1 Taateenaꞌo 12
12
Roboꞌami Toommooch Israꞌeeleenaꞌo Timo
(2 Kiinoo 10:1-19)
1Roboꞌami Shekeem hammiye; ebiyoo Israꞌeeleenaꞌo bulli biin taatiiya arooch boonoshi kiceetoyichiye. 2Taatoo Solomooni aafoochee maxxeꞌi Gibits beeti, Nebaaxi bushoo Yeroboꞌami ebi mooyon waayeꞌi, Gibitsee wottee waahe. 3Israꞌeeleenaꞌo bi waan wochoon daachiiꞌi biin ceekkiiheete. Aroochee Yeroboꞌaminaa Israꞌeelee iitoo bullina Roboꞌam waan waaꞌi, biich ishichiyeete: 4“Ne nihoo magge waanjoon no toommooch minjitone. And illa, ne nihoo no toommooch maggiiti shuunoonaa no toommooch bi minjiti magge waanjoonon nooch ne kettiigaata, neech maddemmo noone” iyeete.
5Biyoo boonoshich, “Hambote; hanaachi keejj ta waan wotteree wobote” iye. Ebina asheenaꞌo wotteꞌi hammiyeete.
6Aroochee taatoo Roboꞌami “Ebi asheenaꞌoyich ama getiree wochibote?” iꞌi bi nihoo Solomooni kashoona beehooba, bi nihoyich maddeebee echeti, geeneenaꞌon echehe.
7Boonoshiyoo, “Hanaach hini asheenaꞌoyich deꞌa iyaꞌa ne hajjee gaata, shiimoona boonoshin ne yibbaatiigaata, boonoshiyoo bulli yemeenoon neech hajjeeyeemminaꞌone” iꞌi wochiyeete.
8Tunebaani Roboꞌami geeneenaꞌo ciicciti ciicoon qajjiichii, biinna tookkii dicciti, wotta bi aafooch neexee maddeebeeti gurimaasheenaꞌona tookkii koceehe. 9Biyoo boonoshich, “ ‘Ne nihoo no toommooch minjiti waanjoon nooch kettiibe’ ii beeti asheenaꞌoyich ta wochemmoyich, taach ittoshi ciiccemmo, amooniye?” iye.
10Biinna tookkii dicciti gurimaasheenaꞌo biich, “ ‘Ne nihoo no toommooch magge waanjoon minjitone. Ne, nooch kettiibe’ ii beeti asheenaꞌoyich ‘Ta qeexxe ta nihoochi shimetoyee beshe uureene. 11Ta nihoo magge waanjoon ittoshi toommooch minjitone; tunebaani ta, aroyee beshoon ittoshich maggiyemmo taane. Ta nihoo arengoona ittoshin xoobbitone; tunebaani ta, barahee machoona ittoshin xoobbemmo taane’#12:11 Barahee machoona xoobo bi bekkiibeeto, barahee macho koyaa shoodoommon shooddiibeeti arengooniye. gete” iyeete.
12Taatoo, “Hanaachi keejj ta waan wotteree wobote” bi itoyich, Yeroboꞌaminaa asheenaꞌo bullina keejjinnee qemooba wotteꞌi waaheete. 13Taatoo geeneenaꞌo ciicciti ciicoon qajjiichii, asheenaꞌoyich magge mooyon yibbaatehe. 14Biyoo gurimaasheenaꞌochi ciicoon waayeꞌi, “Ta nihoo magge waanjoon ittoshi toommooch minjitone; tunebaani ta aroyee beshoon ittoshich maggiyemmo taane. Ta nihoo arengoona ittoshin xoobbitone; tunebaani ta, barahee machoona ittoshin xoobbemmo taane” iye. 15Doono Yeeri Shiloohee asho Akiyina, Nebaaxi bushoo Yeroboꞌamich bi gettiti qaaroon ceechoyich, Doono Yeer waanaa maacheto bi tunetoyich, taatoo asheenaꞌo mooyon waayeyaanoone.
16Israꞌeeleenaꞌo bulli taatoo boonoshi mooyon waayee qayon beeggiꞌi, ishichii wochiyeete:
“Daawit waanee no danemmi mooyo amoone?
Iseyi bushoo waanee no woraashemmi mooyo aalloone.
Israꞌeeleenaꞌote, ittoshi duukkaani duukkaanooch wottebote;
Daawito, and ne hajjee kexon quyebe”
iyeete. Ebina Israꞌeeleenaꞌo boonoshi duukkaani duukkaanooch wotteheete. 17Tunebaani Yihudee katemeenaꞌooch koteti Israꞌeeleenaꞌo toommooch Roboꞌami taatehe.
18Aroochee taatoo Roboꞌami maddechinaꞌochi ukkiroo tuneti Adoraamin Israꞌeeleenaꞌo waan daachiihe; tunebaani Israꞌeeleenaꞌo bulli xaqqoona yexxiꞌi biin wuxiyeete.#1 Taat. 5:14 Taatoo Roboꞌamiyoo afaafinoona gaariich kechiꞌi, muriccii Yerusaalem hammiye. 19Ebina Israꞌeeleenaꞌo hanaach beddaahaa Daawitichi yareenaꞌo toommooch hukkoon shuuneheete.
20Gibitsee Yeroboꞌami wottoon Israꞌeelee asho bulli waayeꞌi, boonoshi kiceeti xaaꞌooch bi woyemmoyich ceekkiiꞌi, boonoshi bulli toommooch biin taatiiheete. Yihudi yoodoyee besh, Daawiti kechi ashoon dabbito ikkolla aalloone.
Shemayaahi Keemmiti Keemo
(2 Kiinoo 11:1-4)
21Roboꞌami Yerusaalem waachii, Israꞌeeleenaꞌon koyiree, taatittinoon biich boonoshi wochemmoyich, Yihudi yoodee asho bullinaa Biiniyaami yoodoonoochee aricheti balli shinne hume ginee naayinaꞌon kiciye.
22Tunebaani Yeer asho Shemayaahich Yeeri ishichiye: 23“Solomooni bushoo, Yihudee taatoo Roboꞌamich, Yihudi yoodo bullinaa Biiniyaami yoodo bullinoyich, echeti asheenaꞌo bullichoo, ishichibe: 24Doono Yeeri ishichiye: ‘Ebi mooyo ta waanee bi tunetoyich, ittoshi xibeenaꞌo tuneti Israꞌeeleenaꞌon koyoyich hammaahote; asho bi ikkikkoona bi kexi kexooch wottebe’ itone gete” iye. Boonoshiyoo Doono Yeerichi qaaroon waayeheete; Doono Yeeri gettitoommon, boonoshi kexi kexooch wotteheete.
Aachee Maamochi Misilo Beeteelinaa Daaninooch Neexo
25Aroochee Yeroboꞌami geppechi Efreemee showooch beeti Shekeem mishigoon shuuneꞌi arooch kotehe; wotta aroochee kechii hammii, Phiniꞌeel mishigoon shuunehe.
26-27Yeroboꞌamiyoo bi mulloona, “Hini asheenaꞌo deejjoon giddiyoyich Yerusaalem beeti, Doono Yeerichi yaafee kexooch boonoshi hamigaata, wochinnoon boonoshi mulloon boonoshi doono tuneti, Yihudee taatoo Roboꞌam waan wochemminaꞌone; taanoo wuxemminaꞌone; Yihudee taatoo Roboꞌam waan wottemminaꞌone. Taatittinoo Daawiti kechi asheenaꞌoyich wottemmone” iꞌi gabiye.
28Taatoo ebin asheenaꞌona tookkii bi boyeetoyee gubb, gutte maanji misiloon aachoochee shuuneꞌi asheenaꞌoyich, “Israꞌeeleenaꞌote, damba Yerusaalem ebichi wottoon ittoshi hammito beddiye. Gibitsee ittoshin kichiti nuggisheenaꞌo hinoshine” iye.#Key. 32:4 29Ikkoon Beeteel, wotta ohe ikkoon Daan neechiye. 30Asheenaꞌo maanji misiloyich goyinneya Beeteelinaa#12:30 “Beeteeli” ii beeto, wonnee ikke Yaafe Macaafooch baachiye bi beeto; Hibiree Yaafe Macaafooch aalloone. Daaninooch hammii beeheete. Ebin tuniyoona axaaxoon shuuneheete.
31Yeroboꞌami guudinaꞌo toommooch kexinaꞌon shuunehe. Leweenaꞌo tuneyaani qeesheenaꞌon, asheenaꞌo bull daggoochee kaacciye.
32Yihudee showoochaa baaroo baaree beetoommon, shimittinnee agenee aaraa uuchinnee qemooba, bi baareyemmon Yeroboꞌami tuniihe; deejjee gudoochoo deejjiye; bi shuuneti maaminaꞌochi misiloyich deejjoon deejjiye; ebi bullin Beeteelaa tuniihe. Guudi toommeexi goyinnee xaaꞌeenaꞌoyich bi kaacciti, qeesheenaꞌon Beeteel kotiihe. 33Baaree aabo bi tunemmoyich bi gettiti aabooba, ebiyoo shimittinnee agenee aaraa uuchinnee qemooba, deejjoon deejjoyich, Beeteel bi shuuneti deejjee gudooch hammiye; Israꞌeeleenaꞌoyich baaree aaboon tuniiꞌi bi maacciti ebi aabooba deejjee gudooch deejjoon deejjiye.#Lew. 23:33-34
Currently Selected:
1 Taateenaꞌo 12: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
