Keyo 21
21
Hibiree Guunoyich Tunemmi Doyoo
(Yibbaatoo 15:12-18)
1Doono Yeeri Muusich daakkiꞌi ishichiye: “Israꞌeeleenaꞌoyich ne dojjemmi doyoo ebine:
2“Hibiree yaroo tuneti guunon ne kemegaata, shiritte naton neech maddebe; shabaattinnee natooba, amoonolla qocaanoon baad gawukkaa hambe. 3Bi ikkeeton baach ne kemeto bi tunegaata, bi ikkeeto gawukkaa hambe. Bi mecheena tookkaa ne kemeto bi tunegaata, areyoo tookki hambuye. 4Uroochi doono mecheen biich shaakkiito bi tunegaata, anaami bushiishoon woyee maache bushiishoon shiyeti bi tunegaatoo, ureenaa bi bushiishoona uroochi doonochinaꞌo tunebeete. Uroo bi ikkeeto gawukkaa hambe.
5“Tunebaani hini are guuno, ‘Ta doonon, ta mecheenaa ta bushiishoonon shunnaabeeto taane; ebich hamaache’ bi getigaata, 6bi doono nallechinaꞌo waan daambe; aroochee kellee shaaqqooch woyee qoomooch tuggiichi, ikke bi waamon mutoona hottibe; ebina hini guuno bi qitimmi wottoon bi doonoyich guunon tunemmone.#Lew. 25:39-46
Hibiree Gonneyich Tunemmi Doyoo
7“Ikke asho bi busheen gonnee bi tunemmoyich bi kemigaata, guuninaꞌochoommon baad gawukkaa hammaayuye. 8Mechee bi tunemmoyich qaawiti bi doono ureena emiraano bi tunegaata, biishoon deꞌiree wochi daachiibe; tun bedaani mooyon ure toommooch bi tuniitoyich, shiqqoyich kemon hakkaache. 9Ikke asho gonneen bi bushoyich shaakkiya kemeto bi tunegaata, bi busheyich bi tunii beetoommon areyichoo tuniibe. 10Ikke asho bare mecheen bi shaagigaata, bi qaabbe mecheyich maayoon, tahoonaa shaagee doyoonon shappayaaye. 11Ebi keejje mooyon biich ceechaachemmo bi tunegaata, amee mooyonona qochiyaanoon baad cikki gawukki daachiibe.
Gonde Asheenaꞌon Sheeroo
12“Ashoon yexxii wuximmo qitibe. 13Tunetaa ariyaanoon diqqoona wuxito bi tunegaata, murici hamiree bi wodemmoyich ta ittoshich kaaccemmi xaaꞌooch hamiree wodibe.#Had. 35:10-34; Yibba. 19:1-13; Yaas. 20:1-9 14Tunebaani ikke asho gabii kuxxiꞌi bare ashoon bi wuxigaata, ta deejjee gudee xaaꞌooch aasheto bi tunetaanoona, geechi kichi daamaa qitibe.
15“Bi nihoon woyee bi indeen yexxiibeeto qitibe.
16“Ikke asho ashoon giidoona yechii bi kemigaata woyee bi waan kotiibee bi yechegaata, ebin tuniiti asho qitibe.
17“Bi nihoo woyee bi indee toommooch qallayee yibbaatoon yibbaateebeeto qitibe.
18“Gutte asheenaꞌo kaareꞌi, ikkoo baroon xaqqoona bi yexaa woyee bi tuketaa, yexxeti uro qitaano bi tunegaata, tunebaani qaakkeꞌi tokketeechii, 19aroochee tiyii gumboon tugeꞌi hammiibeeto bi tunegaata, shuuneyaanoon bi beshiiti aaboyich gijjoon nummoonaa uro wodimmi wottoon, gufonoyee besh yexxiti uro sheereyaaye.
20“Ikke asho bi guunon woyee bi gonneen gumboona bi yexaa, bekkech bi qitigaata, bi doono sheereebe. 21Tunebaani ikke woyee gutte qemi daggooch ebi guuno woyee gonnee qitoo qayigaata, boonoshi doonochi hajjeenaꞌo boonoshi tunetoyich, uro sheereyaaye.
22“Asheenaꞌo boonoshinaa boonoshina kaareꞌi xifechi ureen boonoshi yexaa, bushoo shiijjee qiccegaata, tunebaani ure toommooch qaaꞌi iritoon deebaano bi tunegaata, ure toommooch ebin tuniiti uro ureechi keno echetonaa nallechinaꞌo nallitonon nummebe. 23Tunebaani ure toommooch qaaꞌi mooyon shakkiito bi tunegaata, ichemmi sheeroo ebine: Wuxito bi tunegaata, qitibe; 24aafoon dookkito bi tunegaata, bi aafo dooge; gashoon tiichito bi tunegaata, bi gasho tiishebe; kishoon tiichito bi tunegaata, bi kishoo tiishebe; baatoon tiichito bi tunegaata, bi baatoo tiishebe; 25qaaqqoona michito bi tunegaata, qaaqqoona mice; yexxii mayiito bi tunegaata, yexaa mayebe; arengoona xoobbito bi tunegaata, arengoona xooppebe.#Lew. 24:19-20; Yibba. 19:21; Maat. 5:38-41
26“Ikke asho bi guuno woyee bi gonnee aafoon yexxii bi dookkigaata, ebi aafee nummoon baad cikki gawukki daachiibe. 27Guunochi woyee gonneechi gashoon bi tiishigaata, ebi tiisheti gashee nummoon baad cikki gawukki daachiibe.
Gijjoo Koyigaata Tunemmi Sheeroo
28“Gattoo ashoon kochii bi wuxigaata, xaqqoona yexaa qitibe; bi meenoo manjeyaaye. Gattoochi doono echeyaachemmone. 29Tunebaani bi gattoo kochecho bi tunoon getaa ariibee, tifaanoon bi qayaa, ashoon kochii bi wuxigaata, gattoo xaqqoona yexaa qitibe; bi doonoo qitibe. 30Tunetaa uro nummoon bi nummemmoyich echee gaata, echeeto bullin qociree bi kashoon biishebe. 31Gattoo ashi bushoon woyee busheen bi koyigaata, ebi sheeroommon bi toommooch nalleebe. 32Gattoo guunon woyee gonneen bi koyigaata, gattoochi doono shaashe sheqeelee birewoon are guunochi woyee gonneechi doonoyich qoce; gattoo xaqqoona yexaa qitibe.
33“Ikke asho oppoon aaho bi qayaa woyee oppoon iijjiichii hicaanoon bi dufaa, gattoo woyee kuro arooch bi giyigaata, 34oppoon iijjiti uro gijjee doonoyich qoce; qititi meeshoo biicho tunebe.
35“Ikke ashi gattoo bare ashi gattoon kochii bi wuxigaata, kashoona beeti gattoon kemiree qititi gattoochi meeshoona tookki tatoon qoodeebeete. 36Tunetaa gattoo kochecho bi tuno arichee beetaa, bi doono tifaano bi tunegaata, qititi gattoochi qoodoon kashoona beeton bi doonoyich qoce; qititi meeshoo biicho tunebe.
Currently Selected:
Keyo 21: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
