1 Saameeli 18
18
1Saaꞌoolinaa Daawitina yibbaatoon ciichiyeete. Aroyee gubb, Yonaataani Daawitich kashoommi nuuchoon tunehe. Biyoo Daawitin bi kashoona tachiꞌi shunniye. 2Aroobee aaboochee tiijjiꞌi Saaꞌooli, Daawiti biinna tookki bi beeyemmoyich tuniihe. Bi nihoo kexooch wotteree bi hammemmoyich daaggaanoone. 3Yonaataani Daawitin bi kashoona tachiꞌi bi shunnitoyich, biinna tookkii wogoon giyiye. 4Yonaataaniyoo bi taheti iddimoon kichiꞌi Daawitich immiye. Wotta bi tahoon, bi goraadoon, bi maꞌoonaa bi cuyeebeeti shachoonon immiye.
5Saaꞌooli biin daachiiti koyee xaaꞌoo bulliichaa Daawitich mooyo kaamee beehe. Ebich Saaꞌooli bi ginee naayinaꞌo toommooch biin iraashiihe. Ebiyoo Saaꞌoolichi iraasheenaꞌonaa asheenaꞌo bullinon emirikkiye.
Daawiti Toommooch Saaꞌooli Qanaato
6Daawiti Gooliyaadin wuxiꞌi bi wottehooba, ginee naayinaꞌo boonoshi kexooch boonoshi wottee beetaa, genneenaꞌo taatoo Saaꞌoolina daneya Israꞌeelee showooch beeti katemoo bulliichee kechiyeete. Boonoshiyoo kamboonaa ximboonon yechiꞌi duubbiibee capphii ililii beeheete. 7Genneenaꞌo duubbiibee,
“Saaꞌooli humeenaꞌon wuxiye;
Daawiti aashire humeenaꞌon wuxiye”
ii boonoshinaa boonoshina shoddee beeheete.
8Ebi mooyo Saaꞌoolin emirikkaanoone. Saaꞌooli oogeton ippehe. Biyoo “Daawitich aashire humoon immiyeete; tunebaani taach humoon baach immiyeete. Illa ta taatittinoyee besh biich echeto amoone?” iye. 9Aroobee aaboochee tiijjiꞌi Saaꞌooli Daawitin gonde aafoona ciinnii beehe.
10Bi dechara Yeeri deejjiti gonde ayaano giidoona Saaꞌooli toommooch kindiye. Bi kexooch beechii geyechochoommon cikkii yibbaatee beehe. Daawitiyoo qemi qemona bi tunii beetoommon, ooge ximboon yexxii kaachii beehe. Saaꞌooli bi kishooch ginoon yechitone. 11Biyoo Daawitin daabboona xaaqqiya iꞌi bi ginoon awurehe. Tunebaani Daawiti gutte wottoon bi aafoochee ikiye.
12Doono Yeeri biin qajjiichii Daawitina tookkii bi tunetoyich, Saaꞌooli Daawitin shattiye. 13Ebich Saaꞌooli Daawitin bi aafoochee wokkiiꞌi, hume ginee iraashoon tuniihe. Daawitiyoo bi ginee naayinaꞌon dabbiiꞌi koyee xaaꞌooch daammii, deebii beehe. 14Doono Yeeri Daawitina tookkii tunehe. Ebich biinnaa bi ginee naayinaꞌona boonoshi koyeti xaaꞌoo bulliichaa kochii wochii beeheete. 15Saaꞌooliyoo Daawitich mooyo kaamoon beeggiꞌi, aafichoyee beshoon biin shattiye. 16Israꞌeeleenaꞌonaa Yihudee asheenaꞌona bulloshi Daawitin shunniyeete. Ebiyoo ginoochaa boonoshiyee aaf tuneꞌi koyiibeeto, Daawiti bi tunetoyichiye.
Saaꞌooli Bushee Mikaalin Daawiti Shaago
17Saaꞌooliyoo Daawitich ishichiye: “Ta qaabbe bushee Meraabi beetine. Biin neech shaakkiyemmo taane. Ne baach gibeneetonaa ginee anaamonon tuneree taach maddebee, Doono Yeerichi ginoon koyebe” iye. Saaꞌooli bi ishichito, “Filsixeemeenaꞌo kishoona qitiballi, ta kishoona qitaaye” iꞌi bi gabitoyichiye.
18Daawiti Saaꞌoolich ishichiye: “Taatoochi bushee keno tunemmi tawochi, koni taane? Ta nihoochi kechi asheenaꞌo, ta yaroo Israꞌeeleenaꞌo daggoochee konine?” iye. 19Saaꞌooli bi bushee Meraabi Daawitich bi shaakkeyeshi aabo shaggiyooba, biin Meholatechi Adirelich shaakkiihe.
20Tunebaani Saaꞌooli bushee Mikaali Daawitin shunnahan. Saaꞌooliyoo ebi mooyon waayeꞌi emiriye. 21Biyoo “Mikaalin biich shaakkiyemmo taane. Aroochee biin biich ollo tuniyemmo taane. Ebina Filsixeemeenaꞌo kishoona aallemmone” iꞌi bi mulloona gabiye. Ebich Saaꞌooli Daawitich “Ta bushee kenoon tunemmo neene” iꞌi guttinnoon gettiye.
22Aroochee Saaꞌooli bi naayinaꞌoyich “Daawitin ‘Taatoo neenna emiritone. Bi naayinaꞌo bulliyoo neen shunnitinaꞌone. And illa ebich taatoochi busheen shaage’ getiree aashoona biich getote” iye.
23Boonoshiyoo ebin Daawitich gettiyeete. Biyoo “Taatoochi bushee kenoon tuno ittoshich kette mooyo shaahii beete? Ta, girecho, wotta aricheyaani asho taane” iye.
24Saaꞌoolichi naayinaꞌo hammiꞌi, ebi Daawiti gettiton Saaꞌoolich gettiyeete. 25Saaꞌooliyoo “Daawitich ishichibote; ‘Taatoo bi etteenaꞌo toommooch nichoon kichoon bi qaawii beetoyich, ne waanee bi qaawiibeeti xiloosho, balle Filsixeemeenaꞌon wuxiꞌi boonoshi shookoon ne deebon baachiye’ getote” iye. Saaꞌooli bi ishichito, Daawiti Filsixeemeenaꞌo kishoona bi qitemmoyich bi qaawitoyichiye.
26Saaꞌoolichi naayinaꞌo hammiꞌi, Saaꞌooli gettiton Daawitich gettiyeete. Daawitiyoo taatoochi bushee keno bi tunemmoyich gabeeti gaboona emiriye. Ebich taajjeeti aabo besheyaan beetaa, 27Daawitinaa bi asheenaꞌona tiyii hammiꞌi gutte balle Filsixeemeenaꞌon wuxiyeete. Daawiti taatoochi bushee keno bi tunemmoyich, boonoshi shookoo bullin haddiꞌi taatoyich immiye. Aroochee Saaꞌooli bi bushee Mikaalin Daawitich shaakkiihe.
28Saaꞌooli Doono Yeeri Daawitina tookkii bi tunoon, wotta bi bushee Mikaali Daawitin shunon xiishii ariihe. 29Saaꞌooliyoo aafichoyee beshoon biin shattiye. Biyoo kashoona beebee bi echeti yemeeno bullin Daawitich etto tunehe.
30Filsixeemee ginee iraasheenaꞌo kechiꞌi wochii wochii koyee beeheete. Tunebaani gino koyeebeeti aabo bullin, Saaꞌoolichi bare ginee iraasheenaꞌoyee beshoon kochii wochoona Daawitich mooyo kaamee beehe. Ebina bi shigo aricheton tunehe.
Currently Selected:
1 Saameeli 18: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
