Asteeri 1
1
Oogeti Gifiroon Taatoo Yekisesi Qanniyoo
1Hiindee showoochee tiijjiꞌi Topphiyee showooch beddaahaa beeti balli hiyaa shabaatte woraafeenaꞌon hajjiibeeti, taatoo Yekisesi yemeenooba ebi tunehe. 2Arooba taatoo Yekisesi, inde katemoo Suusa beeti taatee qeenooch koteꞌi taateebee, 3bi taateti keejjinnee natooba bi showooch beeti iraasheenaꞌonaa ukkireenaꞌonoyich gifiroon geddiye. Faariisee showoonaa Meedee showoonochi ginee iraasheenaꞌo, taatee kechi mikkirechinaꞌonaa woraaferasheenaꞌona bi waan waaꞌi ebi gifirooch danetinaꞌone.
4Boonoshichoo ooge bi taatee gaannoonaa bi taatee oogee yiiroonon ceeni shiritte agenoon bekkiihe. 5Aroyee gubb taatoo inde katemoo tuneti Suusi daggooch beeti asho bullich, gaannechonaa girechonon bariyaanoon, bi guudoona becheeti mixinaꞌo beeti, taatee kechi addibaabooch shabaatte qemi gifiroon geddiye. 6Ebi addibaabooch huuttoochee shuuneeti, naccoonaa shimaayitoona tuneti maccillaatoo tippetone; bi tippeto, muttee tuppoochee yokketaa shuuneeti, bi cillooch birewee qalibeto yesheti, damere woderoona nacce xaqqoochee shuuneeti giimboochiye. Naccoonaa ceelloonon tuneti xaqqoona, wotta inqoonaa aaxxe xaqqoona shashiitaa shuuneeti godooch aachoonaa birewoonoochee shuuneeti qeeninaꞌo beetinaꞌone. 7Bi shaahoo ikkoo baroyee bariti aachee xoofoona uyo giddee beehe. Taatoo mulloochee tiijjiꞌi ebin bi tuniitoyich, taatee kexeexi woyinee uyo beddii echetone. 8Uyo ebine, getteyaani woddoone; woyinee uyee qoomechinaꞌo asheenaꞌoyich boonoshi qaawitoommon boonoshi immemmoyich taatoo gettitone.
9Gennee abeeti Ashixiini wotta ebiyoommon taatoo Yekisesi taatee kexoochaa genneenaꞌoyich gifiroon geddetine.
Bi Oogoochee Ashixiini Kindoo
10Taatoo gifiroon bi gedditi shabaattinnee qemooba, woyinee uyoon uchii bi ashittino qeeccimmona, guruusheenaꞌo tuneti shabaatte bi aafee bushiisheenaꞌo, Mehuumaani, Biziti, Haribooni, Bigiti, Abagiti, Zetaarinaa Karikaasinoyich ishichiye: 11“Gennee abeeti Ashixiini taatee kechi gubbichoon ukeree hiniich bi woyemmoyich tuniibote” iꞌi gettiye. Bi ishichito, gennee abeeti malletechi bi tunetoyich, bi malletoon iraasheenaꞌonaa asheenaꞌo bullinoyich bekkiiya bi qaawitoyichiye. 12Aafee bushiisheenaꞌo taatoochi wochoon gennee abeeti Ashixiinich getaa, “Waataache” iyaꞌa qajjahan. Ebi mooyo taatoon oogichiꞌi ippiihe; biyoo oogeton kaarehe.
13Ebich sheeroonaa dayinnetoonon ariibeeti yiiteenaꞌon echo taatoyich doyoo bi tunetoyich, yemeenee mooyon shalligiibeeti yiiteenaꞌona tookkii ebi mooyon yibbaatehe. 14Eboshiyoo Karisheeni, Shetaari, Adimaati, Tarisheshi, Mereesi, Mariseeninaa Memuukinane. Ebi Faariisinaa Meedinochi showee shabaatte iraasheenaꞌo taatoochi katini asheenaꞌonaa iraasheenaꞌo bulliyee beshe iraasheenaꞌonane.
15Biyoo boonoshich “Guruusheenaꞌona wocheeti, ta, taatoo Yekisesi wochoon bi qajjetoyich, gennee abeeti Ashixiini toommooch tunemmi mooyichon sheeroo ama ii beete?” iꞌi echehe.
16Aroochee taatoonaa iraasheenaꞌonochi aafoochaa Memuuki ishichiye: “Gennee abeeti Ashixiini qallayito, taatoon baach tuneyaanoon, iraasheenaꞌo bullinaa taatoo Yekisesi woraafeenaꞌo bulliich beeti asheenaꞌo bullinoniye. 17Ebi gennee abeeti Ashixiini mooyon genneenaꞌo bulli waayemminaꞌone. Boonoshiyoo ‘Taatoo Yekisesi gennee abeeti Ashixiinin bi waan bi woyemmoyich bi ceekkiitaa qajjetine’ getiree, boonoshi keneenaꞌon qallayemminaꞌone. 18Hanaach ebi gennee abeeti mooyon waayeti, Faariisinaa Meedinochi showee iraasheenaꞌochi mecheenaꞌo ebiyoommon boonoshi keneenaꞌoyich gettemminaꞌone; ebina mecheenaꞌo boonoshi keneenaꞌon qallayemminaꞌone; keneenaꞌonaa mecheenaꞌona kaaremminaꞌone.
19“Ebi mooyo taatoon emirikkemmo bi tunegaata, gennee abeeti Ashixiini taatoo waan bi giyaachemmoyich, awaajjo keye; ebi awaajjoo bi shaddeyaachemmoyich, Faariisinaa Meedinochi showee sheerooch kooreebe. Taatoo gennee abeeti bi tunee oogee xaaꞌoonoo biyee beshiti bareyich imbe. 20Aroochee taatoochi awaajjo gamini bi showoo bulliich getteemmona, maacheenaꞌo bulli gaannecho woyee girecho getaanoon, boonoshi keneenaꞌon oogiyemminaꞌone” iye.
21Ebi ciico taatoonaa iraasheenaꞌonon emirikkiye; Memuuki gettiti mooyon taatoo tuniihe. 22Anaamo bulli bi ikkikkoona bi kexoyich doono bi tunemmonaa bi hajjee noonoona bi yibbaatemmonoyich, taatoo wochoon asheenaꞌo yibbaateebeeti baribare noonoonaa boonoshi kooriibeeti baribare biroona kooriiꞌi, taatee showooch beeti woraafeenaꞌo bulliich daachiihe.
Currently Selected:
Asteeri 1: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.