2 Saameeli 19
19
Yoꞌaabi Daawitin Ittibato
1Abisoloomich taatoo eeppiꞌi muushenee toommooch bi beemo Yoꞌaabich getteehe. 2Ginee naayinaꞌo wudoon boonoshi danetoyich boonoshi emireshi qoodoon, arooba ayinoona heechiyeete. Ebiyoo taatoo bi bushoyich muushenee toommooch bi tunoon boonoshi waayetoyichiye. 3Arooba ginee naayinaꞌo ginoochaa koyaa yookkeꞌi yeelleti ginee naayo shashewimoommon, shashewimiꞌi katemooch giyiyeete. 4Taatoo bi aafoon qeriꞌi, bi qaaroonoo oogichiꞌi, “Ta bushoo Abisoloomo, Abisoloomo, ta bushoocho, ta bushoocho!” iibee eeppiye.
5Aroochee Yoꞌaabi taatoo waan, kexooch waaꞌi ishichiye: “Ne kashoon, ne anaami bushiisheenaꞌonaa ne maache bushiisheenaꞌonochi kashoon, wotta ne mecheenaꞌonaa ne naamacheenaꞌonochi kashoon wodiiti ne ginee naayinaꞌo bulli yeellemmoyich, hanaach tuniito neene. 6Neen shixxii beeton shunnaabeeto, neen shunnii beetonoo shixxaabeeto neene. Ginee naayinaꞌochi iraasheenaꞌonaa ginee naayinaꞌonoyich ciroona aaxxiyaano ne tunoon xalla kichaꞌa hanaach bekkiito neene. Abisoloomi wodiichaa no bulli qitito gaata emiresho ne tuno hanaach taach bekketone. 7And tiyi maach keyiree, ne ginee naayinaꞌoyich shaawi noonoona yibbaatebe. Doono Yeerichi shigoona neech wogehoye; ebin tuniyoo ne qayigaata, hanaachi xum ikke asholla echeyaanoon bulliyona neen dufi hammemminaꞌone. Ebi mooyo ne bushittinoochee tiijjiꞌi and beddaahaa, ne toommooch shaggiti gonde mooyo bulliyee beshe gonde mooyo neech tunemmone” iye.
8Ebich taatoo tiyii hammiꞌi, katemee kellee gaꞌooch kotehe. Taatoo katemee kellee gaꞌooch kotoon asheenaꞌo bulli waayeheete. Boonoshi bulliyoo waa bi aafooch kiceeheete.
Daawiti Yerusaalem Wotto
Areegaata, Israꞌeeleenaꞌo bulli aasheꞌi boonoshi kexooch wottetinaꞌone. 9Israꞌeelee yoodeenaꞌo tuneti asheenaꞌo boonoshinaa boonoshina gajjiteebee ishichiyeete: “Taatoo Daawiti no etteenaꞌo kishoochee noon wodiitone; Filsixeemeenaꞌo kishoocheenoo noon shiwetone. Tunebaani and Abisoloomi naboona aasheꞌi, no showoochee hammitone. 10No toommooch bi taatemmoyich no huutteti Abisoloomi koyoochaa qititone. Ishigaata and, taatoon wochii deebichi mooyon ittoshi cikkii qajjiibeeto, amoyichiye?” ii beeheete.
11Ebi Israꞌeeleenaꞌo yibbaateebeeti mooyo taatoo Daawit waan shaggiye. Aroochee Daawiti qeesheenaꞌo tuneti Sadooqinaa Abiyataarinoyich ishichiibeeti wochoon daachiihe. Biyoo “Yihudee showee geeneenaꞌoyich, ‘Taatoon bi kexooch wochii deeboyich ashi ciiro ittoshi tuneebeeto amoyichiye? 12Ittoshi ta xiboo, ta meenonaa ta damoona ittoshine. Ishigaata, taan wochii deeboyich ciiro ittoshi tuneebeeto, amoyichiye?’ 13Wotta Amaasin ‘Ne, ta meenonaa ta damoona toono neene? Ebiyee gubb, Yoꞌaabi keroon ta ginee iraashoo neen ta tuniyoo qayigaata, Yeeri ta toommooch ebin tuniibe; ebinoo daakkibe’ itone getote” iye.
14Ebin getona, Daawiti Yihudee asheenaꞌo bulli mullo ikkittinoona bi waan wottemmoyich tuniihe. Boonoshiyoo “Newoo, ne ginee naayinaꞌoo wottebote” iꞌi wocheheete. 15Ebich taatoo Yerusaalem hamma gommon qaxiriibee Yoordaanoosi aacooch bi shaggimmona Yihudee asheenaꞌo aroochaa biinna daneheete. Boonoshiyoo taatoon deeniree, Yoordaanoosi aacon kiichiya iꞌi, shiichii Galigala kiceetinaꞌone.
16Areegaata, Biiniyaamee yoodoochee tuneti Bahuriimee asho, Geeri bushoo Shimeꞌi Yihudee asheenaꞌona tookkii tuneꞌi, Daawitina daneya afaafinoona waahe.#2 Saam. 16:5-13 17Biinna tookkii Biiniyaami yoodoochee tuneti ikke hume asheenaꞌo waatinaꞌone. Wotta Saaꞌooli kechi asheenaꞌo aafee bushoo Siibi, aaraa uuche bi bushiisheenaꞌonaa hiye bi naayinaꞌona tookkii, taatoo shagoyee shiichiꞌi Yoordaanoosi aacooch afaafinoona waa shaggiye. 18Boonoshiyoo taatoochi kechi asheenaꞌon aacon kichiyoonaa bi shunnimmon shuunoonoyich aacon kimmiyeete.
Daawiti Shimeꞌin Maaroo
Taatoo aacon kimma bi tiyaahaa Geeri bushoo Shimeꞌi hammiꞌi bi aafooch dihiichii, 19taatoyich ishichiye: “Ta doonocho, ta gondoon maaribe. Taatoo ta doono ne Yerusaalemee ne kecheti aabooba ne guuno ta gondeti gondoon shalligaaye; ebin ne mullooch kotiyaaye. 20Ne guuno ta, axaaxoon shuuneto ta tunoon ariibeeto taane; and ebiyoche, Yooseefi kechi asheenaꞌo daggoochee, shiichoo tunaꞌa taatoo ta doono neenna daneya ta waato ebichiye” iye.
21Tseruuyi bushoo Abishayi, “Shimeꞌi Doono Yeeri huuttiti taatoon bi uppitoyich, qita beddiye” iye.
22Tunebaani Daawiti ishichiye: “Tseruuyi bushiisheenaꞌote, ebiich ittoshin geddemmo amolla aalloone. Hanaach, taach ettoon tuneto ittoshine. Ta and Israꞌeelee taatoo taane. Ebich Israꞌeeleenaꞌo daggoochee hanaach koniyoona qitaachemmone” iye.
23Aroochee taatoo Shimeꞌich “Qitaachemmo neene” iye. Ebinoo wogoona manjiihe.
Daawitinaa Mefiboshetina Dano
24Aroochee Saaꞌooli bushoochi bushoo Mefibosheti taatoona daneya dugilla waahe. Biyoo taatoo Yerusaalemee kechii bi aasheti aaboochee tiijjiꞌi diggoona bi wottemmi wottoon, bi baatoon macheyaanoone; bi ishaanoonoo cagaanoone; bi tahoonoo mayaanoone.#2 Saam. 9:1-13; 16:1-4 25Biyoo taatoona daneya Yerusaalemee bi waammona, taatoo biich, “Mefibosheto, taanna tookkii hamo ne qajjeto, amoyichiye?” iye.
26Biyoo wochiꞌi ishichiye: “Taatoo ta doonocho, ne ariyaa beetoommon, ta baata sheqqo taane. Ne guuno tawoo, ‘Ta kuree toommooch koroon ne haxaa, taatoona tookki hambona’ iyaꞌa ta aafee bushoo Siibich gettoye. Biyoo taan dawushiye. 27Ne guuno taanoo taatoo ta doono neech oonniye. Tunebaani taatoo ta doono ne, Yeerichi maraakoommo neene. Ebich neech shaahiꞌi bekkemmon tuniibe.#2 Saam. 16:2-3 28Ta nihinihoochi kechi asheenaꞌo bulli taatoo ta doono ne aafoochee wuxaa aalli bedeenaꞌone; tunebaani ne guuno taan ne madoochee maa beetinaꞌo daggooch tuniihine. Ebiyee besho taach bi tunemmon taatoon echoyich beddeti asho toono taane” iye.
29Taatoo biich wochiꞌi, “Mooyon aakkiyane geechaa genjiyaa ne beeto? Neennaa Siibina showoon ittoshi qoodeyemmoyich getteto taane” iye.
30Mefibosheti taatoyich wochiꞌi, “Bi bullebe. Waama taatoo ta doono ne baach diggoona ne kexooch wottetine” iye.
Daawiti Barizilayich Tuniiti Deꞌe Mooyo
31Gilaadee asho tuneti Barizilayi Rogelimee waahe. Biyoo taatoon deeni aacon kiichiya iꞌi, taatoona tookkii Yoordaanoosi aacooch hammiye.#2 Saam. 17:27-29 32Barizilayi geene uroone; biyoo shinne nati ashoone. Gaannecho bi tunetoyich, taatoo Mahanayim bi beehooba taatoonaa bi ginee naayinaꞌonoyich maayoon giddiitone. 33Taatoo Barizilayin “Taanna tookki Yerusaalem beebe. Tawoo ta kechi daggooch neen tuniiree deggemmo taane” iye.
34Tunebaani Barizilayi taatoyich ishichiye: “Taatoona tookki Yerusaalem ta hammemmo, amee wottoon ta beeyemmoyichiye? 35And ta shinne nati asho taane. Illa ebiyee damba taan emirikkemmi mooyo beete? Ne guuno ta, ta maabeeti maayoonaa ta uchaabeeti uyoonochi shaawon ariyehote? Anaaminaꞌo tunebeeta maacheenaꞌochi duubbi qaaroon waayehote? Ishigaata, taatoo ta doono neech shaago ta tunemmo, amoyichiye? 36Taatoo ebiyoommi mooyon taach tuniiya bi qaawiibeeto amoyichiye? Ne guuno ta, Yoordaanoosi aacoyee beqach besheree giisheche gommon baach neenna tookki hambona. 37Aroochee ta hajjee katemoochaa, ta nihoonaa ta indeena duukketi maashee katinoochaa ta qitemmoyich, ne guuno ta wottemmoyich daaggibe. Tunebaani ta bushoo Kimihami ebiyoche, taatoo ta doono neenna tookki hambe; ne shunneto amoonolla biich tuniibe” iye.
38Taatoo wochiꞌi, “Kimihami taanna tookki hambe; ne shunneto amoonolla biich tuniyemmo taane; wotta ta waanee ne qaawimmo amoonolla neech tuniyemmo taane” iye.
39Aroochee asheenaꞌo bulli Yoordaanoosin kimmiyeete. Taatoo kimmiye. Taatoo, Barizilayin shummiye; diiriinoo iye. Barizilayiyoo bi kexooch wottehe.
Yihudee Asheenaꞌonaa Israꞌeeleenaꞌona Kaaro
40Taatoo aacon kimmiꞌi, Galigala hammiye. Kimihamiyoo biinna tookkii hammitone. Yihudee ginee naayinaꞌo bullinaa qach bede Israꞌeeleenaꞌona gommon deennii daammiyeete.
41Aroochee Israꞌeeleenaꞌo bulli taatoo waan waaꞌi, biich ishichiyeete: “No maneenaꞌo tuneti Yihudee asheenaꞌo neen gaajjiꞌi boonoshi daammito amoyichiye? Neen, ne kechi asheenaꞌonaa ne asheenaꞌo bullinon Yoordaanoosi aacon kichiyeete” iyeete.
42Yihudee asheenaꞌo bulli Israꞌeeleenaꞌoyich ishichiyeete: “Ebin no tuniito, taatoo nooch katini xiboo bi tunetoyichiye. Ebich amoyichiye ittoshi kaareebeeto? No, taatoo waanee deqqaꞌa no maati mooyo beete? Woyee taatoo nooch wojjiti wojjoo beete?” iyeete.
43Israꞌeeleenaꞌo wochiꞌi ishichiyeete: “Taatoo waanee, ittoshichoyee besho tuneti, aashire kishee qoodoo nooch beetone. Ishigaata, noon ittoshi qallayito amoyichiye? Taatoon wochiꞌi deebichi mooyon shiichaꞌa tiijjito, no toono noone?” iyeete.
Tunebaani Yihudee asheenaꞌochi yibbaatoo Israꞌeeleenaꞌochoyee beshe kuppho tunehe.
Currently Selected:
2 Saameeli 19: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
