Mishiraachechinaꞌo 15

Yerusaalem Iitoo Koto

1Ikkikke asheenaꞌo Yihudee showoochee Antsooka hammiꞌi, “Muusichi Sheeree doyoona ittoshi dokireyaan gaata, wodoon hakkaachote” iꞌi kittinnee maneenaꞌoyich dojjiyeete. 2Ebich Phawuloosinaa Barnabaasina hini asheenaꞌona tookkii kaaree shaceꞌi, meeti gommona taggeheete. Ebich Phawuloosinaa Barnabaasinon, wotta boonoshina tookkii beetinaꞌo daggoochee ikkikkeenaꞌon kaacciꞌi, “Yerusaalem beeti mishiraachechinaꞌonaa geeneenaꞌona waan hamiree hini mooyon echeebote” iyeete. 3Ebich hini kaachetinaꞌon kittinnee guuphi asheenaꞌo deennii Yerusaalem daachiiheete. Boonoshiyoo hammii Finqee showoonaa Shamaaree showoonon besheebee, Aageteenaꞌo Yeer waan wottoon gettiyeete. Kittinnee maneenaꞌo ishin waayeꞌi oogichii emiriyeete. 4Yerusaalem boonoshi shagaa, kittinnee guuphi asheenaꞌo, geeneenaꞌonaa mishiraachechinaꞌona boonoshin iibbiiheete. Hini wocheetinaꞌo Yeeri boonoshina tookkii tuneꞌi bi tuniiti mooyo bullin yibbaateheete.

5Areegaata Fariseenaꞌo daggoochee boonoshi mulloon Yesuusi toommooch tooꞌiitinaꞌo arooch beeheete. Boonoshi daggoochee ikkikkeenaꞌo tiyiꞌi, “Aageteenaꞌon dokiriyoonaa ‘Muusichi Sheeroon ceechibote’ iꞌi getona ittoshich qaawiihe” iyeete.

6Aroochee mishiraachechinaꞌonaa geeneenaꞌona hini mooyon beegga kiceeheete. 7Oogichii boonoshi yibbaatetoyee gubb, Pheexiroosi tiyiꞌi ishichiye: “Ta maneenaꞌote! Aageteenaꞌo ta noonoochee mishiraachee qaaroon waayeree Yesuusi toommooch mulloon boonoshi tooꞌiyemmoyich, Yeeri meeti natoyee aaf ittoshi daggoochee taan bi kaacon ariibeeto ittoshine.#Mish. 10:19-24,34-48 8Arooba ashi mulloon ariibeeti Nuggishoo, nooch Yaafe Ayaanoon bi imoommon, boonoshich wotta Yaafe Ayaanoon bi imona boonoshin bi hoxee qayon miixehe. 9Yeeriyoo Yesuusi toommooch mulloon boonoshi tooꞌiyoona boonoshi mulloon axaaxoochee xalliitone; ebich noonnaa boonoshinon barbariyaanoone. 10Illa and no qaabbechinaꞌonaa noonna shaagon hakkaani magge waanjoon kittinneenaꞌo toommooch minjoona amoyichiye Yeerin yeshi beegga ittoshi qaawiibeeto? 11Tunebaani no boonoshichoommon Doono Yesuusichi wojjoona wodemmo no tunoon iberiibeeto noone” iye.

12Ishin waayeti asheenaꞌo bulli cikkii qajjiyeete. Aree hillooch Yeeri boonoshi kishoona Aageteenaꞌo daggooch bi tuniiti worganikkiti malletoonaa gaakkechi shuunoonon Barnabaasinaa Phawuloosina getaa, ellee beeheete. 13Boonoshi yibbaatoon boonoshi ciichitoyee gubb, Yaaqobi tiyiꞌi ishichiye: “Ta maneenaꞌote! Elle waayebote! 14Yeeri shiichiꞌi Aageteenaꞌo daggoochee bi hajjoo tunemmi asheenaꞌon bi kichoona boonoshin bi shunon aabichiꞌi bi bekkiito gaata, Simooni and gettitone. 15Bi yibbaatoonaa keemechinaꞌo qaaroona ikkoone; ishichiꞌi getaa kooreetone:

16-18‘Wonnee yemeenoochee tiijjiꞌi,

ebi mooyo bullin shuuneebeeti Doono Yeeri ishichiye:

“Ebiyee gubb, bare asheenaꞌo bulli,

Aageteenaꞌo daggoochee

ta hajjoo tunebeete iyaꞌa ta ceeggeti asheenaꞌo bulli

Doono Yeeri taan boonoshi qaawemmoyich boonoshi waan wottemmo taane.

Arooba dihiti Daawiti kexon wochiree haggemmo taane;

tiisheton koceree andiriyemmo taane;

wochinnoon tiijjiree neechemmo taane” ii beetone.’#Amo. 9:11-12

19“Illa and ta nallemmo, Aageteenaꞌo daggoochee Yeer waan wottetinaꞌon no iritiyaachemmoyichiye. 20-21Tunebaani Muusi kooriti macaafoon aafi shiijjeroochee tiijjiꞌi, shambeti shambetooba Ayihudeenaꞌo kiceebeeti kexoochaa shemmee beetinaꞌonaa katemoo bulliichaa gettii beetinaꞌona beetoyich, ‘Shahalloyich deejjeeꞌi eeꞌeton maayaahote; shunee mamoochee wohote; guureyaanoon taaqqee qititon, damoonoo maayaahote’ getiree boonoshi waan kooribone” iye.

Yerusaalemee Sooriyee Showooch Wocheeti Wocho

22Ebiyee gubb, mishiraachechinaꞌonaa geeneenaꞌona kittinnee guuphi asheenaꞌo bullina tookkii tuneꞌi, boonoshi kaacciti asheenaꞌon Phawuloosinaa Barnabaasina tookkii Sooriyee showooch beeti Antsooka daachiyoyich gabiyeete. Ebich kittinnee maneenaꞌo daggoochee geeno tuneti, Barisiyaani getteebeeti Yihudinaa Sillaasinon kaacciyeete. 23Kooreeti koorichoon boonoshi kishoona daachiiheete; are koorichooch kooreeto ishichii beetone:

“Mishiraachechonaa kittinnee guuphi geenoona tuneti ittoshi manoo no, Antsook, Sooriyee showoonaa Kiliqee showoonooch beeti Aagetee asho tuneti kittinnee maneenaꞌon diggoo ii beeto noone.

24“Ikkikke asheenaꞌo no waanee kechiꞌi, boonoshich no getaanoon gettiibee ittoshin iritiiꞌi ittoshi mulloon boonoshi guttiyoon waayeto noone. 25Ebichi naboona hini wocheyechinaꞌon kaaccaꞌa no shunnaabeeti Barnabaasinaa Phawuloosina tookkii ittoshi waan daachiyoyich ikke mulloona maacceto noone. 26Hini Phawuloosinaa Barnabaasina no Doono Yesuus Kiristoosicha iꞌi boonoshi kashoon aaxxiyaani asheenaꞌone. 27Hini koorichooch kooreeton boonoshi noonoona ittoshich boonoshi gettemmoyich, Yihudinaa Sillaasinon daachiito noone. 28Ebi ittoshich qaawiibeeti mooyinaꞌoyee damba bare magge mooyon ittoshi toommooch no minjaachemmoyich, Yaafe Ayaanoonaa noonna gabito noone. 29Ebiyoo shahalloyich deejjeeton, damoon, guureyaanoon taaqqee qititon ittoshi maataachemmoyichiye; wotta shunee mamoochee ittoshi wokkemmoyichiye. Eboshi bulliichee ittoshi qelloon ittoshi quyegaata, gaawiye. Diggoona beebote” ii beetone.

30Wocheyechinaꞌo Yerusaalemi kittinneenaꞌo bullin diggiiꞌi, hini koorichoon yechii Antsooka hammiyeete. Hammii shaggii kittinnee guuphi asheenaꞌon kiciꞌi koorichoon immiyeete. 31Boonoshiyoo shemmeꞌi areexi ciicoona oogichii emiriyeete. 32Yihudinaa Sillaasina wotta keemechinaꞌo boonoshi tunetoyich, kittinnee maneenaꞌon wodde ciicoona ciicciꞌi kupphiiheete. 33Arooch meeti aaboon boonoshi kotetoyee gubb, kittinnee maneenaꞌon diggiiꞌi, boonoshin wochetinaꞌo waan wotteheete. 34[Tunetee Sillaasi arooch echoon qaawiye.] 35Tunebaani Phawuloosinaa Barnabaasina bare meeti asheenaꞌona tookkii Doonochi qaaroon dojjiibee, gettiibeenoo Antsooka koteheete.

Phawuloosinaa Barnabaasina Barbaroo

36Giisheche aaboyee gubb Phawuloosi tiyiꞌi Barnabaasin “Eke wotteree, Doonochi qaaroon no getteti katemeenaꞌooch beeti asheenaꞌon hamiree beegone. Aabichiꞌi boonoshi beeto gaata ariibone” iye. 37Barnabaasiyoo Maariqoosi getteebeeti Yowannisi boonoshina tookki bi hammemmoyich qaawiye. 38Tunetaa Phawuloosi boonoshina tookkii bi hamon shunaanoone. Ebiyoo ebiyee aaf Maariqoosi boonoshiyee bariꞌi Fenfulee showooch bi echetoyich, shuunoonoo boonoshina tookkii shuunoon bi qajjitoyichiye.#Mish. 13:13 39Ebich kaareꞌi shaceheete. Aroochee Barnabaasi Maariqoosin yechii markaboona Qoophiroos hammiye. 40Tunetaa Phawuloosi Sillaasin kaacciye; kittinnee maneenaꞌo Doonochi wojjoyich biin boonoshi aderetoyee gubb, kechii hammiye. 41Biyoo Sillaasina tookkii kittinnee guuphinaꞌo kiceebeeti xaaꞌoo bulliich hammii shaggii boonoshin kupphiibee, Sooriyee showoonaa Kiliqee showoonon beshee beehe.

Currently Selected:

Mishiraachechinaꞌo 15: KBRC

Highlight

Copy