Yibbaatoo 13
13
1“Keemecho woyee gumi gummecho ittoshi daggoochee tiyiꞌi, worganikkiti malletoon woyee gaakkechi shuunoon shuunemmo taane bi getaa, 2ebi bi gettiti malletoo woyee gaakkechi mooyo tunegaata, biyoo ne ariyaani bare nuggisheenaꞌoyich ‘Ne waataa hamiree goyinne maddebone’ bi getigaata, 3ebi keemecho woyee gumi gummecho gettii beeton waayeyaahine. Ittoshi Nuggishoo Doono Yeeri ebi are uroona bi shuuneebeeto, ceeni ittoshi mulloonaa ceeni ittoshi kashoona biin ittoshi shunon beegoyicha iꞌiniye. 4Ittoshi Nuggishoo Doono Yeerichi hillooch dabbibote. Biinoo shatote. Bi getoyichoo deꞌa getote. Bi qaaroonoo waayebote. Biich goyinne maddebote. Biinna tookki ikkottebote. 5Tunebaani guuno tunee hajjeeꞌi beebee ittoshi echeti Gibitsee ittoshin biisheꞌi deebiti, ittoshi Nuggishoo Doono Yeeri toommooch hukkoon ittoshi shuunemmoyich bi gettitoyich, wotta ittoshi Nuggishoo Doono Yeeri gettiti gommoochee gubb ittoshi wottemmoyich tuniiya bi qaawitoyich, ebiyoommi keemechon woyee gumi gummechon wuxibote. Ebin tuniyoona, ebiyoommi gonde mooyonoo ittoshi daggoochee wokkiibote.
6“Ne manoo, ne indee shiyeto woyee ne bushoo woyee ne bushee woyee ne shunnaabeeti ne mechee woyee kashoommi ne nuuchoo, newoo tuneb ne qaabbechinaꞌo goyinnee maddee ariyaani nuggisheenaꞌoyich ne goyinne maddemmoyich tuniiya qaawiree, ‘Ne waataa hamiree bare nuggisheenaꞌoyich goyinne maddebone’ getiree aashoona neen dachemmo tunemmone. 7Ne katinooch beeti woyee neyee wokkiꞌi beeti, showee tuggoochee showee tuggooch beddaahaa beeti asheenaꞌochi nuggisheenaꞌoyich ne goyinne maddemmoyich neen dachemmo tunemmone. 8Tunebaani biich deꞌa gettaahine. Bi getoonoo elle waayeyaahine. Biichoo ayiniree ariqqeyaahine. Bi gonde mooyonoo qeriyaahine. 9Biin wuxibe. Ne biin shiichi xaqqoona yexe. Aroyee gubb asheenaꞌo bulli xaqqoona yexeete. 10Xaqqoona yexiree wuxibe. Ebiyoo guuno tunaa hajjeyaꞌa beebee ne echeti Gibitsee neen kichii deebiti, ne Nuggishoo Doono Yeer waanee neen bariiya bi qaawitoyichiye. 11Ebina Israꞌeeleenaꞌo bulli ebin waayeree shattemminaꞌone; ittoshi daggoochee koniyoona ebiyoommi gonde shuunoon wochinnoon shuuneyaachemmone.
12-13“ ‘Ne Nuggishoo Doono Yeeri ne beeyemmoyich neech immiti katemeenaꞌoochee ikkooch gaacaalli asheenaꞌo ittoshi daggoochee kechii hammiꞌi, ittoshi ariyaani bare nuggisheenaꞌoyich “Eke ittoshi waataa hamiree goyinne maddebone” iꞌi are katemeexi asheenaꞌon muriciiteete’ getaa woroon ne waayegaata, 14ebi mooyon manjii eche bosheree xiishibe. Ebi ciigiiti mooyo ittoshi daggooch bi tuno xiishoo tuneꞌi bi danegaata, 15are katemooch beeti asheenaꞌon boonoshi gijjeenaꞌona tookki goraadoona qecce wuxibote. Katemoonoo ciroona happi aalliibote. 16-17Areexi asheenaꞌochi qiico bullin deebiree katemee addibaabooch gutibote. Timeeti mooyinaꞌo daggoochee amoonolla ittoshi kishooch echiyaahote. Ittoshi Nuggishoo Doono Yeerich micciibeeti deejjoon tuniiree, are katemoonaa ebi qiiceenaꞌo bullinon qaaqqoona michibote. Are katemoo bulli yemeenoon happaa aalleton tunebaani, wochinnoon shuuneyaaye. Ebina Doono Yeeri kupphe bi kaaroon qayi wottemmone; ittoshichoo ariqqemmone; ittoshi qaabbechinaꞌoyich wogeꞌi bi gibenikkitoommon, shiyi shiijjereree ittoshi meettemmoyich tuniyemmone. 18Doono Yeeri ebin bi tuniyemmo, hanaach ittoshich ta gettaabeeti, ittoshi Nuggishoo Doono Yeerichi qaaroon waayeꞌi bi geto bullin ceechii ittoshi quyegaata, bi aafoochoo tato tuneti mooyon ittoshi tunii gaatane” iye.
Currently Selected:
Yibbaatoo 13: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
