Yeeri ta, ebi deejjoon gaawe aafoona ta ciinnemmoyich, bulli aaboon Harooni barooch beebe.
39“Kittoonaa qelli caacoonon muttee tuppoochee ciciitaa yokkeeti woshiqoona shippeti qoreddoochee shuunebe. Buroo shashiitaa shippeto tunebe.
Bare Taheenaꞌo
40“Harooni anaami bushiisheenaꞌoyich oogee yiiroonaa malletoonon bi immemmoyich, kitteenaꞌon, bureenaꞌonaa qelli caaceenaꞌonon shuunebe. 41Ebi taheenaꞌon ne manoo Harooninaa bi anaami bushiisheenaꞌonoyich ne tajjitoyee gubb, zayitoon boonoshi shimbooch huutiree, qeesheenaꞌon tuniibe. Qeesheenaꞌo tuneree taach boonoshi maddemmoyich, yaafibe.
42“Shimetoochee doshooch beddemmi, ashittinoon qeremmi qamini maaci shuroon muttee tuppoochee ciciitaa yokkeeti woshiqoona shippeti qoreddoochee boonoshich shuunebe. 43Harooninaa bi anaami bushiisheenaꞌona danee duukkaanooch boonoshi giyimmi aaboon woyee Yaafe Xaaꞌoochaa maddeya deejjee gudooch boonoshi giddemmi aaboon, xuꞌoon shuuneree boonoshi qitaachemmoyich, ebi shuroon eddebeete.
“Harooninaa gubbi bi shiijjereenaꞌonoyich ebi bulli yemeenee doyoo tunemmone.
Currently Selected:
Keyo 28: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
