1 Saameeli 10
10
1Aroochee Saameeli zayitoon yechiti qiicoon daammiꞌi Saaꞌooli shimbooch zayitoon ukkiye. Biin shummiichii ishichiye: “Doono Yeeri bi hajjee asheenaꞌo tuneti Israꞌeeleenaꞌo toommooch iraashoo ne tunemmoyich neen kaaccitone. [Yaabi qeejjibee, boonoshi guudoona beeti boonoshi etteenaꞌo kishoochee wodiyemmo neene. Bi asheenaꞌon yaabii qeejjecho ne tunemmoyich, Doono Yeeri neen bi kaacoyich ebi neech malletoo tunemmone.] 2Hanaach tayee bariree hamibee, Biiniyaamee showooch, Tseltsa beeti, Raaheeli duukketi maashee gaꞌoochaa, gutte asheenaꞌona danemmo neene. Boonoshiyoo ne qaawaabeeti kureenaꞌo danoon, wotta ne nihoo kureenaꞌo mooyon qajjiichii, ‘Ta bushoo mooyon aabichishiye ta gettemmo?’ iibee ittoshich keqqee toommooch bi tunoon neech gettemminaꞌone.
3“Aroochee hamibee, Taaboor beeti ooge mixo beetooch shaggemmo neene. Aroochaa keejje asheenaꞌona, eboshiyoo ikkoo keejje emmishee bushiishoon, ikkoo keejje xekee koshon, wotta ikkoo mollexxee ceeni woyinee uyoon shaaggiꞌi, Beeteelaa Yeerich deejjoon giddiiya hammii beetinaꞌona danemmo neene. 4Boonoshiyoo neen diggiiree, gutte xekee koshon neech immemminaꞌone. Newoo boonoshi kishoochee deqqemmo neene.
5“Aroyee gubb, Filsixeemee ginee kaambo beeti, Yeerichi geppooch, Gibaaha shaggemmo neene. Aroochee katemooch shagiichi, ooge ximboon, giishi ximboon, kamboonaa shumburoonon yechiꞌi, keemmiibee guudi toommeexi goyinnee xaaꞌoochee kindiibeeti, ikke guuphi keemechinaꞌona danemmo neene. 6Aroochee Doono Yeerichi Ayaano giidoona ne toommooch kindemmone. Newoo boonoshina tookki keemmemmo neene. Doono Yeerichi Ayaano andire ashoon tuniiree neen shaddemmone. 7Ebi malleteenaꞌo ceeniyooba, Yeeri neenna tookkii bi tunetoyich, ne tuniiya bede mooyo bullin tuniibe.
8“Newoo tayee shiichiree desh Galigala hammemmo neene. Tawoo micciibeeti deejjoonaa ikkittinee deejjoonon giddiyoyich ne waan woyemmo taane; ne waan waaꞌa, ne tuniyemmon neech ta arichiimmi wottoon, shabaatte qemon arooch koteree quyebe” iye.
9Saaꞌooli Saameeliyee bariree hamma bi wottemmona, Yeeri biich andire mulloon immiye. Arooba are getteeti malleteenaꞌo bulli ceenniyeete. 10Gibaaha boonoshi shaggimmona, ikke guuphi keemechinaꞌo biinna daneheete. Yeerichi Ayaano giidoona bi toommooch kindaa, boonoshina tookkii keemoon keemmiye. 11Aroyee aaf biin ariibeeti asheenaꞌo bulli keemechinaꞌona tookkii keemmii bi beetaa beeggiꞌi, boonoshinaa boonoshina “Qiishi bushoo toommooch, shaggito amoone? Halla Saaꞌooli keemechinaꞌo daggoochee ikkoone?” iyeete.
12Aroochee are xaaꞌeexi ikke uro “Boonoshi nihochi, konine?” iye. Ebich aroobee aaboochee tiijjiꞌi, “Saaꞌooli wotta keemechinaꞌo daggoochee ikkoone?” getaa yibbaateehe.#1 Saam. 19:23-24 13Saaꞌooli keemee keemon bi ciichitoyee gubb, guudi toommeexi goyinnee xaaꞌooch kechiye.
14Arooba Saaꞌooli niheeshoo Saaꞌoolinaa bi aafee bushoonon daneꞌi, “Amoocheeniye ittoshi waabeeto?” iꞌi echehe.
Saaꞌooliyoo “Kureenaꞌon qaawoocheeniye; qaawaa no muccetoyee gubb, Saameel waan hammeto noone” iye.
15Saaꞌoolichi niheeshoo “Eke Saameeli neech gettiton taach gete” iye.
16Saaꞌooliyoo bi niheeshoyich “Kureenaꞌo danoon xalla xiishiꞌi nooch gettitone” iye. Tunebaani Saameeli biich gettiti, taatoo bi tunee mooyon bi niheeshoyich amoonolla qaareyaanoone.
Saaꞌooli Taatoo Tuno
17Saameeli asheenaꞌo Doono Yeeri aafooch ikkooch boonoshi kiceyemmoyich Mitsipha ceeggiꞌi, 18boonoshich ishichiye: “Israꞌeelee Nuggishoo Doono Yeeri ishichiye: ‘Gibitsee ittoshin kichiyoye. Gibitseenaꞌo kishoochee, ittoshin duꞌiibee echeti bare showee taateenaꞌo kishoocheenoo ittoshin shiwoye. 19Ittoshin duꞌoonaa xuuxo bullinoochee wodiyaabeeti, ittoshi Nuggishoo taane. Tunebaani and ittoshi taan qajjiichii, taatoon ittoshich ta taatiyemmoyich echehote. Illa and ittoshi yoodi yoodoona, ittoshi yari yaroonoo tuneree, Doono Yeeri ta aafooch giddebote’ itone” iye.
20Saameeliyoo Israꞌeelee yoodeenaꞌo bulli giddemmoyich bi tuniitaa, Biiniyaami yoodoyich ixoo (koshoo) kechiye. 21Biiniyaami yoodoonoo boonoshi yari yaroona bi giddiitaa, Maaxirichi yaroyich ixoo kechiye. Maaxirichi yaree asho bi ikkikkoona bi giddemmoyich bi tuniitaa, Qiishi bushoo Saaꞌoolin ixoo yechiye. Tunebaani biin boonoshi qaawaa, aallehe. 22Ebich Doono Yeerin “Batt woyemmi bare asho beete?” iꞌi echeheete.
Doono Yeeriyoo “Saaꞌooli qiicee gutee daggooch aasheꞌi beetone” ii boonoshich gettiye.
23Boonoshiyoo wocona hammiꞌi aroochee deebaa, waaꞌi asheenaꞌo aafooch neexehe. Biyoo asho koniyeenona beshe neex genjoone; asho bulli bi gogoyee deshiye bi beeto.
24Saameeliyoo asheenaꞌo bullich “Ebi Doono Yeeri kaacciti uroon beeggii beetote? Asho bulli daggoochee biinna tato koniyoona aalloone” iye.
Aroochee asheenaꞌo bulli “Taatoocho, ne taatittino manjibe” iibee cookiyeete.
25Saameeliyoo taatoyich geddeyemmi mooyonaa taatoochi shuunoonon asheenaꞌoyich bi gettitoyee gubb, macaafooch kooriꞌi Doono Yeeri aafooch kotiihe. Aroochee asheenaꞌon boonoshi kexi kexooch daachiihe. 26Saaꞌooliyoo bi kexooch, Gibaaha hammiye. Yeeri boonoshi mulloon shuurikkiti, giidechi ginee naayinaꞌo biin dabbii hammiyeete. 27Tunebaani ikkikke gonde asheenaꞌo “Hini uro aabichireeshiye noon bi wodiyemmo?” iꞌi biin qallayiyeete; biich wojjoon immemmon qajjiyeete. Tunebaani Saaꞌooli cikkii qajjiye.
Currently Selected:
1 Saameeli 10: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
