Dojjecho 2
2
Qellee Shuno Gaacaallo Tuno
1Tawoo ta mulloona, “Ta qelloon emirikkoona emiroo amo gaata beegona” iyo; tunebaani ebiyoo duuboone. 2Miico geyo bi tunoon beeggeho; emiroo bi gaaco amoone? 3Asheenaꞌo qamini boonoshi kashee yemeenooch boonoshi tuniyemmi gaawe mooyo amo gaata ta beeggemmi wottoon, ta shalligoona yaabeyaꞌa, ta ashittinoon woyinee uyoona emirikkoyich, yeexerittinoonoo yeshoyich ta mulloona qiicceho.
4Aricheti meeti mooyinaꞌon tuniiho; ta qellich kexinaꞌon haggeho; woyinoonoo bechiyo. 5Bechee mixinaꞌon bechaꞌa yanneto tuniiho. Ebi arooch aafeebeeti baribare mixinaꞌon bechiyo. 6Ebi mixinaꞌon uchoyich aachi oppeenaꞌon iijjeho. 7Guuninaꞌonaa gonneenaꞌonon kemeho; kexooch shiijjeti guuninaꞌoo taach beeheete; tayee aaf Yerusaalem beebee echetinaꞌoyee beshe miimon, bagoonaa emmishoonon hajjiyo. 8Ta qellich aachoonaa birewoonon kiciyo; taateenaꞌonaa woraaferasheenaꞌona boonoshi gaannoon taach beshiiꞌi immiyeete. Shoddeebeeti anaaminaꞌonaa maacheenaꞌonon qannayiyo; ashoon emirikkiibeeti meeti naamacheenaꞌon kiciyo.#1 Taat. 10:23-27; 2 Kiin. 9:22-27
9Ebina tayee aaf Yerusaalem beebee echetinaꞌo bulliyee beshoon oogeho. Andoo ta shalligoo ta waan manjiꞌi beetone.#1 Kiin. 29:25
10Ta aafo ciinniꞌi qaatito bullin daneho; ta mulloyichoo emiroon bayaano taane; ta shuuneto bullina ta mullo emiriye; ebiyoo ta aayo bullichi gatiyoone. 11Ta shuuneti shuunoo bullin, shuunaa danoyichoo ta aajjeti aayo bullinoo gabaꞌa bulliyona duubo bi tunoon, yongoon yookkii dabboommo bi tunoonoo ariiho. Hini showee toommooch gaacechi amee mooyolla aalloone.
12Tawoo shalligoo, geyoonaa tuushoona amo gaata ariiya qaawiyo. Aafi taatoo tuniitoyee besh digeni taatoo amoon tuniyoon hakkehe? 13Bekko manderoyee bi beshoommon shalligoo tuushoyee bi beshoon beeggeho. 14Mullechi asho gommon ciinniꞌi shaꞌehe; tunebaani mullaallo manderoona shaꞌehe. Ebi tunetaa boonoshi gutti ciiro hajjaa shaahoo bi tunoon shalligiyo. 15Aroochee ta mulloona “Mullaallo toommooch shaggiibeeto ta toommoochoo shaggemmone; ishigaata, ebi shaahoon mullecho ta tunee gaaco amoone?” iyo. Andoo ta mulloona “Ebiyoo duuboone” iyo. 16Mullechi asho tuneba mullaalli asho bulli aaboon shalligee betaachemmone; waabeeti yemeenooch bulliyona batteyemmone. Wuche, wuche! Mullechoo mullaallo qitoommon bi qitemmo aabichireeshiye!
17Hini showee toommooch tuneebeeti mooyo taan bi maggetoyich, kashoon shixxeho; bulliyona duubo, yongoon yookkii dabboommone.
18Tayee gubb woyemmi ashoyich dufiichi hammemmo ta tunetoyich, hini showee toommoochaa ta aajjeto bullin shixxeho. 19Ebi asho mullecho woyee mullaallo bi tunoon koni ariihe? Tunebaani hini showee toommoochaa ta aajjetonaa ta shalligoona ta daneto bullinochi toommooch doonjemmo biine; ebiyoo wotta duuboone. 20Ebich hini showee toommoochaa ta aajjeti aayo bullina ta gibenoon kuxxo. 21Asho shalligoona, ariyoonaa acona bi aajjiti aayo bullin, bare asho bi aayaanoona bi emiremmoyich duppiichii hammii beetone. Ebiyoo duubo, gondeexi gonde mooyone. 22Ashoo showee toommoochaa bi aajjiibeeti aayonaa yulloonoochee bi danemmi gaaco amoone? 23Bi yemeeno bullin bi shuunoo xuuxoonaa ayinoonane; xumoonona bi eengoo kashee qeyaanoone; ebiyoo wotta duuboone.#Iyoob. 5:7; 14:1
24Ashich mamonaa uyonoyee, bi shuuneti shuunoona emiroonoyee besh, gaawe mooyo aalloone. Ebiyoo Yeer waanee bi ichoon beeggeho.#Doj. 3:13; 5:18 25Bi daaggaanoon mamonaa emiroonon hakkemmo konine? 26Biin emirikkiibeeti ashoyich Yeeri shalligoon, ariyoonaa emiroonon immiye; tunebaani Yeeri biin shattii beetoyich bi immemmoyich, aajjiꞌi gaannoon kicoon axaaxechoyich immiye; ebiyoo duubo, yongoon yookkii dabboommone.
SIM International, 2020.