Keyo 11
11
Gutenee Bushiishoon Wuxemmi Naxeechon Shiichiꞌi Yeeri Geto
1Aroochee Doono Yeeri Muusich ishichiye: “Farooninaa Gibitsee showoonooch daakkiree ikke naxoon kindiyemmo taane; aroyee gubb Farooni ittoshin gawukkemmone. Bi gawukkiyooba, ittoshi bullin gashe kichemmone. 2Andoo Israꞌeeleenaꞌo, anaaminaꞌo tunebeeta maacheenaꞌo, Gibitseenaꞌo tuneti boonoshi giyeenaꞌo waanee aachoonaa birewoonoochee shuuneeti shashoon boonoshi echemmoyich gete” iye. 3Doono Yeeriyoo Israꞌeeleenaꞌo Gibitseenaꞌo aafooch gidoon boonoshi danemmoyich tuniihe. Muusiyoo Gibitsee showooch Faroonichi iraasheenaꞌonaa asho bullinochi aafooch oogeton naadeeti ashoone.
4Aroochee Muusi Faroonich ishichiye: “Doono Yeeri ishichiye: ‘Xumee gutte qellimooch Gibitsee showoo bullina beshemmo taane. 5Taatee qeenooch koteti taatoo ne bushoochee tiijjiree, xaqqoon yiikkeebeeti gonneechi bushooch beddaahaa, Gibits beeti gutenee bushoo bulli qitemmone; ebiyoommon gijjeenaꞌoochee shiichii shiijjeti qaabboo bulli qiti ciiremmone. 6Gibitsee showoo bulliich ebiyee aaf tunee ariyaani, ebiyee gubboo waayeyaachemmi oogeti caago tunemmone. 7Tunebaani Israꞌeeleenaꞌonaa boonoshi gijjeenaꞌonochi toommooch kunaanolla buhaachemmone. Ebina Doono Yeeri Gibitseenaꞌonaa Israꞌeeleenaꞌonon bariito bi tunoon ariyemmo ittoshine’ itone. 8Hini ne iraasheenaꞌo bulli ta waan waaree yiti tiyibee, ‘Newoo tuneb neen dabbiibeeti asho bulli keyi hambote’ geti qollemminaꞌone. Tawoo aroyee gubb hammemmo taane” iye. Aroochee ippee shineꞌi, Farooni aafoochee kechiye.
9Doono Yeeriyoo Muusich ishichiye: “Farooni ittoshi getaa waayeyaachemmone. Ebiyoo, gaakkechi ta shuunoon Gibits woddoona ta bekkiyemmoyichiye” iye. 10Muusinaa Harooninoo ebi gaakkechi shuunoo bullin Faroon aafoochaa tuniitinaꞌone. Tunebaani Doono Yeeri Farooni mulloon muumiitone. Ebich Israꞌeeleenaꞌo bi showoochee keyiree hammemmoyich boonoshin gawukkaanoone.
Currently Selected:
Keyo 11: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
