Aroma 11
11
Ikiriri ca Nluku n'unethi wo'Sirayeli
1Vano kinaakoha wiira: Nluku hokhotta unethi awe? Mena vakani! Kontha mi ki nsirayeli, ucuulu wa Aparahamu, nihimo na Pencamii. 2Nluku khakhottile unethi awe, yooyo ucuwenlyawe khalayiru. Atthuna nyu khannocuwela inhimyaya cowantikhiya cimwaacaka Eliya, waavekelawe aakasariki asirayeli wa Nluku eeraka: 3Pwiya, minapiyu cinyu ciheevakaciya ni ikhipula cinyu cihokwanyulaciya, vano kihanle phi mi ni ciicammo amphavela ukiiva?#11.3 1 Mamwene 19.10,14 4Vano Eliya aakhuliye cani ni Nluku? Kiheesunkera atthu ilufu saapa, ahinakhoroma anlapelaka Paali.#11.4 1 Mamwene 19.18 5Mpaka ilelo ahaawo atthu ahalahanle yaathanlilyawe Nluku wo nnema nawe. 6Aathanlile ni nnema nawe, khunakhala nlattu wo miteko caya. Wahaari commo, nnema na Nluku khanaakhala nnema neekhweli.
7Vano niireke cani? Itthu yaaphavelawe Sirayeli, khooryanihile, nanso yooryanihinye na atthu athanliye ni Nluku. Akina ayo yahoturumaliha mirima caya. 8Toko cantikhiyaya wiira:
Nluku haavaha nrima woorupa,
haavaha miitho ahinoona
ni manyaru ahineewa
mpaka nihuku no'lelo.#11.8 Isaya 29.10
9Ni Taviti heera:
Isikuhuulu caya nnyo cithatuwe itapha,
wiira avarihiye ni attarusiye.
10Miitho aya attorwaace wiira ahoone
ni ittuli aya ikhurutuwe ukati wothene.#11.10 Macipo 69.22-23
11Vano mi kinaakoha: Maanaya akakathuwile wiira awuluwe? Mena vakani! Uhiya commo, nlattu wo makosa aya, phiwilyaya woopwa wa amalaponi, wiira ahaculace ihace na asirayeli. 12Wakhala wiira makosa aya ahowiiha ifayita yo nttuniyani, ni ukenkennya waya nwo uhowiiha ifayita ya amalaponi, utepa n'upwaha ayuta yarukunusaka nrima!
Woopwa wa amalaponi
13Vano kinoohimeryani nyu amalaponi, maana mi ki mmitthenka a amalaponi, kinaattittimiha nteko aka, 14kiwehereryaka uhacula ihace muunethini mwaka ni mwa yeeyo yoopole asirayeli akina. 15Wakhala wiira ukhottiya waya nwo uri waatanihinya wo'ttuninya, waamininya waya nwo unkokhala ukumi wa atthu ookhwa. 16Vano, wakhala wiira nlipu uyo nttakattifu, ciicammo nkatthe uyo uri nttakattifu. Ni wakhala wiira ntithari uyo nttakattifu, ciicammo miritta nnyo ciri cittakattifu.
17Nanso wakhalaka wiira miritta cikina nnyo cihothikiliya, ni we unari nlivera wo ntakhwani, uhopharelelihiya ni cikina nnyo, vano umpanka mphantte woorokoci unkhuma muntitharini wo nlivera woophattennya, 18uhitarawe miritta cithikiliye. Weettottopaka, ucuwele wiira khunakhala phi we unliha ntithari, nanso ntithari uyo phinooliha we. 19Vano we unkowiira coo: Miritta nnyo cihothikiliya, wiira mi kipharelelihiye. 20Khweli, ayo ahothikiliya nlattu wohaamini, ni we uri oolipa nlattu wo nroromelo. Uhiittottope, nanso woove. 21Toko Nluku cihinemecenryawe miritta ceephattu, ni we ciicammo khanhala wuunemecera.
22Phimaana uweheehe mananna ciryawe Nluku eemaani ni oohiperwa. Ri oohiperwa wa ale awuluwile, ni ri eemaani ni we, nanso unlamuliya ukhanyerera mwiimaanini mwawe. Uhiya commo we ciicammo unaahala uthikiliya. 23Na ayo ciicammo, yahokoleelaka waamini, anaahala upharelelihiya, maana Nluku nawoorya waaphareleliha tho. 24Nyu amalaponi nri toko nritta wo nlivera wo ntakhwani uthikiliye ni upharelelihiye, woohikhala weephattu wo nlivera woophattennya. Ayuta ari toko nlivera woophattennya. Phimaana, ni Nluku wankokhala wookhwya uphareleliha tho wamwirini waya, cennyo miritta coovacuwa nnyo.
Woopwa wo'Sirayeli
25Asunnaka, kimphavela wiira nyu ncuwele isiiri yeekhweli, nhuupuwele wiira nri acuwelaci. Maana uturumala nrima wo'Sirayeli uhaaphwanyiha amalaponi ukati wookela muunethini mwa Nluku. 26Ni commo Sirayeli othene naahala woopoliya, toko cantikhiyaya yiiriyaka:
Moopoli nohala ukhuma uSiyoni
ni naahala utamiha coonanara mwa Yakopi.#11.26 Isaya 59.20-21
27Nna phiri nleehano naka na ayo,
katamihaka itampi caya nnyo.#11.27 Yeremiya 31.33-34
28Vano nlattu wo nhupi woorera, ayo ari eenani nlattu wa nyu, nanso muuthanliyani, ari oofentiya nlattu wo mayathumwanihu. 29Kontha ivahiya ni wiihana wa Nluku ciri coohifuttya. 30Toko nyu amalaponi caarinyu khalayi oonhanyuriha Nluku, nhooneliya ikiriri nlattu woohanyuriha wa ayuta, 31vano ayo ahohanyuriha, wiira Nluku oonele ikiriri toko ciwoonenlyaweni nyu. 32Maana Nluku haavaherera othene muuhanyurihani, wiira oonele ikiriri othene.
Icipo yoonttittimiha Nluku
33Weekhweli, uthaciri wa ankhili ni
ucuwelaca wa Nluku ciri cuulupale!
Khaawo noorya utaphulela moopuwelo a Apwiya
hata ucuwela iphiro caya.
34Tipani cuwenle moopuwelo a Apwiya?
Atthuna tipani aari mayamiruku aya?#11.34 Isaya 40.13
35Pani aapacenre unvaha itthu Nluku,
wiira ni uyo aturuseliye?#11.35 Yopi 41.11
36Maana citthu cothene ciri cawawe ni cinkhuma mwa yooyo.
Phimaana, mwa yooyo nikhale nttittimiho noohimala. Ameni!
Currently Selected:
Aroma 11: NNI
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
