Amootsi 2
2
1Doono Yeeri ishichiye: “Moꞌabee asheenaꞌo wochii wochii boonoshi shuuneti axaaxoyich, boonoshin naxeyaanoon qayaachemmo taane. Ebiyoo Edoomee taatoochi shaawushoon michiꞌi tulloo boonoshi tuniitoyichiye. 2Ebich Moꞌabee showooch qaaqqoon geddemmo taane; Qiriyooti katemeexi taatee kexinaꞌonoo michi aalliyemmone. Moꞌabee asheenaꞌo ginee koyeexi dulloon, cookoonaa tiree qaaroonon waayebee qiti ciiremminaꞌone. 3Boonoshin qeejjii beetonaa iraasheenaꞌo bullinon wuxi ciichemmo taane” iye Doono Yeeri.
Yihudee Asheenaꞌo Toommooch Kindemmi Nalloo
4Doono Yeeri ishichiye: “Yihudee asheenaꞌo wochii wochii boonoshi shuuneti axaaxoyich, boonoshin naxeyaanoon qayaachemmo taane. Ebiyoo ta sheeroon boonoshi qallayitoyich, ta qociyoonoo quyo boonoshi qajjitoyichiye. Boonoshi qaabbechinaꞌo goyinnee maddeti nuggisheenaꞌo boonoshin muriciitinaꞌone. 5Ebich Yihudee showooch qaaqqoon geddemmo taane; Yerusaalem beeti taatee kexinaꞌonoo michi aalliyemmone” iye.
Israꞌeeleenaꞌo Toommooch Kindemmi Nalloo
6Doono Yeeri ishichiye: “Israꞌeeleenaꞌo wochii wochii boonoshi shuuneti axaaxoyich, boonoshin naxeyaanoon qayaachemmo taane. Ebiyoo cadiqe asheenaꞌon boonoshi hiishoyich, girechinaꞌonoo caammoyicha iꞌi, guuchittinooch boonoshi kemmitoyichiye. 7Girechinaꞌon buttooch dichiichii boonoshi qellooch qappiyeete; gitteenaꞌonoo gommoochee xuqqii wochiyeete. Bushoonaa nihoona ikke gonneen qeyiyeete; ebich yaafe ta shigo eeꞌehe. 8Deejjee gudo bullichi gaꞌooch hammiꞌi, yechiyoo boonoshi deqqiti tahoon yaggiꞌi tokketeheete. Boonoshi Nuggishoo ta yaafee kexoochaa, qocoo boonoshi deqqiti woyinee uyoon uchiyeete.
9“Ta asheenaꞌote, ittoshicha iyaꞌa yigoommi genjeenaꞌo, uxeree mixoommi manjeenaꞌo tuneti Amooree asheenaꞌon cammona waaxeree boonoshi aallemmoyich tuniihoye.#Yibba. 3:8-11 10Boonoshi showoon ittoshi woraashemmoyich, Gibitsee ittoshin kichaꞌa aabbe naton barahoona yaabiyoye. 11Ittoshi anaami bushiisheenaꞌo daggoochee ikkikkeenaꞌon keemechinaꞌo, ittoshi gurimaasheenaꞌo daggoocheenoo ikkikkeenaꞌon Naazireenaꞌo tuniihoye. Israꞌeeleenaꞌote, ebi iberoo toone?” iye Doono Yeeri.#Had. 6:1-8
12“Tunebaani ittoshi Naazireenaꞌoyich woyinee uyoon uchiyote; keemechinaꞌonoo ‘Ciroona keemmaahote’ iꞌi bajjiyote. 13Illa and maayo xaaneeti gaari neexxii pharixoommon ittoshin neexi pharixxemmo taane. 14Kupphe woccecholla murici wodaachemmone; giidechoo giidoo muccemmone; ginee anaamolla bi qelloon wodiyoon hakkaachemmone. 15Shangoona koyeebeeto gubb shokemmone; baata kettolla woci wodaachemmone; hareshechoo bi kashoon wodiyoon hakkaachemmone. 16Ebi arooba mulli kuppho tuneti ginee naayolla bi ginee qiicoon dufiichi woccemmone” iye Doono Yeeri.
Currently Selected:
Amootsi 2: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
