1 Taateenaꞌo 19
19
Horeebi Guudooch Eliyaasi Keyo
1Akaabi ebi bullin Eliyaasi tuniyoon, keemechinaꞌo bullin goraadoona bi wuxoon Elizabeelich gettiye. 2Elizabeeliyoo, “Ebi keemechinaꞌo toommooch ne tuniitoommon, yaach ebi goora ne toommooch tuniyoo ta qayigaata, nuggisheenaꞌo ta toommooch ebin tuniibeete; ebinoo daakkibeete” iyaꞌa Eliyaas waan wocheyechon daachiihan.
3Eliyaasiyoo shattiꞌi bi kasheen wodiyoyich, Yihudee showooch beeti Beershaab tiyii hammiye; bi aafee bushoon arooch echiihe. 4Biyoo ikke heeyi gommon barahee daggoona hammiye. Aroochee ikke michi baatooch koteechii, “Doono Yeero, taach beddiye. Ta qaabbechinaꞌoyee beshaano taane. Ta kasheen daambe” iꞌi qollehe. 5Biyoo are michi baatooch teeqqehe; tokketoo biin yechiye.
Diqqoona maraakoo biin shuurikkiꞌi biich, “Tiyiree mame” iye. 6Tiyii ciinniꞌi, ebiyoche bi qoyooch xaqqee gudooch kachiti koshonaa qondee ikke aacona beeton beeggiye. Maa uchiichii, wochinnoon tokketehe.
7Doono Yeerichi maraakoo wochinnoon waa, biin shuurikkiꞌi, “Ne hammemmi gommo woho bi tunetoyich, tiyiree mame” iye. 8Tiyiꞌi maahe; uchiinoo iye. Aree giidoona Doono Yeerichi guudooch, Kooreeb beddaahaa, aabbe areddoonaa aabbe xumoonon qaxiriye. 9Arooch beeti xaqqee gofooch shaggiꞌi, arooch qeyiye.
Aroochee Doono Yeeri biich, “Eliyaaso, hiniich amooniye ne hallaa beeto?” iye.
10Biyoo, “Beshe Mawe Nuggishoo Doono Yeeri neech oogichaa qanaateto taane. Israꞌeeleenaꞌo neenna tookkii boonoshi giyiti wogoon biichitinaꞌone; ne deejjee gudeenaꞌon happitinaꞌone; ne keemechinaꞌonoo goraadoona wuxitinaꞌone. Ta ikkeeto baach, echeto taane. Taanoo wuxoyich qaawii beetinaꞌone” iye.
11Doono Yeeriyoo, “Guudi toommooch keyiree, Doono Yeeri ta aafooch neexebe” iye.
Aroochee Doono Yeeri beshehe. Doono Yeeri aafoochaa ooge giidechi yongo guudinaꞌon boriye; ogooge xaqqeenaꞌonoo shiqiye; tunebaani Doono Yeeri yongee daggooch aalloone. Yongee hillooch showoo qewehe; tunebaani Doono Yeeri showee qewee daggooch aalloone. 12Showee qewee hillooch qaaqqoo waahe; tunebaani Doono Yeeri qaaqqee daggooch aalloone. Qaaqqee hillooch shaashikkee qaaro waayeehe. 13Eliyaasiyoo ebin waayeꞌi, bi aafoon bi tahoona oppeechii, kechii xaqqee gofee kellooch neexehe.
Aroochee, “Eliyaaso, hiniich amooniye ne hallaa beeto?” ii beeti qaaroon waayehe.
14Biyoo, “Beshe Mawe Nuggishoo Doono Yeeri neech oogichaa qanaateto taane. Israꞌeeleenaꞌo neenna tookkii boonoshi giyiti wogoon biichitinaꞌone; ne deejjee gudeenaꞌon happitinaꞌone; ne keemechinaꞌonoo goraadoona wuxitinaꞌone. Ta ikkeeto baach, echeto taane. Taanoo wuxoyich qaawii beetinaꞌone” iye.
15Doono Yeeriyoo biich, “Ne hilla wotteree, Damaasiqi gaꞌooch beeti barahooch hambe; arooch shagiree, Hazaheelin Sooriyee taatoo bi tunemmoyich huute. 16Nimishi bushoo Yehin, Israꞌeelee taatoo bi tunemmoyich huute. Abeel Meholi katemee asho, Shafaaxi bushoo Elisayin ne keroon keemecho bi tunemmoyich, huute. 17Hazaheelichi goraadoochee muricciton Yehi wuxemmone. Yehichi goraadoochee muricciton Elisayi wuxemmone. 18Tawoo Israꞌeeleenaꞌo daggoochee shabaatte hume asheenaꞌon taach echiyemmo taane. Eboshi bulliyoo Baꞌaaloyich goyinneyaani, boonoshi noonoonoo Baꞌaaloochi shahalloon shumaani asheenaꞌone” iye.
Eliyaasi Elisayin Ceego
19Ebina Eliyaasi aroochee tiyii hammiꞌi, Shafaaxi bushoo Elisayi aaraa gutte kashee gattoona gochii bi beetaa, ciireexi aaraa guttinnoon aroo bi qelloona gochii bi beetaa danehe. Eliyaasi aroona besheebee bi iddimoon bi toommooch duppiye. 20Elisayi gatteenaꞌon duppiichii Eliyaasin dabbii wocciye. Aroochee, “Ta nihoonaa ta indeenon diggii shumiree keyone; aroyee gubb neen dabbemmo taane” iye.
Eliyaasiyoo, “Wotteree hambe; neen amo hallitote?” iye.
21Elisayiyoo bi hilloochee wottehe; gutte gattoon daammii guuriꞌi, meenon gattee qiicoona kiijjiye. Asheenaꞌoyichoo immiye; boonoshiyoo maaheete. Biyoo tiyiꞌi, Eliyaasin dabbii hammiye; biichoo maddehe.
Currently Selected:
1 Taateenaꞌo 19: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
