2 Saameeli 15
15
Abisoloomi Daawitichi Taatittinoon Deqqa Tuniiti Mooyo
1Ebiyee gubb Abisoloomi gaarin, haresheenaꞌon, wotta biyee shiichi aaf woccemmi aache asheenaꞌonoo qanniihe. 2Biyoo maaddi maaddoona tiyiꞌi, katemee kellooch daammiibeeti gommooch neexee beehe. Asho koniyoona bi taggoon taatoyich giddiiya bi waammona, Abisoloomi biin ceeggiꞌi, aabekkee bi waato gaata echee beehe. Uro Israꞌeeleenaꞌo daggoochee koni yoodo gaata bi tunoon bi gettimmona, 3Abisoloomi biich wochiꞌi, “Ebeege; ne mooyo kaamoonaa tatoonane; tunebaani ne mooyon bi waayemmoyich taatoo kotiiti asho koniyoona aalloone” ii beehe. 4Biyoo daakkiꞌi ishichii beehe: “Hini showee toommooch abo nallecho tunebota! Taggoo woyee mooyo biich beeti asho koniyoona ta waan bi waataa, biich dayinnetoona nallesho taane” ii beehe.
5Asho koniyoona biich goyinneya bi waan giddemmona, Abisoloomi bi kishoon yaggii yechiꞌi shummii beehe. 6Biyoo taatoo waan taggoyich waabeeti Israꞌeelee asho bullich ebin tunii beehe. Ebina Israꞌeeleenaꞌo mulloon bi waan wochiye.
7Awudde natoyee#15:7 Hibiree Yaafe Macaafo “Aabbe natoyee” iye. gubb, Abisoloomi taatoyich ishichiye: “Doono Yeerich ta mookketi mookkoon Kebiroon hamiree ta ceechemmoyich, taach daaggibe. 8Ne guuno ta, Sooriyee showooch, Geshuur beechaa, ‘Iberoon Doono Yeeri taan Yerusaalem wochiꞌi bi deebigaata, Kebiroonaa biich goyinnemmo taane’ iyaꞌa mookketo taane” iye.
9Taatoo biin, “Diggoona hambe” iye. Ebina Abisoloomi tiyiꞌi Kebiroon hammiye.
10Areegaata, Abisoloomi “Shametee qaaroon ittoshi waayegaata, ‘Abisoloomi Kebiroonaa taatete’ getiree cookibote” gettemmi wocheyechinaꞌon Israꞌeelee yoodeenaꞌo bulli waan aashoona daachiihe. 11Biyoo Yerusaalemee gutte balle asheenaꞌon biinna tookki boonoshi hammemmoyich ataalliye. Boonoshiyoo tuneebeeti mooyon amoonolla ariyaanoon, diqqoona tiyii hammiyeete. 12Abisoloomi deejjoon giddiibee, Daawitin ciicciibeeti asheenaꞌo daggoochee ikkoo tuneti Akixofeelin bi katemoo Giloonee bi woyemmoyich wochehe. Taatoo toommooch boonoshi koceeti koceyoo manjii manjii hammiye. Abisoloomin dabbiibeeti asheenaꞌoo meettii meettii hammiyeete.
Daawiti Yerusaalemee Kechiꞌi Aasho
13Wocheyecho Daawit waan waaꞌi, “Israꞌeeleenaꞌo mullo Abisoloom waan wottetone” iye. 14Ebich Daawiti biinna tookkii Yerusaalem beeti bi naayinaꞌo bullich ishichiye: “Ittoshi tiyaa muricone. Ebi tuno qayigaata, no daggoochee, Abisoloomi kishoochee muricon hakkemmo koniyoona aalloone. Kaateree hiniichee keyone. Eechoo no qayigaata, afaafinoona waa noon yeshiree, no toommooch gonde mooyon tuniyemmone. Hini katemeexi asheenaꞌonoo wuxi aalliyemmone” iye.
15Taatoochi naayinaꞌo biich “Taatoo no doono ne shunnemmon tuniyoyich, ebiyoche qannito noone” iyeete. 16Ebina taatoo kechii qaxiriye; bi taatee kexon quyiyoyich bi echiiti aashire bi naamacheenaꞌo baach echeechaa, bi kechi asheenaꞌo bulli bi hillooch dabbiyeete. 17Taatoo kechii qaxiraa, asheenaꞌo bulli bi hillooch dabbiyeete. Boonoshiyoo katemee ciirooch beeti ikke kechi gaꞌooch neexeheete. 18Bi naayinaꞌo bulli bi aafoona besheheete; taatoochi quyee naayinaꞌo tuneti Kereeteenaꞌo bullinaa Feleeteenaꞌo bullina, wotta Gaatee biin dabbiꞌi waati shiritte balle asheenaꞌo bi aafoona besheheete.
19Gaati katemee asho Itayich taatoo ishichiye: “Noonna tookkaa ne hammaabeeto amoyichiye? Ne showoyee maach beeti iibboonaa shiqqoona ne tunetoyich, wotteree taatoo Abisoloomina tookki kotebe. 20Yiich waati neen, amoyich hanaach noonna tookki ne yallyallimemmoyich tuniibote? Amooch ta hammaabeeto gaatoona ariyaano taane. Illa and ne asheenaꞌon yeshiree wottebe. Doono Yeeri neech bi deꞌittinoonaa bi gibeneyoonon bekkiibe” iye.
21Tunebaani Itayi taatoyich wochiꞌi, “Beeyechi Doono Yeeri beege! Wotta ta doono ne kashoona wogehoye; qitoo tuneba wodoo, taatoo ta doono ne tunemmo aabiichona, ta ne guuno arooch tunemmo taane” iye.
22Daawitiyoo Itayin, “Ishigaata hambe; beshebe” iye. Ebina Gaati katemee asho Itayi bi asheenaꞌo bullinaa biinna tookkii beeti bi kechi asheenaꞌo bullinon yechiꞌi beshehe. 23Asheenaꞌo beshee beetaa, are showee asho bulli eefehe. Taatoo Qedirooni aachi qaaꞌoon kimmiye. Asheenaꞌo bulliyoo kimmiꞌi, barahoo beeto waan hammiyeete.
24Qeesheenaꞌo tuneti Sadooqinaa Abiyataarina wotta arooch beetinaꞌone. Lewi yoodoochee ikkikkeenaꞌo Yeerichi wogee taabootoon shaaggiꞌi arooch beetinaꞌone. Boonoshiyoo Yeerichi taabootoon kindii kotiiheete; asheenaꞌo bulli katemoochee kechii boonoshi ciiremmi wottoon, wochinnoon tiijjaaneenaꞌone.
25Taatoo, Sadooqich ishichiye: “Yeerichi taabootoon katemooch wochi daambe. Doono Yeeri aafoochaa gidoon daneto ta tunegaata, bi taan wochi deebiree, taabootoonaa bi qeyi kexonon wochinnoon ta beeggemmoyich tuniyemmone. 26Tunebaani taanna emiraano bi tunegaata, biich gaaweto tuneꞌi bekketon tuniibe; tawoo ebin deꞌoyich qannito taane” iye.
27Taatoo daakkiꞌi Sadooqich ishichiye: “Illa mooyon beeggaabeeto neene. Ne bushoo Ahimaazinaa Abiyataari bushoo Yonaataaninon yeshiree katemooch diggoona wottebe; neennaa Abiyataarina gutte ittoshi bushiishoon yeshiree hambote. 28Tawoo ittoshi waanee wocho waammi wottoon barahooch beshiibeeti aachi kimooch quye beeyemmo taane” iye.
29Ebich Sadooqinaa Abiyataarina Yeerichi taabootoon Yerusaalem wochiyeete; boonoshiyoo arooch koteheete.
30Daawitiyoo eeppiibee, Zayitee Michi guudon kaama kechiye. Biyoo ayinito bi tunoon bekkiyoyich baade baatoon tuneꞌi, wotta tahoon bi qellooch ukeꞌi hammiye. Biin dabbii beetinaꞌo ebiyoommon wotta tahoon boonoshi qellooch ukeꞌi eeppiibee kaama kechiyeete. 31Akixofeeli Abisoloomina tookkii koceetinaꞌo daggoochee ikkoo bi tuno Daawitich getteehe. Daawitiyoo “Doono Yeero, Akixofeeli boyoon duubo ne tuniyemmoyich neen qollehoye” iꞌi corootiye.
32Daawitiyoo geppee toommooch beeti, Yeerich goyinnee xaaꞌooch bi shaggaahaa, Arikee asho Hushayi bi tahoon keexxiꞌi, bi shimboochoo buttoon shakkiꞌi biinna daneya waahe.
33Daawiti biich ishichiye: “Taanna tookkaa ne hamigaata, taach shaagooniye ne tunemmo. 34Tunebaani katemooch wotteree, Abisoloomin ‘Taatoocho, ebiyee aaf ne nihoochi naayo ta tunetoommon neech naayo tunemmo taane’ ne getigaata, Akixofeeli boyoon duuboon tuniyemmo neene. 35Qeesheenaꞌo Sadooqinaa Abiyataarina arooch neenna tookki tunemminaꞌone. Taatoo kexoochee ne waayemmi amee mooyonona, boonoshich gete. 36Boonoshi gutte bushiisheenaꞌo, eboshiyoo Sadooqi bushoo Ahimaazinaa Abiyataari bushoo Yonaataanina boonoshina tookkii arooch beetinaꞌone. Ne waayemmi mooyo bullin boonoshina taach wochebe” iye.
37Ebina Abisoloomi Yerusaalem bi shaggaahaa, Daawitichi boyecho tuneti Hushayi katemooch waahe.
Currently Selected:
2 Saameeli 15: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
