Miteko 15

Nkuttano wa amitthenka uYerusalemu

1Vano atthu akina yaakhuma uYuteya yaanaweetthuciha asunna yiiraka: Mwaahuuleke icantto toko cinhimyaya ilema ca Musa, khannoorya woopwa. 2Vano Paulu ni Parnapee khayeewananne na atthu ale mpaka unyakulihaninya venci. Vaavale wahovaaneliya wiira oyeeli ale, ni atthu akina, arwaace uYerusalemu, wa amitthenka ni wo mahumu, wiira woolumaceriye nlahanya uyo. 3Yahoveleelihiya ni ikereca, ni yahovira mittetthe co'Fenisiya ni uSamariya, ahimyacaka urukunusa nrima wa amalaponi. Ihapari iyo yahaatteeliha nrima asunna othene.

4Waaphiyacilyaya uYerusalemu, yahaakheleliya woorera ni ikereca, na amitthenka, ni mahumu. Vano yahohimyaca citthu cothene caapankilyawe Nluku mwa ayo. 5Nanso yahokhuma atthu akina o mphwinko wo mafarisi yaakupanli, yiiraka: Anlamuliya wuulihiya icantto n'utthara Nlamulo na Musa.

6Vaavale, yahothukumana amitthenka ni mahumu wiira awehawehe itthu iyo. 7Vano unanyakulihaninyene venci, Peturu ahokusa nlove eeraka: Asunnaka, nyu nnaacuwela wiira, ikhumelo yo khalayi, Nluku hokithanla mi wariyari winyu, wiira amalaponi yiiwe wamalakuni waka, nuulumo no nhupi woorera ni akupali. 8Phimaana, Nluku nocuwela mirima, haavaha usaahiti, aawiiheraka Nnepa Nttakattifu, toko waanivahilyawe hi. 9Ni khanihawulanihile hata vakani hi ni ayo, ni waamini waya haarapiha mirima caya. 10Kaahiki vano, nnonttehatteherani Nluku, mwaavahaka eetthuci nrintti muulupale, hata asipaapehu yaayo uhinatoko aya uvilela ni hata hi? 11Nanso ninaakupali wiira nihoopoliya wo Nnema na Apwiya Yesu, toko ayo ciicammo coopoliyaya.

12Vano mphwinko wothene wahomaala, aviriyaninyaka Parnapee ni Paulu, yaattonkaca mithoonyero ni mitikiniho cothene caapankilyawe Nluku mwa ayo wariyari wa amalaponi. 13Wahoolo umaliha waya wuulumaca, Yakopu aheera: Asunnaka, nkiviriyane. 14Simoni ahottonkaca mananna ceenryawe Nluku woopacera waawehanana atthu o mwiilaponi wiira aapanke unethi wo ncina nawe. 15Yeeyo itthu iyo inawaatana ni moolumo o minapiyu, toko cantikhiyaya yiiraka:

16Caviraka nnya citthu nnya,

kinaahala uturuwela tho unteka heema wuluwile a Taviti.

Kinaahala ulokihaca nkwanyuwacilyawe mmo,

ni kinaahala unwusawusa,

17wiira atthu ahanle ayo yaaphavele Apwiya,

ciicammo amalaponi othene aneehaneliya ncina naka,

aneera ph'Apwiya ampanka nnya citthu nnya,

18cicuweliye ukhuma unankhuma. #15.18 Amosi 9.11-12

19Phimaana, kinoona wiira nihaakukureehe amalaponi anonkupali Nluku. 20Nanso, naantikhele wiira akhotte iyolya yoovahereriya anluku, uluva, inama conyopholiya n'uhilya iphome. 21Kontha Musa ikhumelo yo khalayi, haana wo khula isittatti, ale anonlalya, ni wo khula ntivela naasominya mmasinakokani.

Iwarakha yooveleeliheriya akristu amalaponi o wAntiyokiya

22Vaavale amitthenka, mahumu ni ikereca yothene yaholakela waathanla alopwana yaari nenno nipuro nno, ni yahaaruma wamoca ni Paulu ni Parnapee, urwaa wAntiyokiya. Mayothanliya ayo yaari Yuta, neehaninya Parsapa, ni Sila, ahooleli eeli wariyari wa asunna. 23Yahovahereriya iwarakha yaantikhilyaya ni ntata naya yiiraka:

Hi asunninyu, niri amitthenka ni mahumu, ninawuveleeliherani isalamu akristu amalaponi nnokhala wAntiyokiya, uSiriya ni uSilisiya. 24Maana niheewa wiira asunna akina akhumile wariyari wihu woohileeha, anawukukureehani ni moolumo, aphavelaka uturusela uttuli ankhili enyu. 25Vano, nihoonela ukhala yoorera, uthukumana wiira naathanle alopwana ni wuveleeliherani wamoca ni asunnihu oofentiya, ari ala: Parnapee ni Paulu, 26alopwana anleva ukumi aya nlattu wo ncina na Apwiyehu Yesu Kristu. 27Phimaana nihaaruma uno Yuta ni Sila, yaayo anhala wuhimeryani, wamalakuni waya nnya citthu nnya. 28Maana Nnepa Nttakattifu uhoonela urera wamoca ni hi wiira nihuuryaceni mirintti cuulupale nanso nuuhimeryeni nnya citthu coolemela nnya: 29Nkhotte iyolya yoovahereriya anluku, nhilye iphome, nhikhure inama conyopholiya ni nhiluve. Mwesempihaka nnya citthu nnya nnaapanka ratta. Nkhale ni isalama.

30Vano ale yaaruminye yahophiyaca woohipica wAntiyokiya, yahothukumaniha unethi ni yahovaha iwarakha ile. 31Waasominyaya iwarakha ile, yahotteeliya venci nlattu woolipiheriya mirima. 32Vano Yuta ni Sila, yaari minapiyu, yahaapisiha ni waalipihera mirima asunna ni ikano cinci. 33Vaavale ale yahokhalaca ukati vakani, vano asunna ale yahaalevaca wiira aturuwele wo'salama waaruminyaya. 34Nanso Sila wahoncivela uhala wonwo. 35Paulu ni Parnapee yahopicapica wAntiyokiya, yiitthucihaka ni alalyaka wamoca na akina enci, nuulumo na Apwiya.

Umwalanaca wa Paulu ni Parnapee

36Anavinrene mahuku vakani, Paulu ahomwiirela Parnapee: Nrwee nituruwele, wiira naathotole asunnihu mmasittatti mothene nlalyelehu nuulumo na Apwiya, wiira noone cineettaya. 37Vano Parnapee aaphavela unkusa Yohani, eehaninya Marku. 38Nanso Paulu khoonenle ukhala isariya unkusa ule aakhottile ikhumelo uPanfiliya, ni khaanviranne mmitekoni mwaavaraya. 39Vaavale wahokhala uhiiwanannya, mpaka umwalanaca. Vano Parnapee, ahonkusa Marku ni ahokela ikalawa arwaaka uSipere. 40Nanso Paulu ahonthanla Sila. Navekeleliyene na asunna ni nnema na Apwiya, ahokhuma. 41Paahi, ahovira uSiriya ni uSilisiya, alipiheraka ikereca.

Currently Selected:

Miteko 15: NNI

Highlight

Copy