Keyo 17
17
Xaqqoochee Xuupphiti Aaco
(Haddoo 20:1-13)
1Israꞌeeleenaꞌo bulli Sini barahoochee tiyiꞌi, Doono Yeeri boonoshich gettitoommon, ikke xaaꞌoochee bare xaaꞌooch qaxiriibee Refidiim shaggiꞌi, arooch kaamboon geddii koteheete. Tunebaani asheenaꞌo uchemmi aaco aalloone. 2Ebich “No uchemmi aacon nooch imbe” iꞌi Muusina kaareheete.
Muusiyoo “Taanna amoyichiye ittoshi kaareebeeto? Doono Yeerinoo amoyichiye ittoshi phireebeeto?” iye.
3Tunebaani asheenaꞌo ebi aroochaa oogeton boonoshi shachewetoyich, Muusi toommooch guruuxiibee, “Noonnaa no bushiisheenaꞌona, no gijjeenaꞌoo shachewoona ciiremmoyich, amoyich Gibitsee noon kichinne?” iyeete.
4Aroochee Muusi “Ebi asheenaꞌon aabichishiye ta gettemmo? Xaqqoona taan yexi wuxiya ii beetinaꞌone” iꞌi Doono Yeer waan cookiye.
5Doono Yeeriyoo Muusich ishichiꞌi wochiye: “Asheenaꞌoyee shiichi hambe. Israꞌeelee ukkireenaꞌoochee ikkikkeenaꞌon, ebiyoommon wotta Abbaayi aacon ne yexxeti ne gumboon yeshiree hambe. 6Tawoo Kooreebi guudooch beeti xaqqee toommoochaa ne aafooch neexemmo taane; xaqqoonoo yexe. Asheenaꞌo uchemmoyich aroochee aaco xuupphemmone” iye.
Ebich Muusi Israꞌeelee ukkireenaꞌo aafoochaa ebin tuniihe. 7Ebi xaaꞌoonoo Masaahinaa#17:7 Masaahi geto, “Phireyoo” getone. Meriibina#17:7 Meriibi geto, “Kaaro” getone. iꞌi shigiihe; ebiyoo Israꞌeeleenaꞌo kaaroon tiijjiꞌi, “Doono Yeeri noonna tookkii beete, aalle?” iꞌi Doono Yeerin phireya boonoshi tiyitoyichiye.
Israꞌeeleenaꞌo Amaleeqeenaꞌon Kochii Wochoo
8Israꞌeeleenaꞌo Refidiim boonoshi beetaa, Amaleeqeenaꞌo waaꞌi boonoshin kochiyeete. 9Muusiyoo Yaasich ishichiye: “No asheenaꞌoochee kaaci daamiree, yaach Amaleeqeenaꞌon koyoyich keye. Tawoo Doono Yeerichi gumboon ta kishooch yeshiree, geppee cillooch neexemmo taane” iye.
10Ebich Yaasi, Muusi gettitoommon, Amaleeqeenaꞌona koyehe. Arooba Muusi, Harooninaa Huurina geppee cillooch kechiyeete. 11Muusi bi gutte kishoon kaama bi tiijjimmi haddoona, Israꞌeeleenaꞌo kochii wochii beeheete; tunebaani Muusi bi kishoon bi kindiimmona, Amaleeqeenaꞌo Israꞌeeleenaꞌon kochii wochii beeheete. 12Muusi kishoo taahiꞌi niree niree hammitoyich, Harooninaa Huurina Muusi kotemmoyich xaqqoon deebii geddiyeete; bi qanninaa bi yoochinooch neexeꞌi, aabe giyemmi wottoon, bi gutte kishoon kaama tuuggii yechiyeete. 13Ebiyoommi gommona Yaasi Amaleeqee ginechinaꞌon goraadoona kochii wochiye.
14Ebiyee gubb, Doono Yeeri Muusin “Ebi mooyo bulli aaboon shalligee bi beeyemmoyich, macaafooch kooribe. Showee toommooch beeti asho koniyoona Amaleeqeenaꞌochi shigoon bi shalligaachemmoyich, boonoshin ciroona hidi aalliyemmo ta tunoon Yaasich waayiiree shemmebe” iye.
15Muusiyoo deejjee gudoon shuuneꞌi, Doono Yeeri Ta Baanderoo#17:15 Doono Yeeri ta baanderoo geto, “Doono Yeeri ta etteenaꞌon kochii wochecho” getone. iꞌi shigiihe. 16Biyoo “Doono Yeerichi baanderoon kaama tiijji yeshote. Doono Yeeri Amaleeqeenaꞌon shiijjeroochee shiijjerooch beddaahaa kochemmone” iye.
Currently Selected:
Keyo 17: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
