Yibbaatoo 29
29
Moꞌabee Showoochaa Wochinnoon Geddeti Wogo
1 Kooreebi guudoochaa bi giyiti wogee toommooch daakkiree Moꞌabee showoochaa Israꞌeeleenaꞌona tookki bi giyemmoyich, Doono Yeeri Muusich gettiti wogeechi mooyo ebine:
2Muusiyoo Israꞌeeleenaꞌo bullin ikkooch ceeggiꞌi ishichiye: “Gibits, Farooni toommooch, bi iraasheenaꞌonaa bi showee asheenaꞌona bulloshi toommooch Doono Yeeri tuniito bullin ittoshi hajjee aafoona beeggito ittoshine. 3Bi tuniiti, shattiiti naxoon, worganikkiti malletoonaa gaakkechi shuunoonon beeggito ittoshine. 4Tunebaani Doono Yeeri hanaach beddaahaa, ittoshi aafo ciinnii beetonaa ittoshi waamo waayee beetonon shalligemmi mulloon ittoshich imaanoone. 5Biyoo ‘Aabbe naton barahoona ittoshin yaabito taane; tunebaani ittoshi taho ittoshi qeddoochee ciireyaanoone; caammoo ittoshi baatoochee kuxeyaanoone. 6Koshon maataano ittoshine; woyinee uyoon woyee mashiibeeti uyoon uyaano ittoshine; tunebaani ittoshi Nuggishoo ta tunoon ittoshi ariyemmoyich, Doono Yeeri ta, ittoshich qaawii beeton immeto taane’ itone.
7“Hini xaaꞌooch no waahooba, Heshiboni taatoo Sihooninaa Bashaanee taatoo Oogina noon kocha waaheete. Tunebaani no boonoshin kochaa wochiyone.#Had. 21:21-35 8Boonoshi showoon yechaꞌa Roobeelinaa Gaadinochi yoodeenaꞌoyich, Minaasi yoodoochee qatinaꞌoyichoo iristo tuniiꞌa immehone.#Had. 32:33 9Ebich ittoshi tuniibeeti mooyo bulli ittoshich bi kaamemmoyich, hini wogeeti wogoon manjii quyebote.
10-11“Hanaach ittoshi bulli, ebiyoo, ittoshi yoodi yoodee ukkireenaꞌo, geeneenaꞌo, iraasheenaꞌo, Israꞌeeleenaꞌo bulli, ittoshi mecheenaꞌo, ittoshi bushiisheenaꞌo, wotta ittoshina tookkii beeti, ittoshich mixon baddee aacon kittiibeeti shiqqeenaꞌo, hanaach ittoshi Nuggishoo Doono Yeeri aafooch neexeto ittoshine. 12Hanaach hiniich ne neexeto, Doono Yeeri neenna tookkii giyiibeeti wogooch biinna tookkii gimoyich, wotta ne Nuggishoo Doono Yeerina tookkaa ne giyeti wogoon quyemmo ne tunoon getoyichiye. 13Ebina neech bi gibenikkitoommon, wotta ne qaabbechi Abrahamich, Yisaaqinaa Yaaqobinoyich bi wogetoommon, bi asho ne tunoon, biyoo ne Nuggishoo bi tunoon manjiiyane. 14Doono Yeeri hini wogoon bi giyiibeeto, ittoshina tookkii baach toonoone. 15Bi giyiibeeto, hanaach hiniich, bi aafooch neexeebeeti ittoshi bullinaa wotta gubbi ittoshi shiijjereenaꞌona tookkiiniye.
16-17“Gibits no beehooba, are showee asheenaꞌo mixoochee, xaqqoochee, birewoonaa aachoonoochee shaahiitaa shuuneeti, ciigiiti boonoshi shahalloyich boonoshi goyinnoon beeggito ittoshine. Ebiyoommon wotta, aagetee asheenaꞌo showoon kuxxii ittoshi beshehooba, areexi asheenaꞌo tiyaariibeeti shahalleenaꞌoyich boonoshi goyinnoon beeggito ittoshine. 18Ebi aageteenaꞌo nuggisheenaꞌoyich goyinne maddeya, hanaach bi mulloon no Nuggishoo Doono Yeer waanee bara wochiti asho, anaamo woyee maachee woyee ashi yaroo woyee yoodo bi beetaachemmoyich, xiishibote. Ebi bi beegaata, caammiibeeti, xuppattoon tuneya dicciibeeti michi cammoommone.
19“Ebiyoommi asho ebi wogee qaaroon waayeꞌi, bi qelloon diireeton shaahii ciinona, ‘Ta mullee manjoona ta hammetaanona, bulli mooyo taach kaamee beetone’ geti gabemmone. Ebiyoo gondoonaa deꞌoonon ikkochiree ittoshi bullin aalliyemmone. 20Ebiyoommi ashoon Doono Yeeri maaraachemmone; bi kaaree shiixxoonaa qanaatoonon bi toommooch kindiyemmone; hini macaafooch kooreeti ufo bulli bi toommooch kindemmone. Doono Yeeri bi shigoon hini showee toommoochee aalliyemmone. 21Doono Yeeriyoo hini Sheeree Macaafooch kooreeti wogee maxxaaroommona aalliyoyich, biin Israꞌeelee yoodeenaꞌo daggoochee bara kichemmone.
22“Gubb woyemmi shiijjeroo tuneti ittoshi bushiisheenaꞌonaa wohi showoochee waammi shiqqeenaꞌona are showee toommooch tuneti naxoonaa Doono Yeeri deebiti biiyoonon beeggemminaꞌone. 23Showoo bulli micciti waageroonaa kiihona shookketi, gocheyaani, maayoonoo colliyaani, mocoo colleyaani showoo tunemmone. Ebi showee toommooch shaggemmi aallo Doono Yeeri bi kaaree shiixxoona bi aalliiti Sodoomi, Gomoori, Adiiminaa Tseboyiminooch shaggiti aalloommon tunemmone.#Hal. 19:24-25 24Aageteenaꞌo bulli ebin beegiree, ‘Doono Yeeri ebi showee toommooch ebin amoyich tuniihe? Ebi shaahoon oogichiꞌi bi kaareto, amoyichiye?’ geti echemminaꞌone.
25“Boonoshichoo ishichaa getteyemmone: ‘Boonoshi qaabbechinaꞌochi Nuggishoo Doono Yeeri boonoshin Gibitsee kichiyooba, boonoshina tookkii bi giyiti wogoon boonoshi biichitoyichiye. 26Hammiꞌi boonoshi ariyaani, wotta bi asheenaꞌo goyinne maddemmoyich Doono Yeeri daaggaani bare nuggisheenaꞌoyich goyinnee maddeheete. 27Ebich Doono Yeerichi kaaree shiixxoo hini showee toommooch kindiye; biyoo hini macaafooch kooreeti ufo bullin bi toommooch deebiye. 28And ebi bi tunetoommon, Doono Yeeri boonoshin shinee kaaree, naxoon boonoshi toommooch kindiiꞌi boonoshi showoochee boonoshin cammona waaxxiye; bare showoochoo daammiꞌi duppiye’ getaa getteyemmone.
29“Gaxxeyaani mooyo no Nuggishoo Doono Yeerichone; tunebaani noonnaa no shiijjeroona bulli yemeenoon no quyemmoyich, Doono Yeeri bi sheeroon nooch gaxxitone” iye.
Currently Selected:
Yibbaatoo 29: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
