Amootsi 5
5
Yeer Waan Boonoshi Wottemmoyich Israꞌeeleenaꞌo Ceekko
1Israꞌeeleenaꞌote, ittoshi toommooch ta caaggaabeeti hichoon waayebote!
2“Gidiideyoommi Israꞌeeli dihiyane;
dihiichaa tiyemmon mawiihane;
bi hajjee showoochaa duppahane;
biin tiijjemmo aallehe”
iyaꞌa shoddaabeeto taane.
3Nuggishoo Doono Yeeri ishichiye: “Israꞌeelee showooch beeti katemoochee, koyooch ikkoochee humeenaꞌo hammemminaꞌone; tunebaani balleenaꞌo baach wottemminaꞌone; baroochee balleenaꞌo hammemminaꞌone; tunebaani aashireenaꞌo baach wottemminaꞌone” iye.
4Doono Yeeri Israꞌeeleenaꞌoyich ishichiye: “Ta waan wottebote; kashoona beeyemmo ittoshine. 5Taan qaawiree Beeteel hammaahote; Galigaloo giyaahote; Beershaaboo beshe hammaahote. Galigali asheenaꞌo iberoon kecaa hammemminaꞌone; Beeteeliyoo tiishemmone” iye.
6Doono Yeer waan wottebote; kashoona beeyemmo ittoshine; ebi tuno qayigaata, Doono Yeeri qaaqqoo aaxxoommon aaxxeree Israꞌeeleenaꞌo toommooch kindemmone; Beeteeli asheenaꞌonoo michi aalliyemmone; ebi qaaqqoon koniyoona takkaachemmone. 7Dayinnetoon dabiibeeti, cadiqoon showooch duppiibeeti ittoshich woowo!
8-9Fileyadeesinaa Oriyoonina getteebeeti xojjeneenaꞌon hallito,
dunne manderoon hariibeeto,
hariton xumiibeeto,
baharee aacon wochiꞌi,
showee toommona bi taheyemmoyich tuniibeeto,
giidechinaꞌo toommooch aalloon deebiꞌi,
boonoshi mishigoon happii aalliibeeto,
bi shigo Doono Yeerine.#Iyoob. 9:9; 38:31
10Ittoshi, nallee gabberoochaa ittoshin kaaree ciiccii beetinaꞌon shixxiyote; iberoon yibbaatee beetinaꞌon ciigehote. 11Girechinaꞌon neexxii hajjiyote; boonoshi maayoon giidoona boggiyote. Ebich, xaqqoon xarii kexinaꞌon ittoshi haggitaa, arooch beetaachemmo ittoshine; woyinoon gaawe xaaꞌooch bechito ittoshine; tunebaani aroochee woyinee uyoon uyaachemmo ittoshine. 12Ittoshi axaaxoo am shaahoon bi woddeto gaata, ittoshi gondo am shaahoon bi maggeto gaatoo, ariibeeto taane. Cadiqeenaꞌon xuqqiyote; xuccoon maahote; nallee gabberoochaa girechinaꞌo nalloon daneyaachemmoyich tuniihote. 13Illa ebich, gonde yemeeno bi tunetoyich, shalligechi asho ebiyooba cikkii qajjii beetone.
14Kashoona ittoshi beeyemmoyich, deꞌoonalli gondoon shuuneya qaawiyaahote. Ebin ittoshi tuniigaata, ittoshi gettitoommon Beshe Mawe Nuggishoo Doono Yeeri ittoshina tookki tunemmone. 15Gonde mooyon shixote; deꞌe mooyon shunote; nallee gabberoochaa dayinneto dabaachemmoyich tuniibote; diqqich Beshe Mawe Nuggishoo Doono Yeeri curo tuneꞌi echeti Israꞌeelee asheenaꞌoyich ariqqo qayaachemmone.
16Illa ebich Beshe Mawe Nuggishoo Doono Yeeri ishichiye: “Addibaaboo bulliichaa eefo eeppeyemmone; gommi gashoochaa asheenaꞌo ‘Woowo!’ getibee eeppemminaꞌone. Gochechinaꞌoo eefooch ceegaa woyemminaꞌone; hichee caaggechinaꞌona tookki eeppemminaꞌone. 17Ittoshi daggooch ta giyaa, woyinee goyo bulliichaa eefo eeppeyemmone” iye Doono Yeeri.
18Doono Yeerichi aaboon qaatiibeeti ittoshich woowo! Ebi aaboon ittoshi qaatiibeeto amoyichiye? Ebi aabo ittoshich manderee aaboani bekko toonoone. 19Ebi aabooba, daaheroo kishoochee muriccii hammiꞌi diiboona daneti woyee muriccii kexooch giyiꞌi bi kishoon daabbooch bi kotiitee dingero kochiti ashoommon tunemmo ittoshine. 20Doono Yeerichi aabo bekko tuneyaanoon manderoo, aaxxo amolla aalli dunne manderoo toone?
21Doono Yeeri ishichiye: “Ittoshi nati baaroon shixxaa hoxeto taane. Baaroyich ittoshi kiceyoona emiraano taane. 22Micciibeeti deejjoonaa maayi buuroonon taach ittoshi giddiitaa, deꞌaachemmo taane. Ikkittinee deejjoyich awujjiti gijjoon ittoshi giddiiteenolla guudi beegaachemmo taane.#Isi. 1:11-14 23Yubboona ittoshi cookiibeeti cookoon qayote; ittoshi ooge ximbee qaaroonoo ta waayeyaache. 24Ebiyee, dayinneto aachi xuuphoochoommon, cadiqoo tahaani aacochoommon ufebe!
25“Israꞌeeleenaꞌote, aabbe naton barahoona ittoshin ta yaabiyooba, taach deejjoonaa buuroonon giddiito ittoshine? 26Ittoshi qellich ittoshi shuuneti, Sakuuti getteebeeti ittoshi taatee nuggishoonaa Kayiwaani getteebeeti xojjenee nuggishoonochi misiloon tiijjii shaaggiyote. 27Ebich, Damaasiqi katemoyee beqach beeti showooch kecee ittoshi hammemmoyich tuniyemmo taane” iye bi shigo Beshe Mawe Doono Yeeri getteeti, Doono Yeeri.#Mish. 7:42-43
Currently Selected:
Amootsi 5: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
