Keyo 19
19
Israꞌeeleenaꞌo Siini Guudi Ciinooch Shago
1-2Israꞌeeleenaꞌo Refidiimee tiyiyeete. Gibitsee showoon gawukkii boonoshi kechitoyee gubb, keejjinnee agenee ikkinnee qemooba, Siini barahooch waaheete. Arooch shaggiꞌi, guudi ciinooch kaamboon geddii koteheete.
3Aroochee Muusi Yeerina daneya guudi toommooch kechiye. Doono Yeeriyoo are guudoochaa biin ceeggiꞌi ishichiye: “Yaaqobi yareenaꞌo tuneti Israꞌeeleenaꞌoyich ne gettemmo ebiniye: 4‘Gibitseenaꞌo toommooch amo ta tuniito gaata, wotta booyo bi bushiishoon bi qoshoona bi shaagoommon, tawoo ittoshin ta waan aabichaꞌa ta deebeto gaata ittoshi, ittoshi qelloona beeggito ittoshine. 5Showee toommooch beeti aagetoo bulli taachone; tunebaani aagetoo bulliyee taach shucheti, ta hajjee asho tunemmo ittoshine. Ebiyoo manjiyaꞌa taach deꞌa ittoshi getigaata, ta wogoonoo ittoshi quyegaatane. 6Taatoo Yeeri taach maddeebeeti qeesheenaꞌon, yaafeeti aagetoon tunemmo ittoshine’ gete. Israꞌeeleenaꞌoyich ne gettemmi qaaro ebine” iye.
7Ebich Muusi wotteꞌi, Israꞌeeleenaꞌochi ukkireenaꞌon ceeggiye; bi gettemmoyich Doono Yeeri biich gettiti qaaro bullin boonoshich gettiye. 8Asheenaꞌo bulli ikkittinoona, “Doono Yeeri gettito bullin tuniyemmo noone” iyeete. Ebich Muusi boonoshi gettiti mooyon wochii Doono Yeerich daammiye.
9Doono Yeeri Muusich “Neenna tookki ta yibbaate beetaa, asheenaꞌo waayemmonaa bulli aaboon neen boonoshi gibenemmonoyich, dunne quboona ne waan woyemmo taane” iye.
Aroochee Muusi asheenaꞌo gettiton Doono Yeerich gettiye.
10Doono Yeeriyoo Muusich ishichiye: “Asheenaꞌo waan hamiree, hanaachinaa yaachinon boonoshin yaafibe. Boonoshi tahoon boonoshi machemmoyich gete. 11Sharittich qannibeete. Sharitta Doono Yeeri ta, asho bulli ciini beetaa, Siini guudooch kindemmo taane. 12Asheenaꞌo guudooch boonoshi shagaachemmoyich, bi guudoon daarebe. Boonoshichoo ishichibe: ‘Guudi toommooch kechaahote. Guudi gaadoonona yechaahote; ittoshin ariibote! Koniyoona ebi guudon bi yeshigaata qitibe. 13Ashi kishoo bi toommooch shagaanoon xaqqoona yexaa woyee shangoona koyaa qitibe. Asho tuneba gijjoo koniyoona kashoona bi beeyemmoyich qachaaye’ gete. Tunebaani guudi gaadooch shago bi hakkeyemmo, oogeti qaaroona tiroo (waaringo) hukkegaata baachiye” iye.
14Muusiyoo guudoochee kindiꞌi asheenaꞌo waan bi hammitoyee gubb, boonoshin yaafiye; boonoshi tahoonoo machiyeete. 15Asheenaꞌoyichoo, “Sharittich qannibote. Arooch beddaahaa maachee waan shaggaahote” iye.
16Keejjinnee qemooba, maaddoona dunne qubo guudi toommooch tunehe; xeeyoo xeejjiye; showoo phaqqiye; wotta oogeti tiree qaaro waayeehe. Kaambooch beeti asho bulli keqqoona qewehe. 17Aroochee Muusi Yeerina tookki boonoshi danemmoyich, asheenaꞌon boonoshi beeti kaamboochee yechiꞌi kechiye; boonoshiyoo guudi baatooch neexeheete. 18Doono Yeeri qaaqqoona bi kinditoyich, Siini guudon cufoo kaappitone; cufoo qaaqqee gudoochee kechii beetoommon tuneꞌi kaama tuqiye; guudo bulliyoo oogeton qewehe; 19tiree qaaro oogee oogee hammiye. Aroochee Muusi yibbaatemmona, Yeeri oogeti gigee qaaroona wochiye.
20Doono Yeeriyoo Siini guudi toommooch kindiye; Muusinoo guudi toommooch bi kechemmoyich ceeggiye; Muusiyoo kechiye. 21Doono Yeeriyoo biich ishichiye: “Asheenaꞌo Doono Yeeri taan beegga guudi gaadoon besheree meetinaꞌo boonoshi aalleyaachemmoyich, kindiree boonoshich manjii gete. 22Doono Yeeri ta waan giddeebeeti qeesheenaꞌona yaafeebeete. Ebi tuno qayigaata, Doono Yeeri ta boonoshin naxemmo taane” iye.
23Muusiyoo Doono Yeerich ishichiye: “Asheenaꞌo Siini guudi toommooch keyo hakkaacheete; ebiyoo ne, ne qelloona, ‘Bi guudoon daarebe; yaafeeton tuniiree bariibe’ iyaꞌa nooch ne gettetoyichiye” iye.
24Doono Yeeriyoo Muusich ishichiye: “Kindiree, Haroonin yeshi damba keye. Tunebaani qeesheenaꞌonaa asheenaꞌona Doono Yeeri ta waan womoyich guudi gaadoon beshaayeete. Boonoshi beshegaata, boonoshin naxemmo taane” iye.
25Ebich Muusi asheenaꞌo beetooch kindiꞌi, Doono Yeeri gettiton boonoshich gettiye.
Currently Selected:
Keyo 19: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
