2 Taateenaꞌo 2
2
Eliyaasi Shimaajj Hamo
1Doono Yeeri Eliyaasin yuboona shimaajj bi daammemmi aabo shagaa, Eliyaasinaa Elisayina Galigalee showoochee tiyii qaxiriyeete. 2Aroochee Eliyaasi Elisayich, “Hiniich beebe; Doono Yeeri Beeteel taan wochetone” iye.
Tunebaani Elisayi, “Beeyechi Doono Yeeri beege. Beeyechi ne kashoonoo wogehoye; neyee baraache” iye. Ebina tookkiꞌi Beeteel hammiyeete.
3Beeteel beeti, ikke guuphi keemechinaꞌo Elisayi waan waaꞌi biich, “Doono Yeeri, ne doono Eliyaasin hanaach neyee bariiree daammemmo bi tunoon ariitine?” iyeete.
Biyoo, “Eeha, ariito taane; cikki qayote” iye.
4Aroochee Eliyaasi, “Elisayo, hiniich beebe; Doono Yeeri taan Yaarika wochetone” iye.
Tunebaani bi, “Beeyechi Doono Yeeri beege! Beeyechi ne kashoonoo wogehoye; neyee baraache” iye. Ebina tookkiꞌi Yaarika hammiyeete.
5Yaarika beeti, ikke guuphi keemechinaꞌo Elisayi waan waaꞌi biich, “Doono Yeeri ne doono Eliyaasin hanaach neyee bariiree daammemmo bi tunoon ariitine?” iyeete.
Biyoo wochiꞌi, “Eeha, ariito taane; cikki qayote” iye.
6Aroochee Eliyaasi biich, “Hiniich beebe; Yoordaanoosi ta hammemmoyich Doono Yeeri taan wochetone” iye.
Tunebaani Elisayi, “Beeyechi Doono Yeeri beege! Beeyechi ne kashoonoo wogehoye; neyee baraache” iye. Ebina tookkiꞌi hammiyeete.
7Eliyaasinaa Elisayina Yoordaanoosi aachi gashooch neexeꞌi beetaa, keemechinaꞌochi guuphi daggoochee aache asheenaꞌo hammiꞌi, boonoshi ciinooch giishechoon wokkiꞌi neexeheete. 8Aroochee Eliyaasi bi iddimoon shoottii qoddiꞌi aacon yexxiye; aacoo okkinaa hachinon qoodeehe. Boonoshi guttiyona shuuꞌi showoona kimmiyeete.
9Boonoshi kimmitoyee gubb, Eliyaasi Elisayich, “Yeeri taan daamaan beetaa, neech ta tuniyemmoyich ne qaawaabeeto, amo gaata taach gete” iye.
Elisayiyoo “Ne ayaano gutte kishoon tuneree#2:9 Gutenee bushoo bi nihoo iristoochee gutte kishoon bi woraashoommoniye. (Yibba. 21:17) ta toommooch bi kindemmoniye ta qaawaabeeto” iye.
10Aroochee Eliyaasi, “Magge mooyoniye ne echeto; tunebaani Yeeri taan daami beetaa, taan ne ciinigaata, neech tunemmone; tunebaani taan ciino ne qayigaata tuneyaachemmone” iye. 11Yibbaateebee, qaxirii boonoshi beetaa, diqqoona qaaqqee haresheenaꞌona geecheebeeti qaaqqee gaari boonoshi daggooch giyiꞌi, boonoshin gutta qoodiye. Eliyaasi yuboona shimaajj hammiye. 12Elisayiyoo ebin beeggiꞌi, “Taabbo, taabbo! Israꞌeeleenaꞌochi gaarinaꞌonaa hareshee yookkechinaꞌona!” iꞌi cookiye. Ebiyee gubb, wochinnoon biin beegaanoone. Aroochee bi hajjee tahoon yechii, gutte beera keexxiye.
13Eliyaas waanee holliti iddimoonoo tiijjiye; wotteꞌinoo Yoordaanoosi aachi gashooch neexehe. 14Eliyaas waanee holliti iddimoon daammii, aacon yexxiꞌi, “Eliyaasichi Nuggishoo Doono Yeeri aaye?” iye. Aacon bi yexaa, okkinaa hachinon qoodeehe. Elisayiyoo kimmiye.
15Yaarikee waaꞌi, arooch beeti, ikke guuphi keemechinaꞌo ebin beeggiꞌi, “Eliyaasichi ayaano Elisayi toommooch kinditone” iyeete. Biinna daneya waaꞌi baroona bi aafooch showooch guufeheete. 16Boonoshiyoo biich, “Ebiyoche, aache kupphe asho ne guuno noonna tookkii hiniich beetone. Diqqich Doono Yeerichi Ayaano ne doonon daammii, guudi toommooch woyee bambooch dufi beeyemmone. Eke hamiree boonoshi qaawemmoyich ne daaggemmoyich neen qollehone” iyeete.
Biyoo boonoshich, “Daachiyaahote” iye.
17Biin kachaa kashoon tuushiiꞌi boonoshi xuuxiitoyich, “Ishigaata, daachiibote” iye. Boonoshiyoo aache ashoon daachiiheete. Asheenaꞌo keejje qemon qaawii mucceheete. 18Yaarika koteꞌi bi beetaa, bi waan wotteꞌi waaheete. Biyoo boonoshich, “Hammaahote iyaꞌa ittoshich getaano taane?” iye.
Gonde Aaco Xallo
19Ikke areddoon Yaariki asheenaꞌo Elisayich, “Ebiyoche, ne beeggaa beetoommon, hini katemee beemo gaawetone. Tunebaani bi aaco gondoone; showoo maayoon shakkiyaanoone” iyeete.
20Biyoo, “Andire shaatoon taach deebote; aroochoo kiihon gedote” iye. Boonoshiyoo shaatooch kiihon geddiꞌi, biich deebiyeete.
21Biyoo aachi xuuphooch hammiꞌi, arooch kiihon duppiichii, “Doono Yeeri ishichiye: ‘Hini aacon xalliito taane. Ebiyee damba qitee naboo tuneyaachemmone; showoo maayoon shakkiyaachemmoyich bayaachemmone’ itone” iye. 22Elisayi gettitoommon, aaco hanaach beddaahaa xalletone.
Elisayin Bushiisheenaꞌo Cooqqiroo
23Elisayiyoo aroochee tiyii, Beeteel hammiye. Gommo hammii bi beetaa, bushiisheenaꞌo katemoochee kechiꞌi, “Hini xoroocho, hiniichee hambe; hini xoroocho, hiniichee hambe” iibee cooqqiriyeete.
24Elisayiyoo gubb wottee ciinniꞌi, boonoshin Doono Yeerichi shigoona uppiye. Aroochee gutte maache diibeenaꞌo kubboochee kechiꞌi, aabbaa gutte bushiisheenaꞌon tiichiyeete. 25Elisayi Qermeloosi guudooch hammiye. Aroocheenoo Shamaara wottehe.
Currently Selected:
2 Taateenaꞌo 2: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
