Asteeri 6
6
Mordokiyoosin Taatoo Oogiyoo
1Aroobee xum taatoon tokketoo qajjiye; ebich taatee showooch tuneti, batteya bedaani mooyo kooreebeeti kiinee macaafoon deebi boonoshi shemmemmoyich gettiye. 2Aroochee taatoo Yekisesi qemi kexooch giijjiibeeti kelloon quyeebeeti, Bigitaaninaa Tereeshina getteebeeti gutte guruusheenaꞌo taatoon wuxoyich koceeꞌi boonoshi tuniiti mooyonaa ebi mooyon Mordokiyoosi getona kooreeꞌi danehe.#Ast. 2:21-22
3Taatoo ishichiye: “Ebin bi tuniitoyich, Mordokiyoosich amee oogoonaa gaacoonane icheto?” iꞌi echehe.
Bi aafee bushiisheenaꞌo wochiꞌi, “Biich tuneti amee mooyolla aalloone” iyeete.
4Taatoo “Taatee kexooch beeto, konine?” iꞌi echehe.
Areegaata Hamaani bi qanniiti giimbooch Mordokiyoosin yooddiyoyich taatoon daaggiiya taatee kexoyee maach beeti addibaabooch batt shaggitone.
5Taatoo aafee bushiisheenaꞌo wochiꞌi, “Hamaanine” iyeete.
Taatoo “Gibe getote” iye.
6Hamaani giyimmona, taatoo biich ishichiye: “Taatoo oogiiya oogichiꞌi bi qaawiti ashich, amo tuneba?” iꞌi echehe.
Hamaaniyoo bi mulloona “Taatoo tayee besh bi oogiyemmi asho, koni beete?” iꞌi gabiye. 7Ebich taatoyich ishichiye: “Taatoo oogiiya bi qaawiti ashich, 8taatoo taheebeeti taatee tahoonaa taatoochi malletoo beeti gubbichoon bi shimbooch uketi, taatoo yebbeebeeti hareshoona wobe. 9Aroochee are tahoonaa hareshoona aricheti iraasheenaꞌo daggoochee ikkoyich ichebe; biyoo taatoo biinna emiriꞌi oogiiya bi qaawiti uroyich ebi tahoon tajjibe; hareshoonoo yebbiiree katemee daggeexi addibaaboon guudiibee, ‘Taatoo oogiiya bi qaawiti ashich ebi tunee beetone’ geti cookibee awaajjibe” iye.
10Aroochee taatoo Hamaanich ishichiye: “Kaate hamiree, taatee tahoonaa hareshoonon deebe. Taatee kechi uxeree kellooch koteꞌi beeti Ayihudo Mordokiyoosich, ebi ne gettetoommon tuniibe; ebi ne gettetoochee ikke mooyonona shappiiyaahine” iye.
11Ebich Hamaani taatee tahoonaa hareshoonon deebiye; tahoonoo Mordokiyoosich tajjiye. Hareshoon yebbiiꞌi, katemee daggeexi addibaaboon guudiibee, “Taatoo oogiiya bi qaawiti ashich ebi tunee beetone” ii cookiibee awaajjii beehe.
12Aroochee Mordokiyoosi taatee kechi uxeree kellooch wottehe; tunebaani Hamaani yeelloona bi aafoon kaappiꞌi bi kexooch afaafinoona hammiye. 13Bi toommooch shaggiti mooyo bullinoo bi mechee Zereeshinaa bi shunechinaꞌo bullinoyich gettiye.
Bi mecheenaa shalligechi bi shunechinaꞌona ishichiyeete: “Bi aafooch ne giishaabeeti Mordokiyoosi yaroo Ayihudo bi tunetoyich, biin hakkaachemmo neene; ne qelloona ne aallo xiisheetone” iyeete.
Hamaanin Taatoo Yooddiyoo
14Yibbaatee toommooch boonoshi beetaa, taatoo aafee bushiisheenaꞌo tuneti guruusheenaꞌo shaggiꞌi, Hamaanin Asteeri qanniiti gifirooch afaafinoona bi hammemmoyich tuniiheete.
Currently Selected:
Asteeri 6: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.