Yibbaatoo 4
4
Israꞌeeleenaꞌo Doono Yeerich Deꞌa Boonoshi Gettemmoyich Muusi Manjiiꞌi Geto
1Aroochee Muusi Israꞌeeleenaꞌoyich ishichiye: “Illa and Israꞌeeleenaꞌote, kashoona ittoshi beeyemmoyich, ittoshi qaabbechinaꞌochi Nuggishoo Doono Yeeri ittoshich bi immiibeeti showooch giyi ittoshi woraashemmoyichoo, ittoshich ta qociibeeti qociyoonaa ta dojjaabeeti doyoonon quyebote. 2Ebi ittoshich ta gettaabeeti qaaree toommooch amoonolla daakkiyaahote. Aroochee amoonolla shappiiyaahote. Ebi ittoshich ta gettaabeeti no Nuggishoo Doono Yeerichi getoon quyebote.
3“Doono Yeeri Baꞌaal Feꞌoori guudoochaa amoon bi tuniito gaata ittoshi aafoona beeggito ittoshine. Biyoo ebi aroochaa ittoshi daggoochee Baꞌaalo getteebeeti nuggishoyich goyinnee maddetinaꞌo bullin wuxii aalliitone.#Had. 25:1-9 4Tunebaani ittoshi Nuggishoo Doono Yeerich gibeneeti ittoshi bulli ebiyoche, hanaach beddaahaa kashoona beeto ittoshine.
5“Illa ebiyoche, ta Nuggishoo Doono Yeeri taach gettitoommon tuniiꞌa, qociyoonaa doyoonon ittoshich dojjito taane. Giyi ittoshi woraashemmi showoochaa ebin quyebote. 6Ebi ittoshich ta dojjiton manjiiꞌi ittoshi quyegaata, oogeti shalligechi asho ittoshi tunoon aagetee asheenaꞌoyich bekkiyemmo ittoshine. Ebi qociyoon boonoshi waayegaata, ‘Iberoon meetonaa arichetona tuneti ebi asheenaꞌo shalligechinaꞌonaa yiiteenaꞌona tuneti asheenaꞌone’ gettemminaꞌone.
7“No Nuggishoo Doono Yeeri bi waan no cookaa no waan bi katinoommon, bi nuggishoo bi waan katinniibeeti aricheti aagetoo, konine? 8Hanaach ittoshich ta immaabeeti sheeroommi kaame qociyoonaa doyoona biich beeti aricheti aagetoo konine?
9-10“Doono Yeeri ‘Asheenaꞌon ta waan kicibe. Showee toommooch kashoona boonoshi beemmi yemeeno bullin taan shaton boonoshi doyemmoyich, boonoshi bushiishoonoo boonoshi dojjemmoyich, ta qaaroon boonoshich waayiyemmo taane’ iꞌi bi gettiyooba, ittoshi Nuggishoo Doono Yeeri aafooch, Kooreebi guudooch ittoshi neexeti aaboon batteyaahote. Ebi ittoshi aafoona ittoshi beeggiti mooyon ittoshi batteyaachemmoyich, wotta kashoona ittoshi beemmi yemeeno bullin ittoshi mulloochee bi aalleyaachemmoyich, kupphiiree ittoshi qelloon ariibote! Ebi mooyon ittoshi bushiishoonaa bushaa bushiishoonoyichoo dojjibote. 11Ittoshiyoo ebi guudo shimaayooch shaggiti qaaqqoo bi toommooch conjii beetaa, aaꞌi quboonaa dunne manderoona bi toommooch kaappiꞌi beetaa, hammiꞌi guudi baatooch neexehote. 12Aroochee Doono Yeeri qaaqqee daggooch tuneechii ittoshich bi yibbaatetaa waayehote. Ittoshich bi yibbaatee beetaa waayehote; tunebaani bi shaahoo amoommo gaata beegaano ittoshine; ittoshi waayeto, qaaroon baachiye.#Key. 19:16-18 13Biyoo ittoshi quyemmoyich bi immiti, biinnaa ittoshinochi daggooch beeti wogoon, ebiyoo aashire geteenaꞌon ittoshich gettiye. Ebi aroonoo gutte yalle xaqqeenaꞌo toommooch kooriye.#Key. 31:18; 34:28; Yibba. 9:10 14Yoordaanoosin kimi hami ittoshi hajjemmi showoochaa ittoshi quyemmi qociyoonaa doyoonon ittoshich ta dojjemmoyich, arooba Doono Yeeri taach gettiye” iye.
Shahalloyich Boonoshi Goyinneyaachemmoyich Muusi Geto
15Muusi Israꞌeeleenaꞌoyich ishichiye: “Doono Yeeri Kooreebi guudoochaa, qaaqqee daggoochaa ittoshich bi yibbaatehooba, bi shaahoon beegaano ittoshine. Ebich ittoshi qelloon ariibote! 16Anaami woyee maache ashi shaahoona shaahiitaa shuuneeti, amee mooyonona ittoshi qellich shuunoona ittoshi eeꞌeyaachemmoyich ittoshi qelloon ariibote! 17Showee toommooch beeti cooxonaa gijjoonochi shaahiyoon, shimaayoona yoobbiibeeti kafoonaa gacoonochi shaahiyoon, 18showee toommona gaphiibee shaꞌeebeeti moochi shaahiyoon woyee aachi daggooch beeti haashee shaahiyoon amoonolla ittoshich shuuneyaahote.#Key. 20:4; Lew. 26:1; Yibba. 5:8; 27:15 19Damba shimaayooch ciiniree, aabeen, ageneenaa xojjenoonoyich ne goyinne maddemmoyich ne mullo neen bi geechaachemmoyich, ne qelloon ariibe! Ne Nuggishoo Doono Yeeri eboshich boonoshi goyinne maddemmoyich showee toommo bulliich beeti asheenaꞌon beshiiꞌi immitone. 20Tunebaani ittoshi and ebi ittoshich bi tunetoommon bi hajjee ashoon ittoshi tunemmoyich, ittoshi Nuggishoo Doono Yeeri xuuroon wociibeeti qaaqqee sheelloommi Gibitsee ittoshin kichiꞌi deebitone.#Key. 19:5; Yibba. 7:6; 14:2; 26:18
21“Ittoshi naboona Doono Yeeri taan kaarehe. Yoordaanoosin ta kimaachemmoyich, wotta ittoshi Nuggishoo Doono Yeeri iristo tunii ittoshich bi immemmi gaawe showooch ta giyaachemmoyich wogeꞌi bajjiye.#Had. 20:12 22Tawoo hini showoochaanane ta qitemmo; Yoordaanoosin kimaachemmo taane. Tunebaani ittoshi kimi hami, are gaawe showoon woraashemmo ittoshine. 23Ittoshi Nuggishoo Doono Yeeri ittoshina tookkii bi giyiti wogoon ittoshi batteyaachemmoyich, ittoshi goyinne maddaachemmoyich bi bajjiti, amee shaahoonona shuuneebeeti shahalloon ittoshi shuuneyaachemmoyich ittoshi qelloon ariibote! 24Ebiyoo ittoshi Nuggishoo Doono Yeeri michii aalliibeeti qaaqqoommo bi tunetoyichiye; biyoo qanaatechi Nuggishoone.
25“Bushiishoonaa bushaa bushoonon ittoshi shiyihooba, are showoochoo meeti naton ittoshi kotehooba, shahalloon amee shaahoonona shuunoona axaaxoon shuuneyaahote. Ebi ittoshi Nuggishoo Doono Yeeri shunaani mooyo bi tunetoyich, bi kaaremmoyich tuniyemmone. 26Ittoshi toommooch boonoshi miixemmoyich shimaayoonaa showoonon hanaach ceeggaabeeto taane; ebin deꞌa getaache ittoshi getigaata, Yoordaanoosin kimi hamiree ittoshi hajjemmi showoochee kaateree aallemmo ittoshine; arooch meeti yemeenoon koteyaachemmo ittoshine; ciroona aallemmo ittoshine. 27Doono Yeeri aagetee asheenaꞌo daggooch ittoshin shaccemmone; ebi bi shacciti asheenaꞌo daggooch haddoona giishechoon tune echemmo ittoshine. 28Ebi aroochaa ciinon woyee waayoon woyee mamon woyee shiiqqoon hakkaani, mixoochee woyee xaqqoochee, ashi kishoona shuuneeti nuggisheenaꞌoyich goyinne maddemmo ittoshine.#Yibba. 28:36 29Tunebaani aroochaa ittoshi Nuggishoo Doono Yeer waan corootemmo ittoshine. Ceeni ittoshi mulloonaa ceeni ittoshi kashoona bi waan ittoshi corootigaata, biyoo ittoshi qolloon waayemmone.#Erim. 29:13 30Iritoo ittoshi toommooch shagiyooba, ebi mooyo bulli ittoshi toommooch tunehooboo ciiroochaa ittoshi Nuggishoo Doono Yeer waan wotteree biich deꞌa gettemmo ittoshine. 31Ittoshi Nuggishoo Doono Yeeri ariqqechi Nuggishoone. Biyoo ittoshin dufaachemmone; aalliishoo getaachemmone; ittoshi qaabbechinaꞌona tookkii bi giyiti wogoon batteyaachemmone.
Doono Yeeri Baach Nuggishoo Tuno
32-34“Ittoshi Nuggishoo Doono Yeeri ittoshin Gibitsee kichii deebiꞌi bi hajjee ashoon bi tuniihooba, kupphe bi kishoonaa giidechi bi mochoonon bekkiiꞌi Gibitseenaꞌon aabichiꞌi xuuxooch bi duppito gaata beeggito ittoshine. Biyoo worganikkiti malletoonaa gaakkechi mooyonon tuniiꞌi boonoshin keqqichiye; ittoshicha iinoo boonoshina koyehe. Aroyee gubb, Siini guudoochaa qaaqqee daggoochaa ittoshich bi yibbaatee beetaa waayehote; tunebaani and beddaahaa kashoona beeto ittoshine. Doono Yeeri ashoon bi hallitoochee tiijjiꞌi and beddaahaa, ebiyoommi mooyo tunee ariibeete? Showee toommo bulliich guuddii ittoshi qaawitaanona, ittoshi Nuggishoo Doono Yeeri ittoshich tuniitoommi mooyon tuniiti bare nuggishoo beemon waayeto koninolla daneyaachemmo ittoshine.
35“Ebi mooyon ittoshi beeggemmoyich bi tuniito, Doono Yeeri bi baach Nuggishoo bi tunoonaa biyee damba baroo aallo bi tunoonon ittoshi ariyemmoyichiye. 36Ittoshin sheeroyich, shimaayoochee bi qaaroon ittoshi waayemmoyich tuniihe. Showee toommoochaanoo giidechi bi qaaqqoon ittoshi beeggemmoyich tuniihe. Ittoshiyoo qaaqqee daggoochee bi qaaroon waayehote. 37Ittoshi qaabbechinaꞌon bi shunnitoyich, boonoshi shiijjereenaꞌo tuneti ittoshin kaacciye. Ittoshina tookkii tuneꞌi bi hajjee giidoona Gibitsee ittoshin kichii deebiye. 38Ittoshin arooch giijjiree, and ebi ittoshi woraashiti boonoshi showoon ittoshich imoyich, ittoshiyee beshe meetinaꞌonaa giidechinaꞌona tuneti aageteenaꞌon ittoshi aafoochee yookkii kichiye.
39“Illa and damba shimaayooch tuneba desh showooch, Doono Yeeri baach Nuggishoo bi tunoon, bare nuggishoo aallo bi tunoonoo shalligibe. Ebinoo ne mullooch manjii yeshe. 40Neennaa ne shiijjeroonoyich mooyo bulli kaamemmoyich, ne Nuggishoo Doono Yeeri bulli yemeenoon ne beeyemmoyich neech bi immiibeeti showoo, neecho tuneree bi beeyemmonaa arooch koteree ne yagemmonoyich, hanaach ta gettaabeeti sheeroonaa getoonon quyebe” iye.
Aabi-keyo Waan Beeti Shoobi Katemeenaꞌo
41Aroochee Muusi keejje katemeenaꞌon Yoordaanoosi aacoochaa aabi-keyo waanee bariihe. 42Ebiyoo aroyee aaf boonoshi daggooch kaaro aalloon, ariyaanoon diqqoona ashoon wuxiti asho koniyoona ebi katemeenaꞌoochee ikkooch murici hami bi kashoon bi wodiyemmoyichiye. 43Ebi bariti katemeenaꞌo, Roobeeli yoodoyich guudi toommeexi naqqe showooch, barahooch beeti Bezeeri katemoone. Gaadi yoodoyich Gilaadee showooch beeti Ramooti katemoone. Minaasi yoodeenaꞌoyich wotta Bashaanee showooch beeti Golaani katemoone.#Yaas. 20:8-9
Muusi Yeerichi Sheereechon Getooch Gimo
44Muusi Israꞌeeleenaꞌoyich immiti sheeroo ebine. 45-46Gibitsee kechiꞌi, Yoordaanoosi aacoochaa aabi-keyo waan, Beet Feꞌoori katemee ciinooch beeti bambooch boonoshi beetaa, ebi sheeroonaa arichiyoonon boonoshich immiye. Ebiyoo Heshibon beechii qeejjiti Amooreenaꞌo taatoo Sihoonichi showoochaaniye. Ebi taatoon Muusinaa Israꞌeeleenaꞌona Gibitsee kechiꞌi boonoshi waahooba, kochii wochitinaꞌone. 47Boonoshiyoo bi showoon, wotta Bashaanee taatoo Oogichi showoon, Yoordaanoosi aacoochaa aabi-keyo waan beeti, ebi gutte Amooree taateenaꞌo showoon yechiꞌi boonoshi hajjoon tuniiheete. 48Ebi showoo beeto, Arinooni bambee gocooch beeti Aroꞌeeri katemoochee tiijjiꞌi Siriyooni#4:48 Hibiree Yaafe Macaafo “Siyooni” iye. guudooch, ebi geto Hermooni guudooch, beddaahaane. 49Ebiyoo Yoordaanoosi aacoochaa aabi-keyo waan beeti Yoordaanoosi bamboochee tiijjiꞌi, Fisigi guudi baatooch beeti Kiikki baharooch beddaahaa beetoniye.
Currently Selected:
Yibbaatoo 4: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
