Aroma 9

Nluku n'unethi awe

1Mi akinootha, kinhimya ikhweli mwa Kristu, kimpanka usaahiti n'ankhili aka muNnepani Nttakattifu. 2Kihaana masukuli menci n'ukiwerya nrima woohihiyerera. 3Mpaka mi kaamphavelaka wiira kilaphiye ni kimwalanihinye ni Kristu nlattu wa asunnaka o'khapila aka. 4Ayo ari annasirayeli. Nluku haapanka ukhala asaanawe ni haakawela nttittimiho nawe, hopanka maleehano ni haavaha Nlamulo, mananna oovekela ni mikhuluveliho. 5Ayo phiri ucuulu wo mayathumwanihu o khalayi, ni Kristu toko ntthu ri o yeeyo ikhapila iyo. Yooyo ri oopacera wo citthu cothene, Nluku attittimihiye ukati wothene. Ameni!

6Nihuupuwele wiira nuulumo na Nluku nihovonyanihiya, maana kuhimweni wiira asirayeli othene ari asirayeli eekhweli. 7Kuhimweni nlattu wookhala ucuulu wa Aparahamu, phinhalaya ukhala othene asaana a Aparahamu. Uhiya commo, mwa Isaki, phinhalaya ukhumelela ucuulu aa.#9.7 Mphattuwelo 21.12 8Maanaya wiira ale annyariya mwirutthuni, khaanakhala asaana a Nluku, nanso ari asaana a Nluku, ale annyariya munkhuluvelihoni. 9Kontha nkhuluveliho waapankiye coo: Wo yoola ukati ula kinaahala uwa, ni Sara kinhala umphwanya nannyanre mwana.#9.9 Mphattuwelo 18.10

10Ni woohikhala yooyoru, nanso ciicammo Repeka, ahorupala irukulu ya nlopwana mmoca neehaninya Isaki, athumwanihu. 11Nanso asaana ale ahinaya uyaryaa ni ahinaya upanka itthu yoorera atthuna yoonanara, waacera wiira utthuna wa Nluku ukhale woohimala toko cithanlilyawe, 12woohikhala nlattu wo miteko, nanso nlattu wa ule neehana, ahohimeriya wiira: Omuulupale naahala unrumeela omwankani.#9.12 Mphattuwelo 25.23 13Toko cantikhiyaya wiira: Kihonfenta Yakopi, nanso kihonrusanana Isawu.#9.13 Malakiya 1.2-3

14Vano ninhala wiira cani? Maanaya wiira Nluku khanakhalaka o'sariya? Mena vakani! 15Maana uyo homwiirela Musa:

Kinaahala umoonela ikiriri ule nomoonelaka ikiriri,

ni kinaahala umoonela uthunku ule nomoonelaka uthunku.#9.15 Ukhuma 33.19

16Phimaana, kuhimwena wiira uri utthuna ni ikuru ca ntthu, nanso ciri ikiriri ca Nluku. 17Maana yowantikhiya inomwiirela Farawoo coo: Nlattu wo yeeyo phuuwusenryaka wiira mwa we, kithoonyere ikuru caka ni wiira ncina naka nilalennye miphantte cothene co mwiilaponi.#9.17 Ukhuma 9.16 18Phimaana, Nluku naamoonela ikiriri ule nontthunawe ni naanturumaliha nrima ule nontthunawe.

Uviruwa wa Nluku ni ikiriri cawe

19Nanso akina mwa nyu ankokiirela: Vano Nluku uyo nonipinttelelani? Tupani nokhotta utthuna wa Nluku? 20Tupani we, ntthu, onnyakulihanana Nluku? Vano itthu yowumpiya inootoko unkoha mumpile wiira: Ukumpenleni toko coo? 21Mayowuupa uloko kharina ihathuwa yo wuupa mwaapu wo'fayita ni mwaapu woohi ifayita n'uloko yooyo?

22Vano nirinani yoohimya, wakhala wiira Nluku nophavela uthoonyera uviruwa n'ucuweliha ikuru cawe? Uyo hoorya waavilela ale o waaphwanela uviruweliya ni yaahala ukwanyulaciya. 23Ciicammo, Nluku hotthuna uthoonyera nttittimiho ni ikiriri cawe cinci, cinikurusenlyawe hi naatthenkaciye ihinaya itthu, wiira naakhelele nttittimiho nawe. 24Hi niihaninye, kahi paahi iriyari ya ayuta, nanso ciicammo iriyari ya amalaponi. 25Toko Nluku cinhimyawe nliivuruni mwa Hoseya eeraka:

Kinaahala wiirela unethi aka ule uhiri wawaka

ni kinaahala umwiirela oofentiya aka ule hinonfentaka,#9.25 Hoseya 2.23

26ni:

Nipuro neerenlyawe: Nyu khannakhala unethi aka,

vaava phinhalaya wiireliya asaana a Nluku nkumi.#9.26 Hoseya 1.10

27Ciicammo Isaya aheera nlattu wa Sirayeli:

Asaana a Sirayeli ahookhalaru enci toko nhaava wo mpharyaa,

anhala uhala ale phinhala woopwa.#9.27 Isaya 10.22-23

28Maana wowaakuvyaca wene ni woomalela,

Apwiya anaahala uhukhumu ilapo.

29Toko Isaya ciinryawe:

Wahaari wiira Apwiya a anakhotto khayaanihiyenre ucuulu,

naahala ukhala toko asotoma ni akomora.#9.29 Isaya 1.9

Unethi wo'Sirayeli ni nhupi woorera

30Vano ninhala wiira cani? Amalaponi yahaavya isariya, ahophwanya isariya inkhuma munroromeloni; 31nanso Sirayeli, aavya nlamulo naahala uwaana isariya, khaphwanyile. 32Nlattuni? Kontha khayaavya ni nroromelo, nanso wo miteko. Ahokakathuwa wanlukuni nookakathula. 33Vano toko cantikhiyaya wiira:

Kinaweesa uSiyoni nluku nookakathula

ni mwala woowulusa;

ni ule nokhuluvela nenno nluku nno khanhala wuulihaciya muru.#9.33 Isaya 28.16

Currently Selected:

Aroma 9: NNI

Highlight

Copy