Mateu 7

Uhinhukhumu nkhwaa

Luka 6.37-38,41-42

1Nhihukhumu, wiira ni nyu nhihukhumwinye, 2kontha ni ihukhumu inhalenyu unhukhumwela nkhunaninyu, yeeyo phinhalenyu uhukhumweliya. Ciicammo ni nliko unhalenyu umphimela, yooyo phinhalenyu uphimeliya. 3Unweherani niphalapacu niri nniithoni mwa munnaa, nanso khunwacawaca ithaapwa iri nniithoni mwaa? 4Unoorya cani umwiirela munnaa: Nkankani kuukumiheni niphalapacu niri nniithoni mwaa, ni we unarina ithaapwa nniithoni mwaa! 5Ntthu o mirima miili! Ukumihe toko ithaapwa iri nniithoni mwaa, vano phinhalaa woona ratta wookumiha niphalapacu niri nniithoni mwa munnaa.

6Nhaavahe asilapwa citthu cittakattifu, ni nhivonyere ikuluwe maluku o'fayita. Kontha alapwa ayo anaahala wuusimyeelani ni ikuluwe nnyo cinaahala unyakelaca maluku ayo.

Yesu naakhanyereriha uvekela

Luka 11.9-13

7Nlepeleke ni nnaavahiya; mwaavyeke ni nnaaphwanya; mwaatteke nkhora ni nnaahuleliya. 8Maana ule nolepela nawaakhela, ule naavya naaphwanya ni ule naatta nkhora naahuleliya.

9Vano mwanaa oolepelaka nkatthe, khunonvaha ikokoottho; 10ni hata oolepelaka ihopa, khunonvaha inwaa. 11Vano, nyu nri oonanara nrima, nnaacuwela waavaha asaanenyu citthu coorera, eere tho Athumwaninyu ari wirimu anaavaha citthu comaana ale anonlepela! 12Cothene cimphavelenyu wiira mpankeliye na atthu, ni nyu ciicammo mwaapankeleke akhunaninyu, kontha nenno phiri Nlamulo ni Minapiyu.

Iphiro piili

Luka 13.24

13Nkelele nkhora woophurya, kontha nkhora muulupale ni wowaatapuwa iri iphiro inaarimeliha atthu, ni ari enci ankelela yooyo nkhora uyo. 14Kontha, nkhora mwankani uri iphiro yoophuryaa inaarwana atthu wukumini, ni ari vakani ankela yeeyo iphiro eyo.

Minapiyu cowootha

Luka 6.43-44

15Mwiirattavelele mo minapiyu cowootha, aneecooneha toko ikhontwaa, nanso nhina mmo ari miici cowinnya. 16Vano nnohala waacuwelela nlattu wo mihokorokho caya. Cinaarukuliyaka imanka mmiiwani ni hata ikhacu khacinrukuliya mmarokani? 17Commo, miri cothene comaana cineema mihokorokho comaana, nanso mwiri woohimaana uneema mihokorokho coohimaana. 18Khawanooryaa wiira miri comaana cinawiima mihokorokho coohimaana, hata mwiri woohimaana khuneema mihokorokho comaana. 19Miri cothene cihineema mihokorokho comaana, cinaathikiliya ni uvonyeriya wamooroni. 20Commo, nnaahala waacuwela nlattu wo mihokorokho caya.

21Kaahimwe othene ankiirela: Pwiya, Pwiya! phinhala ukela wumweneni wo wirimu, nanso ule nopanka utthuna wa Apaapa ari wirimu. 22Vano nenno nihuku nno, enci ankokiirela: Pwiya, Pwiya! Hi niholalyaa mwa ncina ninyu, ni mwa ncina ninyu nihoomola macini, ni mwa ncina ninyu nihopanka cootikineeha cinci. 23Vano mi kinkoweerela coo: Akuucuwenleni hata vakani. Nkhume uhoolo waka, nyu mwaapanka citthu coonanara!

Acaasa eeli

Luka 6.46-49

24Phimaana ale othene aneewa ala moolumo aka ala, ni attharihelelaka, kinaalikanihera toko nlopwana o miruku aatekile inupa awe waculu mwala. 25Yahorupa ipula, myooloko cahocara, yahowuka iphyoo ni yahottinkihiya inupa ile ni khayaawuluwile, kontha yaatekiye waculu mwala. 26Ale othene aneewa moolumo aka ni phihittharihelelaka, kinaalikanihera toko nlopwana oohi miruku aatekile inupa awe wanhaavani. 27Yahorupa ipula, cahocara myooloko, yahowuka iphyoo ni yahottinkihiya inupa ile n'ukwanyuwaca ni ihasara aya yaari yuulupale.

28Vano, Yesu namalihilene wuulumaca, mphwinko wahotikinihinya mananna ceetthucihawe, 29kontha aheetthuciha atthu n'ulamuli, khaari toko mayowantikha.

Currently Selected:

Mateu 7: NNI

Highlight

Copy